المستفيد الوحيد من قضية طمبل هو الامل عطبرة

المستفيد الوحيد من قضية طمبل هو الامل عطبرة
*درج اعلام المريخ علي اطلاق كلمة (ولدنا) علي اي لاعب يبدع ويتجلي في الهلال.
*ريتشارد (ولدنا) والمعز (ولدنا) وعمر بخيت (ولدنا) ومهند الطاهر (ولدنا) .. حتي حمودة بشير الذي جاء من المريخ للهلال بقدميه .. قالوا عنه (ولدنا).
*هذه الوضعية تثبت النقص الذي يعانوا منه في المريخ .. ومن غرابة الاشياء ان كلتشي كانوا يقولون عنه (ولدنا) وهو لاعب في الهلال وعندما انتقل كلتشي للمريخ اصبح غريب عندهم ... ومرقها لامريكا.
*كراهية زي دي اصلو نحن ما شفناها.
*هذا طبع من طباع الضل.. او هو امر من ضعف القناعة والنظر الي ما في ايدي الاخرين.
*اعلام المريخ مثل اشعب يطلق الاشاعة فيصدقها وهو قريب من هذه الطرفة التي قيلت علي لسان الأصمعي الذي قال : (مر أشعب فجعل الصبيان يلعبون به حتى آذوه . قال : فقال لهم : ويحكم سالم بن عبد الله يقسم تمراً فصدقه الصبيان . قال : فمر الصبيان يعدون إلي دار سالم . قال : فعدا أشعب معهم وقال : ما يدريني ، والله لعله حق).
*اعلام المريخ يعدوا الان بنفس الطريقة.
*ليه حق وارغو يقول انه لم يستطع (التأقلم) علي الحياة في السودان.. يتأقلم كيف وحنين المريخاب ابدا للاعبي الهلال؟.
*جابوا وارغو بي 5 مليون دولار وبفكروا في النعيم رونالدينو.
*الحكاية دي زي الزول البمشي ليه مطعم .. يطلب (عدس) ويقعد يعاين في (فراخ) الزول القاعد جنبو.
*بتوع العدس ديل نظموا سيكافا.
*لاعبو المريخ في المريخ .. ما عندهم قيمة ... حيث لا يصبح اللاعب ذو قيمة إلا اذا جاء من الهلال.
*بتذكروا فيصل العجب.
*عبدالحميد السعودي لاعب موهوب وجيد وكان يمكن ان يكون افضل مهاجم في السودان .. لكن السعودي لأنه لم يلعب في الهلال فهو لا يحظي عندهم بي اي تميز.
*لاعب قدر له ان يجلس في الكنبة حتي وهو يصل لدرجة الكابتنية في المريخ باعتباره اقدم لاعب في المريخ بعد العجب.
*الاحساس بالنقص جعل المريخاب يفقدون حتي التفريق بين وارغو .. وامبيلي ... بينما فقدوا الاتصال بلاعبهم وارغو .. نجدهم مازالوا يلاحقوا امبيلي بكلمة (ولدنا).
*انتوا ولدكم تفكوا في امريكا ... وتكوسوا في اولاد الناس.
*اما الطشاش الفعلي فهو انهم تركوا (28) لاعبا ليقولوا للنعيم رونالدينو (ولدنا).
*انتوا قايلين النعيم دا طابق تاني.
*عفة الهلالاب وعزتهم جعلتهم لا يمنحون شرف الانتماء للهلال لاي لاعب في المريخ .. وكلمة ولدنا لا تجدر بي اي شخص إلا اذا كان لاعبا بالهلال.
*حمودة بشير .. تعطر وتعفف اولا بالازرق والابيض ثم اصبح من بعد ذلك ولدا للهلال.
*علاءالدين يوسف .. تبدلت حتي بصمته ... حتي يكفل له الانضمام للهلال ليكون ابن من ابناء الهلال.
*انتوا فاكرنها فوضي.
*وعزة الهلال تمنع عنهم هيثم طمبل الذي يملكون مستندات تثبت حقهم فيه وتؤكد احقيتهم به ... لكن مع هذا فهم قد اعرضوا عنه.
*طمبل مين يا عم؟.
*واعتقد ان المستفيد الوحيد في قضية طمبل بعد ان يحكموا في الاتحاد العام او في الفيفا بأعادة طمبل للهلال هو فريق الامل عطبرة.. لأن الهلال سوف يحول طمبل لامل عطبرة.
*علي هذا فان قضية طمبل اطرافها هما المريخ والامل عطبرة .. اما الهلال فقد استغني عن اللاعب حتي وهو يفرد جناح العودة من اورلاند فيتمنع الهلال.
*الهلال الذي رفض طمبل وهو عائد من اورلاندو الجنوب الافريقي.. لن يقبل به وهو عائد بحكم القانون من المريخ.
*قلت ليكم عاوزين نرجعوا ونشطبو.
*ما عندنا ليه حاجة اكتر من كدا.
*هو لكم يا امل عطبرة ... وربما الامل تجتمع ادارته وتنفض .. وتجتمع مرة اخري وترفض اللاعب.
*يمكن يكونوا ما محتاجين ليه.
*لكن يمكن يلقوا ليه فرقة في الكنبة.
*طمبل عنده شوية (صور) عليه ان يأخذها من المريخ .. وينتهي بعد ذلك كل شيء ليصبح اللاعب لاعبا للامل عطبرة اذا قبلوا به.
*تبقي مسيرة اللاعب هيثم طمبل هكذا .. من ودنوباوي الي الهلال ومن الهلال الي اورلاندو الجنوب افريقي ومن اورلاندو الي المريخ ومن المريخ الي الامل عطبرة.
*اما كلتشي فهو يبدو انه سوف يتحول الي لاعب كرة سلة .. بعد ان استعد لمرحلة المجموعات في الولايات المتحدة الامريكية.
*مجاهد طبعا جعلوه مصابا.
*وتلك افضل طريقة يمكن ان تتخلص به من لاعب غير مرغوب فيه.
*وارغو طبعا مفتكر عدم (التأقلم) دا حل.
*قابض ليك 5 مليون دولار .. وما قادر تتأقلم ... انت فاكر نفسك جابوك من نيجيريا عشان تبقي رئيس لجنة شعبية.. عشان تقعد تقول لينا انا ما اتأقلمت الي الان.
*قلنا ليك يا ود الناس تعال سوق لينا قطر.
*ناس المريخ اللاعب يجنسوه قبل ما (يأقلموه).
*الجنسية عندهم قبل (التأقلم).
*بالمناسبة يا ناس المريخ ... لو كلتشي سمع مجرد سمع ساكت ... انكم ح تشاركوا في سيكافا ما برجع ليكم من امريكا.
*امريكا طبعا فيها (برد) يلخم.
*برد في الحر دا.
*ملحوظة: برد في عينك.
هوامش
*اعلام المريخ ... عندما تعاقد الهلال مع ريكاردو انتقدوا المدرب وقالوا عنه ... انه مدرب قطاع سنية ... ولم يحصل علي تدريب فريق كبير... حتي اصبح ريكاردو مطلوب في المنطقة العربية كلها.
*عندما تعاقد الهلال مع دي سانتوس .. قالوا دي سانتوس قاعد ساكت .. وغير مرغوب فيه.
*دي سانتوس جاء وصعد للمجموعات .. وتصدر الممتاز بفارق 4 نقاط من الوصيف.
*انا اول مرة اشوف لي مدرب يشيلوه عشان الارسال الطويل.
*شفتوا كيف ؟... عشان كدا يا كامبوس اعمل حسابك من الارسال الطويل.
*لو ناس مرق ديل عاوزين يطفشوك من البلد دي... بلعبوا ليك الكورات الطويلة.
*الكورات الطويلة دي نحن في الضل ما بنريدها.
*المهم ناس المريخ تتخيلوا المدرب الذي درب الشباب والاتحاد في السعودية ودرب المنتخب الكويتي والنصر الاماراتي وعمل في الجهاز الفني لريال مدريد ودرب منتخب الشباب في البرازيل ... قالوا انه سنتين كان بعيد عن التدريب.
*بعيد بالنون.
*هسع رادان القريب من التدريب علاقتو شنو بالتدريب.
*ميخا مدرب الاحمال دا ... قالوا مهمتو في المانيا يجيب الركشة لاولاد رادان.
*هو كمان المانيا فيها ركشات.
*ركشة في عينك.
*بطولة سيكافا سوف تجعل المريخ كتاب مفتوح لمدرب الهلال ... خلوه يتفرج في الشوارع دي ... عشان يسفلتها ليكم.
*حوض المتعافي قالوا جاب ليه سمك.
*الحوض عرفنا حوض المتعافي ... السمك سمك منو؟.
*قروش الحوض ... قالوا شالها وراغو كحافز علي هدفه في الاتحاد مدني.
*المشكلة يكون واروغو الي الان فرحان بي هدفو في الاتحاد.
*هدفو في الشجرة طبعا شالوا في (فلاش).
*تلقاه قال لي اهلو في نيجيريا ... الشجرة دي بطل الدوري السوداني.
*الاهلي المصري ابقي علي المدرسة البرتغالية ... والهلال ابقي علي المدرسة البرازيلية.
*فنجادا سوف ينجح في الاهلي المصري اذا كان يتمع بنفس قوة شخصية جوزية.
*الدكتور علاء صادق في برنامج شوبير طالب باعفاء الجهاز الفني للمنتخب .. واعفاء مجلس ادارة الاتحاد المصري لكرة القدم ... رغم ان الجهاز الفني والاتحاد حققوا بطولة الامم الافريقية مرتين علي التوالي (2006-2008 )... كل ذلك بسبب الخسارة من الجزائر.
*طيب نحن نقول شنو؟.
*ولا حاجة .... احسن نسكت.
*قضية طمبل سوف تحسم في الالفية الرابعة.
*نحن ما ضايقين.
*ضايقة (الصور).
*اما لجنة الانضباط فسوف تصدر قرارها حول بدرالدين قلق ... بعد اعتزال قلق للكورة.
*لجنة انضباط غير منضبطة.
*اخير اللجنة المنظمة.
*لجنة مين يا عم؟.
*نجيلة الهلال قالوا رفضت (تقوم) لو ما اخذت حقها.
*ناس الهلال طبعا عاوزين يقوموها بالعافية.
*نجيلتكم دي ح تقوم مع كأس العالم.
*خبر عاجل: طمبل شال (الصور) ... باقي (العفريتة).