زعلانين على مازيمبي أكثر من المريخ

زعلانين على مازيمبي أكثر من المريخ

المفاجأة ما في أنو ناس الاتحاد الإفريقي أبعدوا ما زيمبي بعد ثبوت التزوير عليه لكن المفاجأة أنو ناس المريخ كانوا بحلموا أنو ممكن الاتحاد الإفريقي يرجعهم تاني لبطولاته وتحديداً الكونفدرالية بالله عليكم الله الناس ديل جنوا ولا شنو؟

وقال إيه إنو فرص المريخ كبيرة من واقع التصنيف الإفريقي وحظوظه هي الأكبر هسي زي ديل يقولوا عليهم شنو ؟

فريق طار من دور الـ32 يعني دور الـ16 زاتو ما حصلوا ممكن الاتحاد الإفريقي يلعبو في الكونفدرالية كيف وبي ياتو طريقة طيب والأندية الدخلت دور الـ16 وما تأهلت للمجموعات يودوهم وين ديل ؟
زمان قلنا ليكم إن الإعلام الأحمر ده سبب كل البلاوي التي حدثت بالمريخ الجماعة قاموا زعلوا شديد كيف نقول عليهم كده.. هسي امبارح جماهيرهم المسكينة دي بدأت تأمل يا ربي القرعة بكرة ممكن توقع المريخ مع منو يعني ناس طاروا من دور الـ32 بحلموا يلعبوا في دور الستة عشر كيف الله أعلم وطبعاً ده كلو من الإعلام الأحمر.
الإعلام الأحمر داير يقنع جماهير المريخ أنو صدارة الدوري الممتاز حتى الآن وبدون هزيمة وبالنمرة الكاملة إنجاز ما بعدو إنجاز وبرضو داير يقنعهم أنو صدارة الممتاز بتعادل التأهل مع الثمانية الكبار وبرضو الجماهير تشيل وتشجع في اللاعبين القالوا عليهم وسموهم (جيل النكسة) وبدأوا يتغزلوا كمان في سكواها وهوبة سكواها الما ما معروف ليها رأس من قعر دي وهم أي الإعلام الأحمر زعلان شديد لأنو ناس قوون ما جابوا هوبة سكواها.. انتو ما تكلموا لاعبينكم ديل قول ليهم جيبوا ليكم حاجة جديدة وخليكم من التقليد الأعمى ده.. ولو أصلاً فالحين في التقليد بس خلي واحد من لاعبينكم ديل يقلد تمريرات هيثم مصطفى.. أقول ليكم حاجة خلوهو يقلد باص هيثم لي مهند في مباراة الخرطوم الأخيرة فالحين لينا في الهوبة بتاعت مهند بس أها ما جابوها ليكم قولوا المريخ مستهدف من قوون كمان.
والله شعب الهلال زعلان اكتر من جماهير المريخ لإبعاد مازيمبي لأنو شعب الهلال كان عايز مازيمبي يكون معاهو في مجموعتو عشان نقتص منو شديد ونقطع لسان رابطة مشجعي مازيمبي فرع الخرطوم لأنهم أعدوا العدة للوقوف خلف مازمبي لو القرعة وقعتو مع الهلال لأن الاتحاد الإفريقي خذلهم مرتين.. الأولى عندما لم يبعد الإفريقي من الكونفدرالية لأنهم كانوا بيحلموا أنو يشاركوا بعد إبعاد الإفريقي.. والمرة التانية عندما أبعد الاتحاد مازيمبي من دور الثمانية لدوري أبطال إفريقيا لأنهم كانوا بعولوا عليهو شديد أنو يكرر فوزه على الهلال هنا في أمدرمان.. والله يا ناس الاتحاد الإفريقي بالغتوا عديل مع ناس المريخ ديل يعني مصرين أنو يكونوا محليين هذا العام.
الهلال على رأس مجموعة في تصنيف الكاف لدوري أبطال إفريقيا.. والجماعة هنا فرحانين أنهم غلبوا هلال كادوقلي بالستة ومتصدرين بالنمرة الكاملة وسكواها في صدارة الهدافين.. بالله ديل يقولوا عليهم شنو يعني لو عملنا مقارنة بين الهلال والمريخ زي القاعدين نقارن بين المقرن وريال مدريد رأس مجموعة.. وسادومبا الهداف.. وهم متصدرين محلياً وسكواها الهداف هسي دي مقارنة دي والله لو نحن كنا زيكم كان كلنا مشينا كبري الإنقاذ وانتحرنا من المغصة الفيها انتو دي.

خليكم من مازيمبي تعالوا شوفوا الحضري قالوا إنهم عايزين يبيعوهو لنادٍ إنجليزي وآخر سويسري لكن في دي طلعوا عاقلين يعني الحضري يعملوا بيهو شنو ديل جابوهو بـ 8 مليار.. ما تزعلوا الـ8 مليار دي بقى غرامة اللاعب معقول لاعب تمنو 8 مليار جنيه يلعبوهو في الحصاحيصا وكادوقلي وعطبرة ومدني وبورتسودان.. ما معقول طبعاً عشان كده قالوا أحسن يبيعوهو عشان ما ينطبق عليهو مقولة (جابوهو بالطيارة وباعوهو بالخسارة).
أقول ليكم حاجة انتو أمشوا شاركوا في بطولة سيكافا والهلال مع الثمانية الكبار يعني ناس الأهلي ديل والله سيكافا زاتا ما يكون سمعوا بيها ولا الترجي.. لأنو الهلال والله ما فاضي يلعب في دورة سكرتيرها بفتش ليهو لي نادي ينظمها وزي ما قال ميشو: سيكافا دي ما بتقدم للهلال أي فائدة فنية وكلامو ده للناس البفهموهو فيهو إشارات زي الداير يستفيد من سيكافا يمشي يلعب فيها.. معقول الهلال قاهر الإفريقي التونسي يمشي يلعب ليهو في منافسة اتحادها المنظم قاعد يفتش ليهو في نادي يستضيفها.
هسي الكلام ده ممكن يحصل في دوري أبطال إفريقيا.. أو ممكن يحصل في دوري أبطال أوربا.. أو ممكن يحصل في دوري أبطال آسيا ؟؟؟

والله يا ميشو عاقل أحسن تشوف ليك معسكر إعدادي تعد بيهو فريقك لدور الثمانية لدوري أبطال إفريقيا.
ومن هسي الغائب يكلم الحاضر لو ما عندك كرت الجزيرة شوف ليك طريقة واشتري كرت الجزيرة لأنو الهلال ما بتقدر تشوفو لاعب الا يكون عندك اشتراك في قناة الجزيرة يعني الما عايز يشترك أحسن ليهو يتفرج في الدوري المحلي ويقعدو يغالطو هوبة سكواها ما جابوها لأنو الهوبة الأصلية ستتحول مباشرة لقناة الجزيرة عشان كده يا ناس قوون ما في ليكم طريقة ترضو الناس ديل الا تجيبوا ليهم هوبا سكواها يعني ريحناكم شوية من هوبة مهند الطاهر.

أخيراً أخيراً

انتو عارفين ناس المريخ ديل مغصة ساكت بموتو ناس أحمد محمد أحمد ومأمون أبوشيبة ومعاوية الجاك وشلبي هسي بكون السكر عندهم بلغ ما بلغ ويقول ليك والله ده محظوظ بشكل عجيب وهم ما عارفين ناس الهلال ممغوصين أكتر منهم لأنو الاتحاد الإفريقي أبعد ما زيمبي.. الهلال الكبير كان عايز الأندية الكبيرة عشان يمسح بيها الأرض في المقبرة لكن تقول شنو؟

كلكم بتتزكروا مجموعة الموت في العام 2007 الهلال.. الأهلي.. الترجي.. وأسيك العاجي أبعدنا الترجي.. وأسيك وتأهلنا عن جدارة الى نصف النهائي عشان كده نحن دايرين الأندية القوية عشان نوريهم قوة الهلال.
لكن ما مشكلة مش ناس المريخ زعلانين ده برضو كويس معانا خليهم في الممتاز والصدارة والعلامة الكاملة وزي ما قلت نحن الآن ما فاضين ورانا مهام وطنية كبيرة وبعد ما نفضى بنرجع ليهم.

أخيراً جداً
الموردة تهزم نيل الحصاحيصا برباعية.. ليس هذا خبر لأن الطبيعي أن تفوز موردة الحضارة والجسارة التي يشرف عليها الديبة ومحسن سيد.. يا جماعة ديل غلبوا غانا زاتا خليك من النيل.. المهم في الأمر أنا سعيد للقراقير سعادة كبيرة جداً.. وحزين لصديقي إبراهومة والحزن يتملكني ومجلس إدارة النيل يبعد المدرب الشاطر محمد الطيب بدون أي أسباب منطقية بعد أن صنع من النيل فريقاً محترماً ودونكم المباراة الراقية أو فلنقل المحاضرة القيمة التي قدمها أمام المريخ.

ما حدث للنيل أمام القراقير برهان كبير على مدى الظلم الذي حاق بمورينهو المدربين الوطنيين.

لا يحيق الكر السيئ لا بأهله.