ناس الهلال ديل حيرونا

الحاجة البتحير ناس المريخ ... وبتحيرنا نحن ذاتو ... هو كيف يفكر الهلالاب؟.
* بمعني مجلس ادارة الهلال دا عاوز يعمل شنو؟.
* يمكن يكون المجلس ذاتو ما عارف.
* انا اول مرة اشوف لي مجلس غير شرعي ... (وعينو قوية كدا).
* مجلس ادارة نادي الهلال بذكاء ... او قد يكون من غير ذكاء .. لم يحسم موضوع مشاركته في (سيكافا) .. إلا بعد تأكيدات صلاح ادريس امس للزميل كبوتش بعدم المشاركة.
* قبل ذلك ناس المريخ ديل ما كانوا عارفين حاجة ... ما خلوا شيء .. مرة يحنسوا ومرة يعتذروا .. الي ان تأكدت بالامس عدم مشاركة الهلال في سيكافا بصورة قاطعة.
* نحن احضرنا مدرب عالمي ... عشان نشارك في (سيكافا).
* سيكافا مين يا عم؟.
* الطريف انني سمعت في احدي الاذاعات الخاصة جدا برنامجا يتحدث عن سيكافا... تتخيلوا.
* كان المذيع يتحدث عن سيكافا بصورة فيها الكثير من التضخيم والتعظيم حتي ظننته يتحدث عن بطولة القارات (دنيا).
* سيكافا مين يا عم؟.
* اما المذيعة التي كانت مع المذيع فقد تحدثت هي الاخري عن سيكافا باعتبارها بطولة كبيرة .. وبطولة سوف تفتح للسودان افق جديد في علاقاته الدولية (يا عالم).
* بتصدقوا الكلام دا.
* تقول نحن ما بنعرف سيكافا.. سيكافا مين يا عم؟.
* البرنامج الاذاعي فتح فرص للمستمعين ليتحدثوا لنا عن بطولة سيكافا العظيمة.
* تتخيلوا الكلام دا.
* احد المستمعين الكرام قال ان سيكافا فرصة طيبة للسودان لانتعاش السياحة وهي من دون شك سوف تستفيد منها الفنادق والمريخ (يا ناس).
* تتصوروا... سيكافا مين يا عم؟.
* اعود الي الهلال ونقلب ملفاته التي يجهل امرها حتي الهلالاب.
* مجلس ادارة نادي الهلال علي لسان رئيس مجلس الادارة اكد ان الهلال سوف يسجل حاجته من اللاعبين ..سواء وافق الاتحاد العام علي المذكرة المرفوعة لهم من قبل الهلال او لم يوافق.
* كلام جميل .. وهو من دون شك يسعد الهلالاب .. لكن مع ذلك فان الغالبية غير مطمئنة وذلك لأن فترة التسجيلات اسبوعين فقط وفيها اذا اراد الهلال التسجيل من دون موافقة الاتحاد العام علي مذكرة الهلال فان علي مجلس ادارة نادي الهلال الاتجاه الي (التجنيس) وقبل ذلك الاتجاه الي (اعارة) بعض محترفي الهلال ليلعبوا خارجيا.
* هذه الخطوات تحتاج الي وقت والي عمل كبير .. واذ لم يشرع فيها المجلس من فترة طويلة فان الوقت لن يكون في صالح الهلال.
* التجنيس نفسه قد لا يكون متاحا للهلال .. لأن السلطة دائما ما تجعل العقبات امام الهلال.. اما المريخ فان التجنيس له متاح من (سلم الطائرة).
* اللاعب بجنسوا قبل اهلو.
* لدرجة ان هنالك محترف زامبي منح الجنسية وهو لا يعرف ان كانت الخرطوم هي عاصمة السودان او عاصمة افغانستان.
* وبعض الذين منحوا الجنسية السودانية بواسطة المريخ لا يعرفون حتي الان ان كان (النيل) نهرا .. او احد اندية الممتاز.
* الكل يلاحظ اجتهاد المجلس الان وتحركاته .. ولكن هل سوف تأتي تلك التحركات بالثمرات ام انها سوف تضيع هباء؟.
* يبدو ان الجميع قد اتفق علي تسجيل اللاعب الكنغولي (كابوندي) وهو الي جانب اتفاق الناس علي موهبته واجادته .. يتفق الناس ايضا علي حاجة الهلال له .. باعتبار ان الهلال يعاني كثيرا في اطرافه.
* الاضافة التي سوف يشكلها (كابوندي) اذ تم تسجيله في الهلال لا تتمثل في اضافته هو للكشف ولكنها تتمثل ايضا في ان تسجيل كابوندي سوف يكون خلص الهلال من امولادي .. الذي احسب ان الهلال في يونيو لو خرج بشطب امولادي وحده او اعارته سوف يكون كفاه ذلك.
* اما اذا كان هنالك بديلا له فان ذلك غاية الكرم.
* الهلال الي جانب كابوندي امامه الكثير من الفرص ..فهنالك قودوين الذي يمكن ان يكون الطريق ممهدا له قانونيا اذا حلت مشكلته مع الهلال.
* وهنالك داريوكان اللاعب المجنس .. والذي يمكن ان يعيده الهلال ان فشل في تجنيس من يريد من اللاعبين.
* كذلك هناك ايفوسا اللاعب المجنس والذي لا يحتاج دخوله للهلال اكثر من اخلاء خانة له.
* وهنالك ريتشارد .. وطارق مختار و...و.. ومفاجآت يعلن عنها المجلس في حينها.
* طرح كل هذه الخيارات وتعددها يجعلنا نقول كيف سيتصرف مجلس ادارة نادي الهلال في ظل هذه الظروف؟.
* ناس الهلال ديل حيرونا عديل.
* حيرونا بالجد.
* انا بقيت اشيل هم ناس المريخ ... اذا نحن الهلالاب احترنا ناس المريخ يكونوا عملوا شنو؟.
* عليكم الله الحاجات البعملوا فيها ناس الهلال دي ما بتلخبط.
* جابوا النجيلة من امريكا للتمويه.
* المريخاب انشغلوا بيها .. المجلس احضر (المدريدي) كامبوس.
* ناس المريخ انشغلوا بالسور الذي جاء من بلجيكا ..الهلال اكمل صفقته مع الكنغولي كابوندي.
* حاجات بتحير بالجد.
* الطريف في الامر ... ناس المريخ مشغولين بي سيكافا.
* سيكافا مين يا عم؟.
* في المريخ اتفتح موضوع (حوض المتعافي) ... ناس الهلال اتفقوا مع ريتشارد ووقعوا معه عقد مبدئي.
* المريخاب اهتموا بي قودوين (رجع ..ما رجع) ... الهلال جاب ايفوسا.
* ايفوسا من الضيق بقي اول زول بحضر من لاعبي الهلال للتمرين.
* يا ايفوسا انت الهلال دا وقت عاجبك كدا .. بتخلي لي فييرا شنو؟.
* المشكلة يكون احساس ايداهور نفس احساس ايفوسا.
* بالجد كدا ناس الهلال ديل يحيروا.
* في الوقت الذي طالبوا فيه بمراجعة قرار المحكمة العليا .. المحكمة الدستورية ألغت المادة 14 من اللائحة.
* يعني ناس الهلال ديل يمسكوهم بي جاي .. يطلعوا ليك بي جاي.
* انتوا عارفين ناس الهلال ديل وقت سجلوا حمودة بشير ... كانوا قبل ذلك بتكلموا في شنو؟.
* كان بتكلموا عن احداث 11 سبتمبر.
* وقت سجلوا علاء الدين يوسف ... عارفنهم قبل ذلك كانوا بتحدثوا في شنو؟.
* كانوا بتحدثوا عن ترعتي كنانة والرهد.
* هسع ناس الهلال بتكلموا عن (خطاب اوباما).
* وهذا يدل علي ان الهلال عاوز يرجع طمبل.
* كشفنا ليكم (الامتحان) ... يلا اشتغلوا ... اصلو نحن ضد عودة طمبل وضد عودة قودوين.
* من يجيبوا ليكم سيرة (خطاب اوباما) في القاهرة ... انتوا يا مريخاب اضايروا.
* الهلالاب ديل ما بتكلموا سكات.
* لكن برضو ما عارفين الهلال دا في يونيو عاوز يعمل شنو؟.
* الجماعة ديل عاوزين يفرتكوا المريخ .. الشغل دا شغل (فرتكة).
* جابوا ليهم لاعب من (الكنغو) غير امبيلي.
* قلنا ما مشكلة.
* رجعوا ايفوسا ... قلنا عادي .. بتحصل في ارقي العائلات.
* في ديسمبر الماضي جابوا ليهم برازيلي من بوليفيا.
* في يونيو دا ... مشوا جابوا ليهم سوداني من (قبرص) ... يعني تجنيس ما محتاجين ليه.
* بقبرصوه من قبلو...(زي طلعنبو قرنبو).
* الشغل دا عليكم الله ما شغل (فرتكة).
* ريتشارد ... رجعوا من عمان ... وبركية جابوه من (السيلية) قطر.
* عارفين الهلال جاب لاعب من (السيلية) ليه؟... عشان السيلية فيها القاعدة الامريكية.
* طيب قول فيها القاعدة الامريكية يعني شنو؟.
* يعني لاعب السيلية القطري سوف يكون متجانس تماما مع نجيلتنا (الامريكية).
* قلت ليكم ناس الهلال ديل ما بعملوا حاجة ساكت... قعدتوا تغالطوا.
* ويا ريت ناس الهلال يقيفوا علي كدا.
* قالوا شنو؟... قالوا عاوزين يرجعوا طمبل وقودوين.. انتوا علي كيفكم؟.
* مفروض المريخ ينسحب من المجموعات ويركز في سيكافا العاجباه دي.
* مع تحياتي لجمهور سيكافا.
* ملحوظة: سيكافا مين يا عم؟.
هوامش
* ناس المريخ قالوا قنعوا من (النعيم رونالدينو) .. بقوا يطاردوا في (صدام كسلا).
* الاستاذ الزميل معاوية صابر كان قريب من طمبل عندما انتقل اللاعب للمريخ وكان معاوية صابر وقتها يؤكد ان اللاعب سوف ينتقل للمريخ.
* معاوية صابر اكثر صحفي تابع قضية طمبل ولاحق كل مرحلاتها ... وهو الان بمهنية يلمح ان طمبل اصبح قريبا من الهلال.
* الموضوع دا احسن تحسموا قبلو.
* لو الموضوع دا مشي الفيفا .. الاتحاد الدولي ما بكتفي باعادة طمبل للهلال ... الفيفا قد يعطي الهلال (ايداهور) مع طمبل.
* بعد شطب مجاهد من المريخ .. مفروض ناس الهلال يعينوا مجاهد في دائرة الكرة ... (الضفر ما بطلع من الجلد).
* زي ما عاوزين ترجعوا طمبل ... مفروض ترجعوا مجاهد ان شاءالله في لجنة تأهيل الاستاد.
* ابناء الهلال يتعرضون لمعاملة قاسية في المريخ ... البلدوزر شطبوه ... مجاهد عاوزين يشطبوه .. طمبل عاوزين يرجعوه للهلال .. اكرم قاعد كنبة ... كلتشي ما معروف وين؟.. الباشا انقذه قسطنطين.
* ليه كدا؟... (اولادنا) ديل بتجهجهوا فيهم كدا ليه؟.
* ناس المريخ (منتظرين) نجيلة الهلال تعمل ليها (ضل)... عشان يتحركوا.
* طمبل استلم الدفعة الاولي من صورو.
* لكن.. لكن شنو تاني؟.
* لكن في (صورة) ناقصة.
* خبر عاجل: يا طمبل غيّرنا ليك (النجيلة)... وسوينا ليك (سور).