الوصيف وشركاؤه

< ركبنا لينا حافلة...الكمساري شفقان تقول طالع ليه من فيلم هندي ..قبل ما نركب قعد (يطقطق) لينا.

< معانا زول في الحاجات الزي دي اصلو ما بتلفت قال ليه : انت يا ود الناس ما تصبر...(بتتوصف) فينا من صباح الرحمان مالك؟.

< شفقان كدا زي الاعلام السالب.

< قعدنا في الكراسي معانا واحد بحب يقعد علي الشباك ..اي حاجة يشوفها يعلق ليك عليها.

< تقول الشوالي.

< جينا ماريين بي (قاعة الصداقة)..قال لينا دي زي بيتنا الفي البلد.

< بس في اختلاف شوية.

< قلنا ليه اختلاف شنو؟.

< قال لينا (اللمبة) الفوق الفي قاعة الصداقة دي في بيتنا ما لمبة.

< قلنا ليه شنو طيب؟.

< قال لينا في بيتنا بدل (اللمبة) عاملين (نجفة)...نجفة في عينك..نحن قالوا ليك بلدكم ما شفناها.

< بلدكم دي (مروحة) ما فيها...وقت الكهرباء تقطع زول بشعر بيها ما في.

< بلدكم دي مرة دخلتها (ركشة) النسوان كلهن وقفن في الحيط.

< فتنا قاعة الصداقة..مرت فينا (همر) كلنا شهقنا ..زي ريتشارد وقت يطلع الكورة خارج الملعب.

< ريتشارد وقت يطلع الكورة بفرح ...ما عارف انا البفرحو شنو؟...تقول عمل ليهو حاجة سمحة.

< صاحبكم قال لينا شفتوا (الهمر) دي.

< قلنا ليه شفناها.

< قال لينا (الهمر) دي زي عربية خالي...نفس اللون ...بس همر الزول القدامنا دي فيها (شلخة).

< شلخة في عينك ...انت وقت خالك عندو (همر) راكب معانا في الزحمة دي ليه؟...مضايقنا مالك؟.

< نسيت اقول ليكم الزول كان كل ما يقول لينا حاجة في خمسة انفار بنزلوا من (الحافلة).

< وقت جينا علي برج الفاتح من الشارع التاني ونحن ماشيين علي ام درمان قال لينا شفتوا (البرج) دا.

< قلنا ليه شفناه.

< قال لينا البرج دا متل حوش عمتي.

< حوش عمتك في عينك ...انت لو عندكم حوش زي البرج دا ...بتتكلم مع زول وإلا بتركب معانا في حافلة واحدة.

< المهم الزول دا وقت قال كلامو دا..الحافلة كلها نزلت.

< السواق ذاتو نزل وجاه بالشباك سلمو المفتاح واتخارج ..قال ليه الحافلة دي وصلها انت ...ووقت تصل محطتك ..قرش الحافلة واضرب لي عشان اجي اسوقها.

< الزول دا ذكرني اعلام المريخ (السالب).

< اعلام المريخ ...وقت مجلس المريخ سجل (نجاد) طلعوا لينا نجاد دا احسن لاعب في الدنيا وقالوا لينا دا مدافع اوربي.

< قلنا ليهم اللاعب دا كبير.

< قالوا لينا : الخبرة سمحة.

< نجاد 15 يوم ما قعدها في البلد ...لعب ليه نص ساعة في مباراة ودية ضد احدي اندية الدرجة الاولي واختفي بعد كدا.

< نص الساعة اللعبها (نجاد) قالوا (الترمس) كمل فيها...احتياطي البلاد من (الترمس) انتهي.

< فات نجاد ...ناس المريخ مشوا جابو ليهم مدافع ...صلعتو تبدأ من الطرف الشمال وتنتهي في الطرف اليمين.

< مدافع كان بغطي المهاجم بي صلعتو.

< قلنا ليهم دا شنو كمان؟.

< قالوا لينا الزول دا لعب ضد (هنري) ...ونشروا ليه صورة مع هنري وعملوا علي الصورة سهم يشير الي اللاعب.

< عشان شنو السهم دا؟.

< عشان نفرز المدافع من هنري؟.

< غايتو الاعلام السالب دا بعمل في جنس حاجات.

< انتوا ليه بتعملوا كدا.

< المريخاب ديل وقت سجلوا (عنتر)...ما فضل ليهم إلا يقولوا لينا دا صاحب المعلقة ذاتو.

< ونحن قربنا نصدق...نعمل شنو؟...الناس ديل كل سنة بطلعوا ليهم بي حاجة جديدة ونحن بنصدقهم.

< عنتر وين هسع؟.

< وارغو وقت سجلوها ...عملوا لينا جنس لخمة...نحن قلنا خلاص الزول دا بحل مشكلة المريخ ...زول سجل ليه 13 هدفا في دوري ابطال افريقيا ...اكيد بنفع المريخ.

< سجلوا وارغو ...وعينك ما تشوف إلا النور.

< صاحبكم دا في تسعين مباراة جاب ليه هدفين.

< مرة جاب ليه هدف في اتحاد مدني من (النص)...الجماعة قالوا لينا ميسي ظهر في مدني.

< وفي جماعة كدا قالوا وارغو يرد علي الهلال.

< وارغو مع المدرب الجديد دا بقينا ما بنشوفو إلا في اخر خمسة دقائق..تقول بسدد ليه في فواتير.

< هسع ناس المريخ عاوزين يدوروا في نفس الاسطوانات...موبوتو ومازمبي ومنو ما عارف.

< علما ان الفرق بين الهلال والمريخ حتي الان في الدوري الممتاز وصل لعشر نقاط.

< عشر نقاط رغم ان المريخ في الموسم الماضي سجل وارغو وكلتشي ولاسانا وديالو وهناك ايداهور وطمبل والعجب وسفاري وقلق وعنتر.

< كل هذه الاسماء تبقي منها في اخر الموسم (13) لاعبا لا غير ...كلهم اصبحوا بشكوا من الاصابات ...وكلهم عندهم مشاكل قانونية.

< بلة جابر موقوف وبيلعب ..وايداهور في الامارات..وكلتشي يغيب ويظهر وطمبل ما معروف وين؟.

< ريتشارد (الحاضر الغائب)...ومجاهد الظاهر عليه سوف يجدد خمس سنوات تاني للمريخ.

< اكرم يقعد برة ينتظر حافظ يغلط ...عشان هو يدخل في التشكيلة ويقعد حافظ برة.

< الدور هسع علي مين؟.

< القمة القادمة الظاهر علينا ح نشوف اكرم ..بعد القمة ح يهاجم اعلام المريخ اكرم ويرجع حافظ معزز مكرم.

< حافظ يلعب ليه كم مباراة كدا ..ويغلط ...يقوم يرجعوا اكرم بعد ان يكونوا هاجموا حافظ.

< والتخبط مستمر في حراسة المرمي.

< مرة يقولوا عاوزين يجنسوا ليهم حارس...ومرة يقولوا عاوزين يرجعوا بهاء الدين.

< نحن ذاتو ما عارفين الجماعة ديل نتصرف معاهم كيف؟.

< الغريبة بعد الحاجات دي كلها ...بشتكوا ..وبتكلموا في الكورة.

< تتخيلوا الجماعة ديل بعد كل هذا الذي يحصل منهم وبعد فرق العشر نقاط ...طلعوا ليهم بينا بهاجموا فيه في صلاح ادريس.

< الحكاية دي زي الزول البمشي للدكتور ...الدكتور يقول ليه : عندك سرطان في الدم...يقوم المريض يهاجم الملاريا ويقول الله يلعنها.

< او زي الزول البدخل فيه (قندران)...يقوم صاحبكم بعد ساعة ونص ... يهاجم (الركشات).

< البلاوى دي كلها من الركشات.

< ملحوظة: كلو من ريتشارد.

هوامش

< شركاء الوصيف عارفين منو؟...النيل والامل وحي العرب.

< كلتشي دا بيلعب في المريخ ليهو سنة ...وبرضو زعلان.

< انت يا ود الناس المزعلك شنو؟.

< السنة كلها زعلان.

< تقول ماضي شيكات.

< ايداهور قنع من اللقب سافر الامارات.

< الفرق بين الهلال والمريخ في النقاط ..عشر نقاط...والعشرة هي رقم فانلة اللاعب الذي حسم اللقب مهند الطاهر.

< الهلال في 21 مباراة فاز في عشرين مباراة وتعادل في مباراة واحدة.

< نلعب في كادوقلي ..نلعب في عطبرة ..في بورتسودان ...في مدني ..في الحصاحيصا...لا نعرف غير (الانتصار).

< اكرم رجع لحراسة مرمي المريخ في بدايات فصل الشتاء.

< في الشتاء احسن ليكم توقفوا حافظ.

< يوم 30 نوفمبر في برد شديد.

< منديل كاربوني المقصود به لقب هداف الدوري الممتاز.

< المدرب دا جايبنوا من البرازيل مخصوص عشان لقب هداف الدوري.

< لو كلتشي حقق لقب الهداف ...ممكن تحفيز هذا المدرب.

< لقب الدوري دا لو المريخ جاب البرازيل كلها ما بحققه.

< جمال الكيماوي املو اصبح في ان لا يفوز الهلال ببطولة الممتاز من غير خسارة.

< المريخ سوف يخسر من الميرغني في كسلا ...ليصبح فارق النقاط 13 نقطة.

< وسوف يكسب هلال الساحل شكواه ضد المريخ ليصبح الفرق بين الهلال والمريخ 16 نقطة.

< يقوم الشمالي يتعادل مع المريخ في عطبرة فيصبح الفرق 18 نقطة.

< يرجع الهلال وينتصر علي المريخ في الدوري الممتاز فيصبح الفرق 21 نقطة.

< دا وصيف شنو؟.

< النقاط دي ممكن تفقد المريخ بطولة العام المقبل لو كان في تحكيم عادل.

< وبعد دا تصوروا الجماعة ديل بتفاصحوا.

< لو كنت في مكانكم ...كنت شجعت اهلي عطبرة.

< ليكم حق تشجعوا مازمبي.

< خبر عاجل: ناس الامل ديل يجدعوا ويفلقوا ويضربوا ويشتكوا