صدق او لا تصدق : الباشا افضل لاعب في المريخ

< ابلغ دليل على فشل المريخ الان هو ..ان احمد الباشا ...افضل نجوم المريخ في هذا التوقيت.

< مازلت ابحث عن لاعب في المريخ يحدث اثرا ..فلا اجد غير احمد الباشا.

< الباشا لاعبنا الزمان داك.

< انت يا جمال الوالي تجيب في ناس وارغو والنفطي والحضري ..وفي النهاية ما بتخرج باكثر من (الباشا).

< سقفكم (الباشا).

< حدكم هنا.

< ليس هذا فحسب.

< احمد الباشا الان هو (هدافا) للمريخ ...رغم ان المريخ يملك مجموعة من المحترفين (الكبار).

< كلتشي بقي زي (اسامة ام دوم)...طبعا الاثنين لا وجود لهم في المريخ الان.

< كلتشي دا كورتو (فاطي سطر).

< يا حليلك يا كلتشي ...زمن كنت بتلعب في الهلال (القوائم) كانت ترجف منك زي نار القصب.

< المباراة كلها ...(القوائم) كانت بترجف.

< هسع كلتشي بقي زي موسي الزومة.

< يا مريخاب موسي الزومة دا مفروض يدفع ليكم قروش (سيكافا).

< موسي دا هو الطلعكم.

< في لاعب بطيّر الكورة مرتين.

< انت مغالطينك يا موسي الزومة.

< في واحد عندنا في الحلة ..بتاع نظريات...زول بتاع ابحاث...طالع للشغلة دي.

< موش في ناس كدا بحبوا (الابحاث).

< الزول دا مرة لاقي ليهو (روسي) ..قال ليهو : انت تعال هنا يا روسي ..موسي الزومة دا ليه (ضيّع) الضربة التجريحية رغم الاعادة.

< الروسي عاين ليهو كدا ..وقال ليهو موش مرات بتمشي ليك لي ناس نص النهار ..وتلقاهم مشغلين (المروحة).

< زولكم قال للروسي : ايوة ...كتير بمشي لي ناس وبلقاهم مشغلين (المروحة) ..العبقرية في كدا شنو؟.

< الروسي قال ليهو : وموش مرات بتمشي لي ناس ...وتلقاهم ما مشغلين المروحة.

< زولكم قال ليهو :بلحيل.

< الروسي قال ليهو شفت موسي الزومة دا ..زي الناس البتمشي ليهم في (السخانة) دي وتلقاهم ما مشغلين (المروحة).

< ان جاملوك كدا ..بفتحوا ليك (الشباك).

< هسع الكلام دا دخلوا بي موسي الزومة شنو؟.

< المروحة.

< المروحة ذنبها شنو؟.

< قالوا ليك واحد مشي ليهو لي ساعاتي شايل ساعتو ..وقال للاسطي يا معلم الساعة دي بتأخر كل 72 ساعة خمس دقايق.

< الساعاتي طبعا عامل فيها حريف...قال ليهو ساعاتك دي وقعت في موية.

< طبعا أي ساعاتي بقول ليك الكلام دا ..وقت تشيل ليهو ساعة بايظة.

< صاحب الساعة قال ليهو ابدا ما في موية مشت على الساعة دي.

< الساعاتي قال ليهو : خلاص نغير ليك (الحجر)..الحجر بكون قديم عشان كدا الساعة دي بتأخر.

< صاحب الساعة قال ليهو : الحجر دا غيرتو ليها امس..برضو بتأخر.

< الساعاتي ما عرف يمشي وين؟..قدر ما يقول لي صاحب الساعة حاجة ..صاحب الساعة ينفي ليهو الموضوع.

< اخر حاجة الساعاتي زهج ..وقال ليهو : يعني هي بقت على الخمس دقايق.

< انت ساعتك دي جرها خمس دقايق كل 72 ساعة.

< هسع يا ناس المريخ انا بقول ليكم (موسي الزومة) دا جروه.

< جروا نص ساعة كاملة...ما خمس دقايق.

< الخمس دقايق ما بتمرقكم.

< موسي الزومة إلا تجروه نص ساعة.

< نص ساعة شنو؟.

< إلا تجروه ربع يوم.

< الزول دا معلق.

< المهم ..موسي الزومة هسع ما موضوعنا.

< موضوعنا الباشا ..الذي اصبح هدافا للمريخ في وجود طمبل.

< طمبل...!!.

< هل هناك من يذكر هذا الاسم.

< طمبل دا منو؟.

< في الكنبة بقينا ما بنشوفو.

< طمبل بقي زي الصور الزمان.

< ابيض واسود.

< أي زول في بيتو ..بتلقي عندو صورة قديمة (ابيض واسود)..لي الخال او للجد.

< طمبل دا هسع بقي (ابيض واسود).

< طمبل دا على ما اعتقد ..سوف يشطبوه في مايو القادم.

< يونيو ما بنتظرو.

< يا حليلك يا طمبل.

< بقت تسخن وتقعد.

< اكتر حاجة بتعملها ..حسام البدري بقول ليك : قوم ربط الكدارة.

< تقوم تربطها.

< وترجع تقعد تاني.

< معسكر في مصر.

< ومعسكر في ليبيا.

< وتصرف مرتبك من يوم 27.

< واكتر حاجة بتعملها ..بتسخن ...وترجع تقعد تاني.

< زي (الملاح) الفي التلاجة.

< يسخونو ..يشيلو منو (كمشة) ..ويرجعوه تاني للتلاجة.

< طمبل ...وصل المرحلة دي.

< يسخن ويرجع تاني.

< اما فيصل العجب ..فحدث ولا حرج.

< لاعب بقينا نشوفو في اخر ربع ساعة من المباراة.

< زي بوليس السواري.

< بظهر في اخر حاجة.

< الباشا الذي شطب من الهلال ..وانتقل ليلعب في هلال الساحل وتخلص منه المريخ بعد ذلك (معارا) الي الجماهيرية العربية الليبية...الان اصبح هو النجم الاول في المريخ.

< صدق او لا تصدق.

< وبعد دا كلو المريخاب بتحدثوا وبقولوا عندهم (فريق).

< فريق نجمه (الباشا).

< لكن الباشا ما غلطان ...الباشا بيلعب جوار نجم الدين وموسي والشغيل.

< وليت الامر انتهي على ذلك.

< الباشا بكل (تصريجاته).

< وجك الموية.

< الباشا الان هو هدافا للمريخ.

< نرجع ونسأل ونقول : وين كلتشي؟.

< وين طمبل؟.

< بل وين (سكواها).

< ومزمل ابوالقاسم ذاتو وين؟.

< مزمل ابوالقاسم هسع ذنبو شنو؟.

< انتوا بتصدقوا ان الاقوان في المريخ اصبح يسجلها نصرالدين الشغيل ...الشغيل دا في الهلال بمستواه دا ..(جدعة تماس) كتيرة عليهو.

< والاهداف في المريخ يسجلها باسكال.

< انتوا المهاجم منو؟.

< باسكال وإلا سكواها.

< لكن دا كلو كوم.

< الباشا بعد هجرته الي (ليبيا) وجلوسه كاحتياطي مع فريقه المعار في ليبيا عاد الي المريخ ليصبح الباشا (مشطوب الهلال قبل 5 سنوات) هو النجم الاول في المريخ.

< بتصدقوا كلام زي دا.

< هل انخفض مستوى المريخ لهذا الحد؟.

< يعني لو فكينا ليكم (صدام الدروشاب) بتعتبروه عندكم (ميسي).

< الباشا (خلعكم) كدا.. واصبح هدافكم الاول ..(صدام الدروشاب) يعمل شنو لو انتقل للمريخ.

< الاغرب من هذا ان (الباشا) فك المريخاب من (ضيقة) شديدة ..لولا احمد الباشا ...المريخ كان ح يكون في نفس نقاط اتحاد مدني.

< دا كلو كوم ...واهلى شندي ...كوم براهو.

< يا هلالاب ..اهلى شندي دا ما ساهل عليكم...الافريقي ما يغشكم ساكت.

< كمان الهلال سوف يفقد اليوم عدد من لاعبيه.

< يعني اوعكم من (هاك من دار جعل).

< ملحوظة : نحن بنمرق البمرق الوصيف من الاتحاد مدني شنو؟.

هوامش

< رحل نجم الهلال والمنتخب الوطني مرتضي سيد الجنيد ..نسأل الله له الرحمة والمغفرة ...وسوف نعود ان شاءالله لنكتب عنه.

< رحيل ود الجنيد حرمنا حتي من الاحتفاء والكتابة عن فوز الهلال على الافريقي.

< سوف نعود لاحقا ان شاءالله لنكتب عن احد سيوف الهلال.

< وسوف نرجع كذلك لمباراة الهلال والافريقي.

< نسأل الله الرحمة والمغفرة لود الجنيد.

< ممكن عادي في الظروف دي ...(الشغيل) يبقي صانع العاب في المريخ.

< والله يا حليل اليجا تانا.

< لو اليجا تانا بيلعب في المريخ الي الان ...كان الايام دي (اتجدع).

< كان لقي سوقو.

< الباشا ..بقي هداف المريخ.

< انت يا الباشا نسيت (جك) الموية.

< ابوجريشة ..حجز منذ الان (تورتة) للحضري لعيد ميلاده القادم.

< الحضري دا مفروض كل خميس يعمل ليهو عيد ميلاد.

< عشان كبير في السن.

< بشة لم يسجل في (المقبرة).

< بشة ان شاءالله ح يسجل في تونس.

< الهلال سوف يتأهل لمرحلة المجموعات باذن الله وتوفيقه.

< نرجع ونقول ان مباراة الهلال اليوم امام اهلى شندي ..غاية في (الصعوبة).

< فريق اهلي شندي يملك عناصر جيدة.

< لكن الليلة نتوقع ظهور خاص لفيلكس.

< فيلكس ماشي صاح.

< اين اختفي بكرى المدينة ...وعبده جابر.

< المدينة وجابر ..هما نجوم المرحلة القادمة.

< الحلول كلها موجودة عند المدينة وعبده جابر.

< هيثم مصطفي حفظه الله ورعاه ..مازال يقدم تضحياته للهلال ...لم يبخل على الهلال بشيء.

< نتمني قيادة هيثم للهلال في مباراة الاياب.

< كذلك نتمني العودة العاجلة لعلاءالدين يوسف.

< لكن برضو سامي عبدالله ما قصر.

< سامي عبدالله (سام وقاتل).

< اعملوا حسابكم يا ناس (سكواها).

< المريخ امام النيل الحصاحيصا لو ما اعلانات (الاسمنت) كنت مفتكر المباراة في استاد الحصاحيصا.

< غير المستوى الضعيف للمريخ ...الملعب بقي كلو (حفر).

< المريخ اذا كان هذا مستواه فانه سوف يخسر الكثير.

< حسام البدري ..قرب يعود الي بلده.

< يا البدري فريقكم دا ..ما بنستر الاسبوع القادم.

< خلاص رصيدكم انتهي.

< فريق احسن لاعب فيهو (الباشا).

< معقولة دي.

< كلتشي ، الدافي ، باسكال ، سكواها ، الحضري ، ديل البلمهم شنو؟.

< ما في حاجة بتلمهم غير (سيكافا).

< وسيكافا بعد اذن الهلال.

< يلا (كسروا تلج) للامين البرير.

< ما يكتبه صلاح ادريس الايامات دي ..لا بعجب البرير ولا جمال الوالي.

< في واحد كدا..قال لي بتوقع (ديون) الاهلي شندي تكون في الموسم القادم (15) مليار!!.

< كلمتكم يا ناس الاهلي ..اعملوا حسابكم.

< سادومبا ....محلى وافريقي ..مية المية.

< ما في افضل من كدا.

< عاجل: يا الحضري (اضاءة) استاد مدني ما بتشوف فيها.

من طرف ناظم عثمان الأربعاء مايو 04, 2011 2:28 pm

ياباشا انت ماتكتب منقول فى بداية المقال اللذيذ دة كده ماجاى تنقل بى ضبانتو والباشا مالو / شندى توبة تانى والبقية تاتى

صدق او لا تصدق : الباشا افضل لاعب في المريخ

صدق او لا تصدق : الباشا افضل لاعب في المريخ

رد: صدق او لا تصدق : الباشا افضل لاعب في المريخ