ريكاردو..شكلو كدا عاوز يقلبها (قهوة)

■تابعت بكثير من الاعجاب والاستمتاع ...ما صدر من تعليقات وكتابات عن
■التمارين التى يجريها هيثم طمبل مع المريخ.
■وقد شارك في تمارين المريخ بعد (هيثم طمبل) لاعب الهلال السابق بيتر جيمس.
■وقيل ان ريكاردو نادي بعود البرازيلي السابق (باولينو).
■قبل ان اشرع في التعليق على هذه الجزئيات ...من باب (حفظ الحقوق)..اقول ان الاستاذ الرائع عبدالمجيد عبدالرازاق كان قد تطرق لهذا الموضوع يوم الاربعاء الماضية في صحيفة السوداني.
■كما علق على هذا الامر بطريقته الخاصة الاستاذ احمد الحاج.
■وبما ان الاستاذ عبدالمجيد عبدالرازق (مريخابي) ..فاننا نورد تعليقه الساخر والممتع حول النظرية (الريكاردوية).
■كتب عبدالمجيد : (قبل ايام فوجئ جمهور المريخ بمشاركة اللاعب هيثم طمبل في تمارين الفريق رغم انتهاء عقده وقيل إن القرار من المدرب ريكاردو الذي اشتكى من عدم وجود مهاجم وطني ويريد الوقوف على مستوى طمبل الذي يعرفه جيدا عندما كان مدربا للهلال ومع الاحترام والتقدير للاعب هيثم وللمدرب ريكاردو فان الأجدى ان يضم المريخ مهاجما وطنيا صغير السن والساحة مليئة بالموهوبين.امس الاول تكرر المشهد وكانت المفاجأة اكبر لمحبي المريخ وهم يشاهدون لاعب الهلال والامل عطبرة السابق النيجيري بيتر جيمس يشارك في تمرين المريخ الرئيسي وقيل إنه أتي ايضا بدعوة من المدرب ريكاردو وأظنه ايضا يفكر في تسجيله ولا نستبعد ان نشاهد في التمارين القادمة علاء الدين جبريل او مجاهد وغيرهم من الذين كان يدربهم ريكاردو في الهلال بل لا أستبعد ان يأتي بالسيد صلاح لاجتماعات المجلس ويطالب به رئيسا للمريخ. مشاركة لاعبين خارج قائمة الفريق دليل على الفوضى وعدم الانضباط بل هي تصرفات تسيء للمريخ ولتاريخه ولابد من ايقاف هذا العبث وليعلم ريكاردو قيمة المريخ ان لم يكن يعلم وان كان هذا هو تفكيره عليه ان يعجل بالرحيل.).
■هذا ما خطه قلم الرائع عبدالمجيد ...ولا احسب ان الامر يحتاج الي تعليق ..لا سيما وان عبدالمجيد يتميز قله بسخرية نادرة لا توجد في كثير من الاقلام.
■غير ذلك فان الاستاذ عبدالمجيد يتميز عننا جميعا في انه لا ينظر للامور من منطلق (هلال مريخ)...وهذا امر تعاني منه كل الاقلام الرياضية ..إلا من رحم ربي.
■وعبدالمجيد من الذين رحموا في هذا الشأن ...فالتحية كلها للاستاذ عبدالمجيد عبدالرازق..ودمت (قوميا) هكذا ...رغم عشقك الكبير للمريخ.
■نعود الي ريكاردو الذي لم يقتنع بلاعبي المريخ ....وخرج يبحث عن مهاجم وطني ..رغم ان اقوى خطوط المريخ هو خط الهجوم.
■لكن وكما يبدو واضحا ..ان ريكاردو غير مقتنع بثلاثي الهجوم المحترف (كلتشي وسكواها واديكو).
■قد يكون ريكاردو مقتنع الي حد ما بالنيجيري كلتشي ..لكن (اديكو) على ما يبدو ان ريكاردو قنعان من خير فيه ...وقد انعكس ذلك على مستوى (اديكو) الذي تدهور كثيرا في ظل قيادة ريكاردو للمريخ.
■الشيء المدهش ان ريكادو حتى عندما اراد ان يستعين بلاعب اخر ...لم يجد غير طمبل.
■وطمبل على الطريقة ذاتها على (مشارف) الاعتزال.
■وهذا يعني ان طموح ريكاردو محدود.
■الغريب في الامر ان ريكاردو عندما كان مدربا للهلال كان يبعد (طمبل) من المشاركة ويجلسه في كنبة الاحتياطي.
■ربما ذلك كان نتاج المستوى الفنى العالي للاعبي الهلال الذي اجبر ريكاردو ان يجلس طمبل في كنبة الاحتياطي رغم تألق طمبل وقتها.
■وقد كان طمبل في ذلك الوقت صغيرا ..وكان جيدا ...بدليل احترافه في جنوب افريقيا.
■الان بعد تقدم العمر بهيثم طمبل ..وتراجع المستوى الفني بسبب الاصابات التى تعرض لها طمبل ..يريد ريكاردو ان يرجع طمبل للمريخ.
■انت يا ريكاردو (جادي) في الموضوع دا.
■طمبل تاني (لياقة) تقعدو في الكنبة ما عندو.
■كورة شنو البلعبها ليك يا ريكاردو.
■الحكاية دي بتذكرني ....حكاية فنان كبير..جاءه واحد قال ليه انا عاوزك تعمل لي حفلة عرسي.
■العريس بدون ما يشعر قطع ليك (5) مليون جنيه للفنان...قال ليه دا (حق) الحفلة.
■الفنان الكبير كان صوتو (خرب)...وبقى ما بقدر يغني ..شال الـ (5) مليون جنيه ...وقال للعريس ...اسمع (قروشك) دي ما بتعمل حاجة ...انت عارف انا حفلتي بي كم؟.
■حفلتي بي (50) مليون.
■لكن عشان ما احرجك ساكت ...انا بجي اديك فاصل (صفقة) وارجع.
■العريس عاين ليه كدا ..وقال ليه.....ليه؟...انت قايل نفسك (ترباس).
■هسع طمبل بقى زي الفنان الكبير دا.
■يا طمبل لو عاوز ترجع للمريخ ...إلا نائب مدير كورة.
■غير كدا ما عندك طريقة..ومدير كورة ..ما تحلم بيها...عشان سيرتك ما بتأهلك تمسك المنصب دا.
■اصلو ناس المريخ ديل أي لاعب كان بيلعب في الهلال ..ما بمسكوها دائرة الكورة.
■لكن نائب مدير كورة ..ممكن.
■تذكروا مجاهد.
■مجاهد دا كلو ما تجي سيرتو ...بتذكر حكاية مع حسام البدري.
■مجاهد يقوم.
■وحسام البدري يقعدو.
■مجاهد يقوم ...حسام البدري يقعدو.
■غايتو سيكافا دي فيها جنس حاجات.
■موضوع ريكاردو يا ريت لو وقف على (طمبل).
■بيتر جيمس ذاتو شاف الحكاية سايبة ...قام رجع يتمرن مع المريخ.
■دي شنو الفوضي دي.
■بيتر جيمس دا ناس الامل عطبرة شطبوه.
■تجى انت يا ريكاردو....تجيبو المريخ.
■الظاهر كدا ..ريكاردو دا عاوز يقلب المريخ (قهوة).
■والظاهر كمان ...ان ريكاردو دا غير مقتنع نهائي بلاعبي المريخ ...لا تقولوا لي راجي ..ولا تقولوا لي موتيابا.
■وإلا ما استعان ريكاردو بي بيتر جيمس.
■غايتو جيمس بيتر دا لو جبتوا المريخ ....يا عبدالمجيد إلا يركب ليكم (اللمبات).
■غير كدا ما بعمل ليكم حاجة.
■بيتر جيمس دا كان بيلعب في الهلال قبل 7 سنوات.
■ريكاردو دا لو قعد 6 شهور في المريخ ...بلقب ليكم المريخ (هلال كادوقلي).
■ما تقولوا لي كيف؟.
■فريقكم دا هسع نصو من الهلال.
■الحارس اكرم الهادي سليم.
■الوسط احمد الباشا.
■الهجوم كلتشي.
■الرئيس جمال الوالي.
■المدرب ريكاردو.
■عليكم الله ...بعد دا فضل ليكم شنو من الهلال.
■ريكاردو عاوز يجيب (باولينو).
■على كدا ...تاني دورة الاولي في الخرطوم ح يسخن.
■ح يولع نار.
■ام بدة المريخ.
■والمريخ وبرى.
■بي حاجاتكم دي ..ونظريات مدربكم دي ...والله لا بتلعبوا معانا في الممتاز ولا نقبل نلعب معاكم في الممتاز.
■معقولة بس.
■فريق كلو مشاطيب.
■المعلومة ..التي نعيدها الان ..وتأكد حكاية ان المريخ اصبح متل
■(القهوة)..هي ان طمبل وبيتر وباولينو ...كلهم قاعدين ساكت ..وما بلعبوا كورة.
■ملحوظة : ريكاردو دا (فكت) منو وإلا شنو؟.

هوامـــــــــــــــش

■في الشوط التاني امام الخرطوم ..قدم الهلال كورة راقية.
■وانتصر الهلال انتصارا كبيرا على الخرطوم رغم من ان الخرطوم فريق كبير ومحترم.
■لكن مع هذا نقول ونأكد ان مكانة هيثم مصطفي حفظه الله (فاضية).
■الهلال الان يحتاج لهيثم مصطفي اكثر من أي وقت اخر.
■حاجة الهلال لهيثم الان اكبر.
■الشيء المفرح هو ان دفاع الهلال عادت له قوته ..واصبح خط الهلال من اقوى خطوط الهلال.
■الهجوم ما فيه كلمة.
■لكن الوسط ..يفقتد للبرنس.
■نتمنى عودة البرنس عاجلا.
■وإلا الموضوع ح يكون تاني فيه كلام.
■وحفر ..وحاجات تانية.
■شارك الطاهر حماد.
■وشارك ديمبا كما قال احمد الحاج.
■ونحن احوج للبرنس.
■نواصل...
■عاجل : الشاف محمد الطيب بدرب في المريخ ما كضب.