شباب الثورة يطالبون باعتزال الحضري بعد (تنحي) مبارك

يبدو واضحا ان أية مشكلة تحدث في مباريات كرة القدم يدفع ثمنها ...(الجمهور).

والجمهور زي (المرحوم) هو دائما (غلطان).

انتوا ما سمعتوا بي حكاية الزول التلب عليهو (حرامي).

الحرامي ضرب ليك الزول كتلو.

طبعا في الحتة دي طبيعي الزول يبقي (مرحوم).

عارفين الغلطان طلع منو؟.

طلع الغلطان المرحوم ...عشان الحرامي قبل ما يضرب المرحوم ..كان مفروض المرحوم يضرب تلات تسعات.

لو ضرب تلات تسعات دا كلو ما كان حصل.

المعني.

الغلطان المرحوم يا جماعة ...الحرامي اتصرف صاح ..اي حرامي في مكان الحرامي دا بتصرف نفس التصرف.

عليه فانه في الاحداث الرياضية ومشاكلها دائما الغلطان الجمهور.

رغم ان الجمهور هو الجهة الوحيدة الممولة لكرة القدم ...ولولا الجمهور لما كان هناك دخل مباريات او رعاية او اعلان او حقوق نقل.

او أية حاجة.

يدخل المشجع للاستاد لمشاهدة المباراة بعد ان يدفع ثمن تذكرة الدخول من جيبه.

وقد يكون ثمن هذه التذكرة ... قاطعها من قروش اولادو او بسببها بدك الفطور او بنوم القوا...خاصة اذا كان الفريق الذي يشجعه هذا المشجع مغلوبا.

والمشجع لا يدفع من جيبه لمشاهدة المباراة ...بل يدفع من جيبه حتي لمتابعة الاحداث في الصحف الرياضية.

قالوا ليك في فريق تركي ...في كل مباراة بتغلب.

جمهور الفريق دا دائما بطلع زعلان ..زي جمهور المريخ.

كلهم بطلعوا بعد المباراة يتحدثوا عن (الطابق التاني).

والتحكيم الظلمنا.

وعندنا ضربة جزاء سنة 1994م الحكم ما حسبها لينا يا مامون ابوشيبة!!.

كمان عاوزين تنكروها يا ناس الهلال.

الفريق التركي دا الناس اتحيروا معاه ..اي فريق يلعب معاه يغلبو ..زي المريخ.

اخر حاجة ادارة الفريق التركي قالت تغير المدرب ..وتجيب مدرب جديد.

يمكن المشكلة تكون في المدرب.

جابو المدرب الجديد.

الفريق برضو في أي مباراة يتغلب زي المريخ.

المريخ هسع ذنبو شنو؟.

المدرب الجديد مرة دخل على مجلس الادارة ..وقال ليهم انا عرفت سبب هزائم الفريق.

طبعا في الحالة دي طبيعي مجلس الادارة يقول للمدرب السبب شنو؟.

المدرب قال ليهم السبب (مهند).

الفريق كلو بتابع في مسلسلات مهند ...عاوزين تغلبوا كيف؟.

هسع مهند ذنبو شنو؟.

المعني.

الاسبوع الثالث ..بعد مباراة القمة في الاسبوع التاني ...حسام البدري بدخل على مجلس الادارة وبقول ليهم انا عرفت سبب خسائر المريخ.

طبعا طبيعي جدا ...مجلس الادارة يقول لحسام البدري السبب شنو؟.

عارفين حسام البدري بقول ليهم شنو؟.

حسام البدري بقول ليهم عشان المجلس الاعلي للجيش ما نفذ مطالب شباب ثورة 25 يناير.

جمال الوالي طبعا زول انفعالي ...عاوز يغلب بس..بقول للبدري : اها مطالب الشباب شنو؟...اكتبها لينا في ورقة.

حسام البدري بقول ليه:

اولا : اقالة احمد شفيق وحكومته ...واختيار حكومة قومية تشرف على التعديلات الدستورية واقامة الانتخابات والاشراف عليها.

ثانيا : محاكمة كل رؤوس الفساد في الحكومة السابقة.

ثالثا : تحويل ملف الاعتداءات للمحكمة الدولية.

رابعا : اطلاق سراح كل المعتقلين.

جمال الوالي ..(مسكين)...قال لي حسام البدري ...جيب ورقة المطالب دي ...تاني عندك حاجة.

يا جمال الوالي انت قايلها (طوب).

فاكرها (سيخ).

الموضوع دا صعب ..ما بتقدر عليه.

ما تقعد تتورط ساكت.

بعدين انت مطالب الثورة لو نفذتها ..فريقك دا برضو ما بغلب.

ما عندكم حل غير (الوصافة).

عاوزين تغلبوا بي حارس عمرو اربعين سنة.

حارسكم دا لو شافوه شباب ثورة 25 يناير ...قبل (تنحي) مبارك ...بقولوا الزول دا لازم يعتزل.

بشترطوا الشيء دا من البداية.

لو ما اعتزل عصام الحضري ..نحن ما بنمشي من ميدان التحرير.

شفت لي واحد شايل ليه لافتة في ميدان التحرير بطالب فيها بي اعتزال الحضري.

الحضري دا بقي اصعب من حسني مبارك.

عمرو اربعين سنة وما عاوز يعتزل.

كنكشة شديدة.

ما علينا ...نرجع لموضوع (الجمهور).

الكل يبدو مستفيدا من كرة القدم ...مجالس الادارة او اللاعبين او الاجهزة الفنية او الاعلام الرياضي.

كلهم بستفيدوا.

أي زول بيأخذ مرتبه من ممارسته تلك.

إلا الجمهور هو الوحيد (الدافع) من جيبه وهو وحده الذي يغذي ويمول الحركة الرياضية.

وهو الذي يجعل لها طعما ويمنحها النكهة والحلاوة.

الاحداث التي بسببها تم حرمان الجمهور من مشاهدة اول مباراة للهلال يلعبها في استاده وكذلك تم حرمان جمهور المريخ من اول مباراة يلعبها المريخ في ملعبه في الموسم الجديد لم يكن السبب الاول او الرئيسي فيها (الجمهور).

الجمهور كان ضحية للاعلام الرياضي ...وضحية لعمل موجه اذ كانت بعض المجموعات تخطط وترتب لاخراج مباراة القمة بتلك التفاصيل التي انتهت عليها.

هذا الي جانب الشحن الاعلامي الذي اشرت اليه ...وهو الذي جعل الجماهير تدخل الي الاستاد وهي محملة بالعصبية.

واحسب ان حكام المباراة ايضا كانوا طرفا في تلك الاحداث اذ كان يمكن ان يلغي الحكم المباراة منذ ان بدأت تلك الهتافات ...لكن الحكم اصر على استمرار المباراة ...لتخرج اللعبة من الروح الرياضية التي كان يجب ان تميزها وتحكمها.

لذلك فان افضل قرار في مباراة القمة القادمة هو ليس ان تلعب المباراة بدون جمهور.

الافضل ان تلعب المباراة من غير (حكام).

عشان نحددها معاكم.

خاصة الحكام قاعدين ساكت بشوفوا ما يفعله الشغيل وصحبه في الملعب وبسكتوا ...ومع غضهم النظر عن هذه المشاحنات بعملوا فيها ما بسمعوا.

لا بشوفوا ...لا بسمعوا.

ونحن نتفق جميعا ان مباراة القمة الاخيرة نقطة الضعف الاولى فيها كان حكم المباراة خالد عبدالرحمن.

خالد عبدالرحمن كان شغال بتلك الموازنات...يحسب مخالفة صحيحة للهلال ...لازم بعدها يحسب مخالفة للمريخ ..حتي لو كانت هذه المخالفة وهمية.

يحسب ضربة ركنية للهلال ..بمشي يحسب ضربة ركنية للمريخ حتي لو كانت الكرة ضربة مرمي.

يطرد بلة جابر ...ينتظر سيف الدين مساوي يعمل أي شيء عشان يطردو ويبقي أي فريق بيلعب بـ (10) لاعبين.

بهذا الفهم كان خالد عبدالرحمن يدير مباراة القمة.

واظن انه من الافضل ان تكون مباراة القمة القادمة بدون (حكام).

عشان ناس الشغيل ديل يفهموا حاجة.

بالمناسبة أي مباراة فيها خصوصية الفوز فيها يكون للهلال.

اول مباراة خارج السودان ...فاز فيها الهلال.

اول مباراة قادها حكام عرب بين الهلال والمريخ فاز فيها الهلال.

اول قمة بدون جمهور سوف يكون الانتصار فيها ان شاءالله للهلال.

لا سيما وان هذه المباراة تعني الكثير للاعبي الهلال.

هم يريدون ان يحققوا انتصارا كبيرا على المريخ ليثبتوا انهم خسروا مباراة القمة الاخيرة لعوامل خارجية.

والعجب لو لعبتوا لينا المباراة دي بدون (حكام).

والله تأخدوا قدر عددكم.

اصلوا انتوا البمرقكم مننا شنو غير (الحكام).

الحكام هم البطلعوكم مننا.

حكم الراية ...من يشوف (سادومبا) برفع رايتو.

لو شاف سادومبا في (عرس) حكام الراية ديل برفعوا رايتهم.

ظاهر عليهم (التوصية).

بعدين سادومبا سريع.

شيء تشوف ..وشيء ما تشوف.

ما في شيء بتثبت سادومبا غير (الراية).

اها يا الحضري لو سادومبا دا مرقكك منو (الحكم).

بشة دا بتمرق منو كيف؟.

بشة دا بتاع القادمين من الخلف.

اسأل رمزي صالح ...بحكي ليك (الفيلم).

رمزي صالح الي الان (مودر).

قالوا ليك في قناة استضافت رمزي صالح بعد الثورة المصرية ..المذيع قال لرمزي صالح اها رأيك شنو في الثورة.

رمزي صالح قال ليهم : هدف بشة التاني (تسلل).

هدف بشة خلى يا رمزي ...هدف ديمبا كيف؟.

ملحوظة : نحن أي حاجة عندنا بي نظام.

هوامش

في واحد متأثر بالاعلام السالب.

الزول دا دخل السينما ..قام نام في الفيلم.

صحي بعد الفيلم الما عجابو دا ..قالوا ليه : اها الفيلم كيف؟.

قال ليهم : ارضية الملعب كعبة.

قلت ليكم الزول دا متأثر بي الاعلام السالب.

في واحد تاني ...عامل فيها (مفتح)..عيونو زي قفص الحمام.

قفص الحمام هسع ذنبو شنو؟.

الزول المفتح دا قاعد يتابع في الفضائيات ..بتابع في الثورة الليبية.

صاحبكم شايف الشعب الليبي دا ما قادر يتخلص من القذافي.

يفتح العربية ...يلقي القذافي مكنكش في الحكم.

يفتح الجزيرة ..يقول خلاص الزول دا هسع بسقط.

يرجع للحرة ..يلقي الموضوع لسع.

والشعب الليبي ما عارف يتخارج كيف من القذافي.

زولكم المفتح دا...قال هسع (القذافي) دا لو كان في الهلال ..كان صلاح ادريس اتخارج منو بالاعارة.

صلاح ادريس اتخارج من امولادي ..غالبو يعني يتخارج من القذافي.

القذافي دا ...كنا ولا بنتلفت معاه.

كنا بنعيروا.

لا مظاهرات ...ولا يحزنون.

واحد تاني.

قلت ليه انت عارف مباراة القمة القادمة يوم 11 مارس سوف تكون بدون جمهور.

زولكم عاين لي كدا ..وقال لي ليه؟..عاوزين يلعبوها في (ليبيا).

يا جماعة نحن ما عملنا أي حاجة.

عاوزين مع دا تلعبونا بدون جمهور.

نحن أي حاجة عندنا بدون جمهور.

اقصد نحن أي حاجة عندنا بي نظام.

واحد تاني او رابع ما عارف ...دخل فيه قلاب ..قام بعد 4 ايام يتنفض ...وهو بقول انا عارف اثار الثورة الليبية بتنعكس علينا كدا في السودان.

خبر عاجل: الحضري دا كلموه (يتدرب) على التشجيع..عشان ما بيلعب.