واحد صفر .. منير أمبدة

انتو بتفتكرو أانو الموضوع موضوع ثقالة من خالد ثقالات.. لكن أنا جادي جداً.. الكورة حتنتهي واحد صفر لصالح الهلال.. أرر لصالح الهلال عشان أنا عارف في ناس ثقيلين بعد أقول ليهم القون بجيبو منير أمبدة حيقولو لي.. وين ؟!!

طيب.. تعالوا نتناقش بهدوء في الموضوع.. دفاع المريخ كلو خائف من سادومبا.. تركيز شديد حيكون على الزيمبابوي.. إمبيلي حيلقى الطريق ممهداً للمشاوير.. كامبوس خطتو قائمة على إرهاق دفاع المريخ في الشوط الأول.. في الشوط الثاني مهند الطاهر حيشوت كم كورة من ضربات ثابتة ومتحركة.. في واحدة من الضربات الثابتة حيتحرك منير أمبدة.. الجماعة طبعاً بكونوا فترانين جداً.. تركيزهم بكون ضعيف.. التركيز الضعيف ذاتو بكون على سادومبا.. منير أمبدة ما في زول بجيب بخبرو.. براحة كده حيجيب القون ويجي راجع..

عارفين منير حيحتفل كيف؟ أحسن ما بنبوظ ليكم الكورة.. زي الجماعة البكونوا فاتحين (الراديو وقافلين صوت التلفزيون.. وصوت الراديو متقدم على التلفزيون!! يعني في ناس ثقيلين بشكل!! والله احتفال منير أمبدة حيكون غريب شوية..

ما علينا.. الكورة حتنتهي واحد صفر فقط لا غير.. نحن شبعانين من قصة الأهداف الكتيرة.. الموضوع ده حسمناهو من بدري.. عارفين أول مباراة في الدوري الممتاز انتهت كم ؟ أربعة فقط لا غير!!

الخواجة الثقيل ده مصر يحرمنا من غاسيروغا..

رايكم شنو ندخل في اتفاق.. تلعبوا لينا غاسيروغا نلعب ليكم أمادو!!

معقولة المحترفين في الاحتياطي.. ناس بنك السودان العاقبوا الصرافات ديل مفروض يعملوا عقوبات على مستوردي المواسير..

هسه وارغو ده ما إضاعة للعملة الحرة..!!

تلاتة مليون دولار !! أكيد أثرت في ارتفاع سعر الدولار..

54 مباراة و4 أقوان و3 مليون دولار..

أنا ضعيف في الحساب.. عليكم الله شوفوا لينا القون بي كم ؟

أكتر حاجة أنا فرحان ليها أنو جمهور الهلال دخل الملعب واتفرج على التدريب وشجع زي ما عايز..

في شوق كده لما يصل الحد صاحبو ما بقدر يتحكم فيهو..

جماهير الهلال ديل عشاق..

ناس المريخ انتظروا لما جمال الوالي جا طالع صفقو ليهو!!

عنفوان الحب عند عشاق الأزرق فقط!!

نفسي أعرف حكاية سرية التدريبات دي شنو؟

هسه الباشا في الطرف اليمين دي عايزة ليها سر ؟! ولا عمر بخيت في الارتكاز دي عايزة ليها سرية !!

وأي زول عارف أنو سادومبا حيجري بسفاري.. يعني قفلتوا التمرين ركبتوا ليهو ماكنة هايس!!

إن شاء الله نغلبكم الليلة ونغلبكم في الانتخابات!!

إنت مع منو يا خالد.. أنا عارف..

أنا مع مرشح الهلال طبعاً!!

مش مدني الحارث مرشحكم يا التجاني أبو سن..

هسه مدني بكرة بفرح لما منير ـمبده يجيب القون؟!!

الحاجة المؤكدة أنو حسن عبد السلام فرحان فرحان!!

بعد الكورة طوالي وفي عز فرحنا حنمشي نتبرع بالدم..

بكرة اليوم العالمي للتبرع بالدم..

دمنا أزرق جميل وأبيض صافي..

دم متعافي..

وبعد بكرة بمزاااج نتفرج في كاس العالم..

اشتركنا في الجزيرة بـ230 ألف فقط لا غير..

شكراً لحماية المستهلك..

ولكن من يحمي المريخ من أخطاء محمد كمال..

اعملوا ليكم جمعية..

سموها جمعية مكافحة أخطاء حراس المريخ!!

نحن عندنا جمعية اسمها.. منير أمبدة لا يرحم..

اللهم انصر منير وإخوته.

اللهم انصر حزب الأغلبية.

اللهم آمين ..

انت صدقت أنوا المباراة بينهي لصالحكم ولاشنو يا ناصر
احسن نسكت لما بعد المباراة
وكفي

واحد صفر .. منير أمبدة

واحد صفر .. منير أمبدة

رد: واحد صفر .. منير أمبدة