الهلال الى المجموعات !

المجنونة ابتسمت لهلال زرقان

وأبو الهل اتأهل لدوري المجموعات

هلال الهالة السأبة وصل دوري المجموعات!

ومريخ العلامة الكاملة ودع بضربات الحظ الترجيحية

خربانة أم بناية قش.. تدي التأهل للجماعة وترفض لأسياد الكورة

وتخلينا لافين صينية من خور أربعات لي محالج مارنجان

حارة مكوة بس.. النصيحة ليك يا الله المغصة كاتلانا!!

أتير توماس شات الكورة وما عارفه ماشة وين ؟؟

المصيبة الاسمها سادومبا ده لقى نفسو فجأة وحيد قدام الشبكة.

ساعة الكورة لامست الشباك الداخلية شعرة جلدي كلبت

نمشي وين من ثقالة خالد عزالدين؟

يا جماهير المريخ لوكوا الصبر العرجاء دائماً لمراحها.

المسألة مسألة وقت بس وبعد داك ستعود الأمور الى نصابها!

المحيرني تشكيلة تضم أتير توماس والتعاون تجيب قوون من قولة تيت؟!

في حاجة ما طبيعية... مش؟

أدفع نصف عمري وأعرف أبوسبحةً لالوبة المشى مع الهلال ده منو؟

فريق سافر بعلقة ساخنة من دار جعل يجي يتأهل وكمان من تونس الخضرا!!

تونس قسم خامس ما ياها الزمان.. الحاصل شنو!!

يا حليل التوانسة اليابانيين الأصليين.. الهلال لعب مع توانسة تايوان!

وين الخمسات وين الستات.. أحرجتونا وخليتونا أصغر من سمسمة؟

ده كلام ده .. أتير توماس يمشي لحدي خط تمنتاشر ويخطف الكورة من الحارس وكمان تجي قوون!

لا لا دي فيها إنَّ.. الهلال ده بطريقتو دي بكتل ليه زول؟

ود شيوخ يا الأمين البرير بعد ما شميتوا ريحة الكونفدرالية بقدرة قادر تلعبوا مع الكبار؟

وأنا قاعد في صمة خشمي يجيني الزميل عيدروس الهلالابي حانف وشو!

يا أبوعلي مازيمبي دخل دوري المجموعات في الدقيقة تسعين؟

جااااااااااااااااااااكم القدر عشاكم؟

فتبسمت حتى بانت نواجذي وقلت له مازيمبي ده فريقي المفضل بعد المريخ.

حقيقة أنا بحب مازيمبي موت لأنو بذكرني بذكريات حبيبة لنفسي.

وكان زغتوا من الترجي فريق القرن في اللفة راجيييكم.

تحسبو لعب يا شجرابي ارجى بس الراجيييك.

مباراة المتعة والإمتاع

يخوض مريخ السعد وفخر البلد اليوم مباراة المتعة والاستمتاع.

يستضيف المريخ اليوم أسود الجبال بالقلعة الحمراء.

جماهير المريخ التي لم تحظَ بعروض المريخ القوية في الولايات عليها اليوم الحضور مبكراً.

المريخ استرد كل ملامحه وظهر بشكل مميز في كل المباريات التي خاضها خاصة مباراة الأفيال.

المريخ بشكله الحالي من المفروض أن يكون في مقدمة الفرق في دوري الأبطال.

لكن معليش ده قدرنا.. وأتمنى اليوم أن يواصل كلتشي رحلة التألق.

كلتشي اليوم موعود بهاتريك وقلبي يحدثني بأنه سيفعلها

أداء المريخ في مباراتيه الأخيرتين تميز بالسلاسة والمتعة والتنوع.

مريخنا حديد رغم الحظ والخروج المبكر

27 نقطة من تسع مباريات فل مارك والحمد لله!

صحوة متأخرة يا بدري ولكن ماذا يفيد الشاه بعد ذبحها

أح وآح وآح .. بالله بذمتكم ده فريق بطير

وهلال زرقان يقدل في الميدان وكمان حيلاقي مازيمبي وده المصبرنا.

همشري يا همشري شايفك وسط الزهور متصور

يس يا يس الأيام دي لا شيء سوى اللون الأزرق

أيامكم.. إذا لقيت واحد ماشي بتضرع هذه الأيام تعرفو طوالي من عيال زرقان

رفاق البرنس في تونس حاجة تمام

وحتماً لوحة كأس الأبطال بكملوها... تموها خيال

مبرووووووك ياعبد العظيم الدوم وناصر بطرف اليد!!