ويا سادومبا هوْلبْ لبْ

قبل كدا قلت ليكم نحن بنطعم (الشاي) بي تمريرة هيثم مصطفي (حفظه الله ورعاه).

{ وهوبة مهند عندنا زي (البندول).

{ بتريح الاعصاب.

{ كاريكا ذاتو قلب الهوبة.

{ يا كاريكا معليش ...(النجيلة) ما مساعدة.

{ نجيلة استاد الهلال زي بيت النضارة.

{ هسع (بيت النضارة) ذنبو شنو؟.

{ يا مريخاب (كاسروكا) لو فلقتوه ما كان غلط.

{ وسفاري ما كان طلع من المعسكر.

{ ومحمد كمال ما كان ما شاف الكورة.

{ تقول حارس ليهو تلفون.

{ انت يا محمد كمال بتعمل كدا ليه؟.

{ بتطلع من قونك في الاساس ليه؟.

{ كلو من (ولدنا) سفاري ..لو كان قاعد ...كان كاسروكا قلبو ثبت.

{ بالله (كاسروكا) يرجف متل (الموبايل) الشغال هزاز.

{ ومحمد كمال (قاعد ساكت).

{ زي الموبايل القاطع كهرباء.

{ الشافك يا محمد كمال تشكي من (الحصوة) ما كذب.

{ البعمل فيه سادومبا دا ماشي عليك.

{ الشيء شنو؟.

{ الشيء عندنا نحن بالترتيب.

{ أي حاجة نحن عندنا بي نظام.

{ سادومبا قلت ليكم قبل كدا بترجم في كلام محمد طه القدال.

ويا الولد البشيل مدقاقو قولة خير

علي القمره

يقابل الجايّة متحزّم

ومتلزّم

كلام فاسك علي ارضك

بيبقي عديله يا بيضا

ويبقي زفاف تزغرد ليه قمرية

وقبال حول

تغيّم غيمة قبلية

ترش الدارة والحدب الصعيد الحلة...

يا رحمة نداوة الصفقة ..

في النسمة الصعيدية

ويا جهرة نهار الليلة...

لّما الليلة بدرية

{ اصبروا يا جماعة ما تضيقوا ...(سادومبا) انا ماشي عليه.

{ حالتها دي بدون بكري المدينة.

{ عشان كدا.

{ عشان كدا شنو؟.

{ عشان كدا كاربوني بجهز في (مجاهد).

{ كاربوني دا نظرتو بعيدة.

{ كاربوني دا قنع من ناس سعيد السعودي والشغيل.

{ بقي يجهز في مجاهد.

{ بكري المدينة دا خايفكم ترجعوا ليه سليمان عبدالقادر.

{ يا كمال عبدالغني قوم سخن...ناس طارق مختار ما بقدروا علي الشغل دا.

رحيح جنياتنا

في الحدب الصعيد الحله

يا قمحاتنا ..هولب لب

ويا اللوز في الوادي هولب لب

ويا سمحاتنا ..هولب لب

ويا البحر الطمح مدّادي..هول لب

ويا حجواتنا يا صلواتنا ..هولب لب

{ ونحن نضيف.

يا سادومبا هولب لب

{ سادومبا امس شغال (خياطة).

{ شيء يسجل ...وشيء يصنع.

{ ذكرتوني (كلاتشي).

{ كلتشي كان ماشي زي طلقة.

{ قام براه كدا مشي المريخ.

{ البمشي المريخ كلو بنتهي.

{ انتوا ما شفتوا (طمبل).

{ بقي قاعد في الكنبة (يوجه)...غايتو غير تضع ايدك في رأسك يا طمبل ما شفنا ليك شيء.

{ شكلو كدا فكر في انو يبقي (مساعد مدرب).

{ لاقي البلد فاضية.

{ والله في المريخ دا لو عاوز تبقي (رئيس) تبقي.

{ طلع ليك (بيان) بس.

{ اليوم التاني الاعلام السالب بطلعك (رئيس).

{ والعجب لو عملت ليك (طابق تاني).

{ تبقي الوالي عديل.

{ انتوا يا ناس المريخ جنيتوا.

{ فريق الجيش دا نفض فريق النجم التونسي.

{ بالواضح كدا.

{ فريق فيه 30 تونسي ما قدر يغلبو.

{ انتوا بي 3 توانسة عاوزين تنفضوا (الجيش).

{ المريخ ركب التونسية وطار من الكونفدرلية.

{ انا عارفها ما منكم...من (المطرة).

{ المطرة دي بتصب في الجزء بتاع المريخ بس.

{ ظاهر عليها.

{ اقول ليكم حاجة.

{ تحلل ليكم كل مشاكلكم يا ناس المريخ ..ابدأوا تجنيس في الاداريين.

{ يعني جيبوا ليكم (هندي).

{ جنسوه وبقوه رئيس لنادي المريخ.

{ اصلو الجنسية عندكم ساهلة.

{ اللاعب يجنسوه قبل ما يعطوه تأشيرة الدخول.

{ الشيء شنو؟.

{ الهملة تطير.

{ استثناء شداد تلتوا وتعجنوا فيه سنة كاملة.

{ محاضرات ونظريات ..وقانون ...بقت علي الاستثناء يعني.

{ صعبة الجنسية وإلا الاستثناء.

{ المهم احسن حل لي مشاكلكم دي تجنسوا اداريين.

{ الامين العام جنسوا ليه (ياباني).

{ الياباني دا وقت يزعل يطلع ليهو (بيان) بي اللغة اليابانية.

{ الاعلام السالب ما بفهم فيه أي حاجة.

{ لكن برضو بنظروا فيه.

{ هسع دي حاجة بتتعقل.

{ تجنسوا مهدي بن ضيف الله وتطردوا (سفاري).

{ الجماعة ديل بهينوا في اللاعب الوطني.

{ وارغو بصرف 10 مليون جنيه ...زول بسألوا مافي.

{ وارغو دا (المحكمة) ما قادرة تهبشو.

{ اكتر حاجة بعملها وارغو بقعد يعاين في كرعينو.

{ انت يا وارغو لو عندك اقدام زي اقدام بكري المدينة ما عارف كنت عملت شنو؟.

{ يمين كنت ما بترفع عينك من الواطة.

{ لكن يا وارغو نحن ما بنلومك.. ميسي ذاتو في كأس العالم ما عمل حاجة.

{ ميسي ذاتو قعد يعاين في كرعينو.

{ وارغو خلوه.

{ شفتوا النفطي.

{ انت يا النفطي بتجي متأخر...وكمان بتضيع في ضربات الجزاء.

{ امشي جيب لينا ولي امرك طوالي.

{ ما شفتوا سادومبا بخت الكورة في الشبكة كيف؟.

{ انتوا عارفين نحن ضربة الجزاء بتاعة سادومبا دي قصدناها.

{ عاوزين نعلمكم يا ناس المريخ.

{ نوريكم ضربة الجزاء بنفذوها كيف؟.

{ ان شاءالله بعد دا النفطي يتعلم.

{ الشيء المضحك.

{ الرشيد المهدية.

{ الرشيد المهدية مالو؟.

{ الرشيد المهدية قال ضربة الجزاء ما صحيحة.

{ احتمال يكون الرشيد ما لابس النظارة.

{ او احتمال يكون الرشيد فكر يبقي مدرب للمريخ.

{ اصلو أي زول طمع الايامات دي يكون مدرب للمريخ.

{ شيء محمد الطيب.

{ وشيء فاروق جبرة.

{ لكن يا الرشيد انت كترت المحلبية.

{ عامل فيها محلل دغري.

{ يا اخوي انت لو دغري قول كلامك دا في المريخ.

{ شوف اليوم التاني لو ما لقيت نفسك في الاذاعة الرياضية.

{ المعايش جبارة يا الرشيد.

{ قاعد في الامارات وتحلل.

{ ليك حق تقول ضربة الجزاء ما صحيحة.

{ ما صحيحة كيف يا الرشيد.

{ دي ما عاوزة ليها (نضارة).

{ الشيء واضحة.

{ إلا تكون عاوز ليك (حافز).

{ يا راجل قوم.

{ ما بعملوها كدا.

{ الشيء الغريب ..الرشيد قعد يدافع عن (سفاري).

{ هسع لو سفاري دا جاء الهلال ...بتقوم عليه.

{ قال نحن ما عارفين الحصل شنو؟..عشان كدا ما بنقدر نحكم علي الموضوع.

{ المهم يا جماعة (سفاري) عاوز الهلال.

{ إلا يقول ليكم كدا يا ناس المريخ.

{ انتوا ما تفهموها براكم يا جماعة.

{ الشيء واضحة.

{ اقول ليكم سر.

{ اكرم (الحصوة) راحت منو.

{ اها كدا ما ظهرت.

{ السنة كلها اكرم يشكي من (الحصوة).

{ اول ما شطبوه ...زولكم بقي زي الطلقة.

{ هسع حارس الفريق الزيمبابوي دا اهبشوه...بكون جاتو (الحصوة).

{ مسكين (سفاري) بدون (حصوة) عاوزين يشطبوه.

{ انتوا عارفين اجتماع المريخ الليلة بكون فيه شنو؟.

{ الليلة الاجتماع كلو بكون عن (الطابق الثالث).

{ ما في زول في المريخ الايامات دي بقدر بتكلم في (الكورة).

{ انتوا يا ناس المريخ عارفين طن الاسمنت عمل كم؟.

{ كمينة الطوب ولعت.

{ دي قدرتكم.

{ والله بعد بكري المدينة تاني ما في حاجة بتتكلموا فيها غير (السيخ).

{ قالوا ليك ناس المريخ عاوزين يجيبوا محمد الطيب.

{ الظاهر عجبتهم (البدل).

{ اها (البدلة) عاوزة تبقي ليكم (حارس مرمي).

{ الشيء البحيرني.

{ صلاح ادريس دا.

{ يجيب اللاعب من الموردة يبقي احسن زول.

{ يجيبو من شندي يبقي ما في احسن منو؟.

{ خليفة جاب قون.

{ البلد دي كلها كانت بتنتقد في خليفة.

{ العيش يزيد ...يهاجموا خليفة.

{ المواصلات مافي يهاجموا خليفة.

{ الكهرباء تقطع ..يهاجموا خليفة.

{ يحصل حادث يهاجموا خليفة.

{ اها خليفة بقي احسن لاعب.

{ خليفة خلوه.

{ شفتوا محمد احمد بشة دا ماشي كيف؟.

{ ما شاءالله عليه.

{ لاعب يفتح النفس للشبكة.

{ والله الهلال دا بقي فيه لاعبين ...اسكتوا خليهم ساكت.

{ يا ناس الهلال تاني ما عندكم مشكلة...عشر سنوات ما بتجيكم عوجة.

{ سعيد السعودي دا بيلعب في المريخ ليه 7 سنوات الي الان وقت تشوفوا بيلعب تقول الزول دا جابوه من وين؟.

{ دا منو دا.

{ سعيد خلوه.

{ عبدالحميد السعودي ليه عشر سنوات في المريخ ...بقي كابتن عديل ...الي الان ملامح (البرلمة) ظاهرة في عبدالحميد السعودي.

{ تقول عبدالحميد بيلعب في المريخ (ضيف).

{ زول مسكين.

{ اشارة الكابتنية قدر ما يرفعها في يدو ...تقع منو.

{ ناس بكري المدينة ديل من اتسجلوا في الهلال وضعوا بصمتهم.

{ عبداللطيف بوي ذاتو عندو كلام.

{ خمسة يا مفترين.

{ حالتها دي بدون يوسف محمد.

{ ويا سادومبا هولب لب.

{ ملحوظة : هولب لب في عينك.

هوامش

{ سفاري قالوا بجهز في الشنطة.

{ سفاري قال ليهم مع ناس رمزي صالح ما بقعد.

{ رمزي مالو.

{ رمزي بجدع في المعسكر.

{ انت يا جمال بتبالغ.

{ بقيت المريخ (فلسطين).

{ سجلت مشاطيب الهلال ما نفع.

{ جبت نيجيريا دي كلها هنا.

{ برضو ما نفع.

{ جنستوا نص لعيبة تونس.

{ برضو ما نفع.

{ اها هسع يا جمال الوالي عاوز تقلب المريخ (فلسطين).

{ تجنسوا في اولاد الناس ...وتطردوا في اولادكم.

{ سفاري مسكين شعر بالغربة في المريخ.

{ يا سفاري معليش.

{ تعال الهلال عشان تعرف الفرق.

{ اسأل حمودة بشير بوريك الفرق شنو؟.

{ حمودة خلي..اسأل فييرا.

{ فييرا تقول بيلعب في المنتخب الاسباني ...اخر مزاج.

{ غايتو الهلال بالحالة الشفتها دي ...ما شاء الله عليه.

{ حصواتكم بتكتر ساكت يا ناس المريخ.

{ اكرم الهادي سليم دا لو مشي بي (حصوتو) دي جامعة الدول العربية بكسب شكوتو في المريخ.

{ لاعب اجنبي تسجلوه بلائحة من جامعة الدول العربية...ولاعبنا السوداني تشطبوه عشان عندو (حصوة).

{ دي ما حقارة دي.

{ انا اول مرة اشوف لي (حصوة) بتشطب.

{ دي قبل كدا ما سمعت بيها.

{ وسفاري.

{ سفاري مالوا كمان؟.

{ سفاري طردوه من المعسكر وخلوا الناس الاغراب.

{ عشان كدا المريخ ما بمشي لي قدام.

{ يمشي وين مع جمال الوالي دا ...(الجنسية) عندو اسهل من (المسكول).

{ غايتو جمال الوالي دا لو استمر في المريخ حتي كأس العالم القادم ...ما بتلقوا ليكم (فلسطيني) حائم في فلسطين.

{ الانتفاضة تاني ما تحلموا بيها.

{ هي فلسطين براها.

{ تونس ذاتها ..بتجي هنا.

{ الله شاف الحضري.

{ كانوا عاوزين يسجلوه بالحريات الاربعة.

{ و..و..و..

{ و شنو تاني.

{ وسادومبا هولب لب.

{ اقول ليكم حاجة.

{ المريخ لو ما جاب ليه مدرب صربي ...بجيب ليه مدرب من البوسنة.

{ يمكن يخجلوا ويتعقدوا من الحتة دي.

{ عشان كدا يمكن يجيبوه من (البوسنة).

{ البوسنة في عينك.

{ وغدا يوم اخر.

{ خبر عاجل: الدكتور قال لي اكرم ..لو عاوز (حصوتك) تروح ..امشي الهلال.

من طرف **طارق حمزة** الأربعاء يوليو 21, 2010 2:02 am

يا ناصر يا اخوي بعد الكلام الكتير نشوفكم حتعملو شنو ... ان كان امرك في المريخ نحن عندما كلام بعد التعادل حتى بعد الهزيمة في الخرطوم والعبرة في النتيجة النهائية والله يكضب الشينة

أخونا ناصر
السلام عليكم ورحمة الله وبركاته
أولا حمد لله علي السلامة ويا حبيب والله فقدناك كتير وين انت يا اخي ما تبطل ظهورك في فوز الهلال بس يعني تكون معانا في كل الظروف ودا عدم الروح الرياضية فيك ومبروك بالفوز

ويا سادومبا هوْلبْ لبْ

ويا سادومبا هوْلبْ لبْ

رد: ويا سادومبا هوْلبْ لبْ

رد: ويا سادومبا هوْلبْ لبْ