فضيحة الحضري

< ارجع خبراء في (علوم الاتصالات) قبول شباك حارس المريخ (احسن حارس في افريقيا) لهدف في اول 27 دقيقة لعصام الحضري في الدورى الممتاز السوداني للرطوبة العالية في مدينة بورتسودان.

< الرطوبة ذنبها شنو؟.

< دقيقة ..دقيقة يا ابوالشباب (خبراء علوم الاتصالات) دخلهم شنو بالهدف دا ..قف (الرطوبة) مالهم ومالها في الاساس.

< بعدين الحضري دا في سيون كان بيلعب في درجة حرارة بتصل لـ 6 درجات.

< نشرح ليكم يا جماعة.

< امشوا معاي خطوة ..خطوة.

< باقي نحن أي حاجة عندنا بي نظام.

< وما عندنا حاجة ساكت.

< عارفين (خبراء علوم الاتصالات) دخلهم شنو بالهدف الذي سجل في شباك الحضري؟.

< الحكاية برضو ما صدفة ساكت.

< الموضوع فيه ترتيب اكثر مما تتخيلوا.

< هسع (الاعلام السالب) يقول خبراء علوم الاتصالات ديل نسقوا مع (تجمع ام درمان المعارض).

< اصلو في المريخ أي كارثة بتحصل بقولوا ديل ناس (تجمع ام درمان المعارض).

< الصاعقة الضربت حوض السباحة في المريخ ...قالوا دا من تجمع ام درمان.

< وكمان (صاعقة).

< بس دا من حسن عبدالسلام.

< حسن عبدالسلام يكون دعا عليكم.

< لكن برضو ما قلتوا لينا خبراء علوم الاتصالات دخلهم شنو بالهدف الذي جاء في شباك الحضري من (تورا بورا).

< يا جماعة خبراء علوم الاتصالات (الهدف) الذي سجله مرتضي عبدالله يقع في دائرة (اختصاصهم) عشان الهدف دا جاء من مسافة بعيدة.

< من اخر الدنيا.

< الحضري كِبر.

< الهدف بقي يجي فيهو من (القلابات).

< الحاجة الما عارفنها انتوا انو الحضري طبعا الايامات دي بهلوس بالثورات.

< من الثورة التونسية الي الثورة المصرية الي الثورة الليبية.

< الحضري قالوا بعد المباراة قال في (طائرات) ضربت الملعب.

< احنا اضربنا بـ(صواريخ).

< في قصف حصل في المنطقة.

< قصف شنو يا الحضري...انت لو شفت (قصف) ناس مهند الطاهر تقول شنو؟.

< مرتضي عبدالله عمل فيك كدا....دا مرتضي ...التانين يعملوا فيك شنو؟.

< قالوا ليك هدف هلال الساحل الذي سجل في شباك المريخ خضع لبحث وتقييم من قبل الجهاز الفني للمريخ.

< حسام البدري قال السبب في الهدف (اضاءة) الاستاد.

< الاضاءة ضعيفة.

< حسام البدري طبعا عاوز يحلل (الدولارات).

< برهان جهجه حسام البدري.

< برهان البصرف كل 3 شهور.

< يا ناس هلال الساحل ما تزعلوا ...اخباركم عندنا نحن.

< اما عماد النحاس فقد ارجع الهدف الي (ثورة 25 يناير).

< ثورة 25 يناير ذنبها شنو؟.

< عماد النحاس قال الحضري جزء من النظام السابق ...اي حاجة اتغيرت في مصر.

< زول قديم نعمل ليه شنو؟.

< زول بيلعب في الاهلي من زمن انور السادات.

< زمن الخروف مركب (نغمة) عجل.

< شوبير حارس من النظام السابق زي حسام حسن وابراهيم حسن.

< احمد نظيف اقالوه.

< احمد شفيق استقال.

< وجمال مبارك اصيب باكتئاب.

< واحمد عز وحبيب العادلي بحققوا معاهم.

< وعصام الحضري مستواه اتراجع.

< اما عادل ابوجريشة فقد ارجع قبول شباك الحضري لهدف من (سقط لقط) الي سوء ارضية المعلب.

< هدف هوائي ..سوء ارضية الملعب دخلها شنو بالهدف.

< لكن (علماء روس) عارفين أي حاجة ...قالوا سبب اضطرابات عصام الحضري في بورتسودان (11 مارس).

< الرجفيبة ظاهرة.

< واضحة ...الزول دا قاعد يلاوز...بعاني من (تهلوسات) في القصبة الهوائية.

< لا بد ان عصام الحضري شاهد عبده جابر شعر بي غربة وخوف.

< الحضري قال ان شاءالله (الفيفا) توقفني.

< ومن دون شك هدف بكري المدينة (العقربي) في شباك فريق النيل الحصاحيصا ادخل عصام الحضري في هذه الحالة اللا شعورية.

< خلى يشوف مصعب عمر سبعة سبعة.

< مصعب عمر ذنبو شنو؟.

< مسكين الحضري بعد ان دخل (سن المعاش) وجد نفسه سيقف وجه لوجه امام (سادومبا).

< في زول بقيف ليه قدام قطر.

< انت يا زول قنعان من (تاريخك).

< الجابرك على البهدلة دي شنو؟.

< اعمل فيها (مصاب).

< اتصرف ..قول لو ما دفعتوا لي الغرامة ما بقيف قدام ناس الهلال.

< بعدين هيثم مصطفي حفظه الله ورعاه عندو حساب جاري مع الحضري.

< في تصفيات سوف تحصل يوم 11 مارس.

< يا هيثم انت قلت عاوز المباراة دي تكون بدون جمهور ...الاتحاد لعبك المباراة بدونى جمهور.

< دا طلب من سيدا.

< عشان في جمهور اساء لهيثم مصطفي ...القمة القادمة سوف تكون من غير جمهور.

< طلبك مجاب يا البرنس.

< عشان كدا عاوزين نشوف (خصخصة) منك في مباراة الجمعة القادمة.

< مباراة في منتهي الهدوء.

< اعملوا أي حاجة في رأسكم.

< ألعبوا بي مزاج.

< ما عاوزين أي ازعاج.

< ولا حتي مشجع واحد.

< يا الحضري (تعبت) معانا.

< سادومبا ما في حارس في السن دي بقيف قدامو.

< ما في حارس بجازف في السن دي.

< انت قنعان.

< ملعون ابو الدولار البخليك تقيف في شبكة سوف يصوب فيها مهند الطاهر.

< زول عمرو اربعين سنة بقيف قدام (بشة).

< انت يا الحضري ما قريت معلقة كركبة الاندادي التي هجأ فيها (رمزي صالح) بعد اهداف محمد احمد بشة.

< يا مهند الحضري دا شوتوا فيه من بعيد ...الزول دا بقي ما بشوف.

< السن برضو عندها احكام.

< الكبر حصل.

< انت يا الحضري صاحي وإلا نايم.

انت صاحي ولاّنايم ولاّ طرفك من طبعو نعسان

< القون الاتسجل في شبكتك في بورتسودان محمد كمال ما بجي فيه.

< دا قون يجي في حارس عمرو 40 سنة.

< والزهور صاحية وانت نايم:

الزهور صــاحية وانت نائم

داعبت شـــــــعرك النسـائم

وايقظك صوت الحمــــــائم

< غايتو لو دا حالك ما تنتظرني يوم 11 مارس.

< ناس بكري المدينة الايامات دي سمهم فائر.

< بكري المدينة وقت يكون ما في جمهور بيلعب بي مزاج ..بيلعب بمنتهي التركيز.

< انتوا ما شفتوا الهدف الذي سجله في شباك النيل الحصاحيصا.

< هدف زي دعاية المعجون.

< تضحك بس.

< هدف يجعل اسنانك اكثر بياضا.

< الحارس مسكين طلع يشوف الحاصل برة شنو؟.

< بكرى المدينة استقل الوضع ...عمل غارة جوية.

< والله التكنيك دا لو لقاهو القذافي كان اعاد سيطرته على مصراتة والزاوية وبنغازي.

< ودا كل كوم ..وعبده جابر كوم.

< غايتو يا الحضري انا عاوز اقول ليك حاجة ...لو عندك باقي قروش عند ناس جمال الوالي احسن ليك تستلمها قبل مباراة القمة القادمة.

< واحسن ليك كمان (تحجز) من بدري ...الظروف ما معروفة.

< مباراة القمة القادمة بي سنك دي يمكن يكون فيها 5 اهداف.

< الرطوبة عالية الايامات دي في الخرطوم.

< انت فاكر الرطوبة في بورتسودان براها.

< ملحوظة: الرطوبة دي شماعة زي (المطر).

هوامش

< يا مريخاب لالوب محمد كمال ولا عنب الحضري.

< على الاقل محمد كمال ما بسجلوا فيه هدف من نص الملعب.

< الهدف دا لو الحضري عندو كرامة (يتنحي) بعدو طوالي.

< او على الاقل مفروض يرجع مقدم العقد.

< مرتضي عبدالله دا عمرو ما جاب ليه قون في الدوري الممتاز.

< وقت يجيب قون يجيب في الحضري.

< وكمان من نص الملعب.

< عاوزين نعمل قائمة لاللاعبين الذين سجلوا في شباك الحضري.

< في اول 27 دقيقة للحضري في الدوري الممتاز استقبلت شباكه (هدفا).

< شبكة الحضري الشبكة الاوسع.

< الدوري الممتاز السنة دي عارفين ليه بدون رعاية؟.

< عرفنا يا دوب يا عبدالمجيد عبدالرازق.

< الممتاز الموسم دا تحت رعاية شبكة الحضري.

< أي لاعب مفروض يكون عندو دافع في التسجيل في افضل حارس مرمي في افريفيا.

< افضل حارس في تلات بطولات امم افريقية.

< ايه الهنا دا كلو.

< عبده جابر لو عرف الكلام دا ما برضي ليكم بي هدف.

< سوف تشهدوا اكثر من هوبة في القمة القادمة.

< وانتوا عارفين القلب الهوبة في القمة منو.

< الهبة حصرية على مهند الطاهر وبكرى المدينة.

< محمد مقدم لو حاول يقلب (الهوبة) فيصل العجب بيجيهو (شد عضلي) وتمزق في العضلة الامامية.

< فيصل العجب هسع ذنبو شنو؟.

< قالوا ليك عادل ابوجريشة اخذ اذن.

< قال ما بقدر يقعد في الكنبة في مباراة القمة القادمة.

< البقعدوا شنو مع فوزي المرضي.

< فوزي المرضي الاسد وقد يظهر في الكنبة ما في (غزال) بفلت من الاسد.

< تبريرات خسارة المريخ في 11 مارس.

< اول حاجة حسام البدري حديث عهد بالدوري الممتاز السوداني.

< في زول بيلعب في الاسبوع التاني من الهلال.

< دا منو القنعان من نفسو دا.

< من هلال الساحل الي هلال السودان.

< هلال الساحل عمل فيكم كدا ...الهلال (سيد البلد) يعمل فيكم شنو؟.

< كذلك من ضمن المبررات ح يقول الحضري كبير في السن.

< كبير في السن نعمل ليه شنو؟.

< الحضري دا كمان سجلوا في المريخ صلاح ادريس.

< بلة جابر اللاعب الوحيد السعيد في هذه الايامات.

< وكذلك راجي.

< والشغيل عامل فيها (مصاب).

< عاوز يتخارج.

< حركاتك دي قديمة يا الشغيل.

< عملها من قبلك عبدالسلام حميدة.

< عبدالسلام حميدة ذنبو شنو؟.

< في الهلال يوجد اكثر من عشرة لاعبين ممكن يسجلوا في أي لحظة.

< كاريكا وسادومبا وبكري المدينة ومهند الطاهر وبشة وفييرا وعبده جابر...الخ.

< دا كلها بتقع في رأس الحضري.

< خبر عاجل : يا الحضري مرتضى دا اخو سامي عبدالله ..ناس ابوجريشة ما يغشوك.

بسم الله بدينا المؤسم الجديد مع اعلام الضلال
كالعادة بالفصاحة وطول اللسان ونحنا لسه في البداية يا ناصر حرام عليك بعدين مافي حارس ما بهتز مرماه للمعلومية يعني ولو قلتوا شنو يا اعلام الضلال الحضري احسن حارس افريقيا الاول بلا منازع
ولك مني اجمل تحية يا ناصر

من طرف **طارق حمزة** الإثنين مارس 07, 2011 10:25 pm

يا محسن الجماعة ديل بالواضح خايفين من يوم 11 مارس بالمناسبة حنلعب بدون حارس مش كاريكا وبكري المدينة ... الناس ديل ما عندهم موضوع قالوا وارغو وارغو وترك ليهم البلد .... يا ناس ارحموا ... طيب بدلما تكتبو ساكت سجلوا لاعب من يوغندا مثلاً او من اي بلد آخر مثلاً من الحركة الشعبية اي من دولة الجنوب ما في مشكلة مالو ما بقت دولة المشكلة شنو ... ولو ماعندكم قروش امشو لجمال الوالي .......................... لكم الود

يا مريخاب (طارق و عبد المحسن) بلوا راسكم يوم الجمعة والضرب بالدور
مرة مهند ومرات بكري ومرة سادمبا ومرة كاريكا وبعدين هيثم مصطفى عنده حساب قديم معاكم وخاصة
مع الراكوبة عم الحضري..
انا اقترح ليكم ترسلوا نظارة من المغربى للبصريات للحضري لانه بقى ما يشوف
والله يوم الجمعة زنقة زنقة وبشة بشة
بس انتظرونا.........

من طرف **طارق حمزة** الثلاثاء مارس 08, 2011 10:04 pm

نشوف يا ناصر أخوي .... تعال يوم بكرة ماتسرع .... عشان نفرق الأصلي من التقليد .... ويوم 11 مارس قادم ... يوم ثورة الابطال يوم الشياطين الحمر .... والحضري موجود وأساسي في التشكيلة ... انشاء الله نشوف مهند بتاعك في المستطيل الأخضر ... لك الود

طارق حمزة كتب:نشوف يا ناصر أخوي .... تعال يوم بكرة ماتسرع .... عشان نفرق الأصلي من التقليد .... ويوم 11 مارس قادم ... يوم ثورة الابطال يوم الشياطين الحمر .... والحضري موجود وأساسي في التشكيلة ... انشاء الله نشوف مهند بتاعك في المستطيل الأخضر ... لك الود

الليــــــــــــــــــــــــــــــــــــــــــــــــــــــــــــــــــــــــــــــــــــــــــــلا الحضري جاكم ياناصر والكلام بعد الكورة لو م شردت بس خليك انسان عندك روح رياضي وما تشرد زي كل مرة .

فضيحة الحضري

فضيحة الحضري

رد: فضيحة الحضري

رد: فضيحة الحضري

رد: فضيحة الحضري

رد: فضيحة الحضري

رد: فضيحة الحضري