في الليلة (ديك)

• خلاص ...هسع يقول لينا ...(الديك)...والطابق التاني ...والتمهيدي والضل.

الواحد يغيب شهر ...ويرجع تاني للديك.

لو في واحد اكل (الديك) نيّ ...نحن ذنبنا شنو؟.

عاوزين تمسكوا لينا الموضوع.

هسع انتوا لو في واحد اكل ليه (كديسة) بنسألكم.

انتوا يا الهلالاب ما بتريحوا ليكم زول.

تتغلبوا من الاسماعيلي ...لسانكم طويل.

تتغلبوا من هلال كادوقلي ...برضو لسانكم طويل.

تتغلبوا من حي العرب لسانكم طويل.

انتوا حكايتكم شنو؟.

احكي ليكم قصة.

مرة كان عندنا مباراة صعبة ...ضد فريق صعب.

اظنكم كلكم عارفين ...انا ما عندي حاجة ما صعبة.

كان عندي مباراة موت احمر.

مباراة بطولة.

نظام نغلب نشيل الكأس.

نخسر ننزل التانية.

طبعا معادلة صعبة شديد.

عارفكم انا ما بتصدقوا.

المهم دخلنا معسكر مقفول.

مقفول شنو ...المعسكر فاتح ...البخش يخش والبطلع يطلع ...لكن في الجرايد بقولوا معسكر (مقفول).

انا ما عارف كلمة (مقفول) دي بجيبوها من وين؟.

ناس الجرايد ديل بتكلموا ساكت.

اقول ليكم حاجة ...موقف فريقنا كان صعب شديد ...عندنا سبعة لاعبين مصابين.

ملجنين عديل.

وخمسة موقوفين.

الفريق الكان عندنا معاه مباراة ...كان مشهور ...بجيب قون الفوز في الدقيقة 89.

اقوانو كلها بجيبها في الدقيقة 89.

لو لاعب مع فريق من الدرجة الثانية ...قونو بجيبوا في الدقيقة 89.

أي زول في الدنيا عارف كدا.

قبل المباراة بـ 24 ساعة ....المدرب قال للادارة ...موقفي صعب عديل.

الكشف كلو مصاب.

عندنا (باك) من الله خلقو ما اتصاب...اليوم داك اتصاب.

في اداري (مفتح) قال الموقف غير مبشر...لازم نصرف.

الاداري مشي ليه لـ (انطوان).

انطوان خطير.

خطير شديد.

الانطوان قال ليه : عندكم كم اصابة؟.

الاداري قال ليه : سبعة؟.

الانطوان دخل وطلع ...ما عرف يعمل شنو؟.

قطع ليه جك موية وقعد ..وقال للاداري ...وعندكم كم لاعب موقوف؟.

الاداري قال ليه : خمسة.

الانطوان خت ايدو في رأسو...وقال للاداري ...املكم ضعيف...موقفكم مخيف.

الاداري قال ليه : عشان كدا انا جيتك ...ما عندك أي مشكلة...اي حاجة تقولها لينا بنعملها..بس ابعدنا من (الديوك).

موضوع الديوك دا مخستك.

ابو كوة ...من سمع كلام الاداري قال ليه : جيب لي (ديك).

الانطوان اسمو (ابوكوة).

يا ابو كوة (ديك) تاني.

ابو كوة قال لي جيبو لي ديك احمر طويل ..وعلعلو اصفر وعندو رخصة قيادة.

يا ابوكوة دا نيجيبوا ليك من وين؟.

الناس ديل (اتصوعبوا) في الرخص ...نحن كان لقينا الديك الاحمر والطويل والعلعلو اصفر ...رخصة القيادة نجيبها ليه من وين؟.

ابو كوة قال دي ما مسؤليتي...عاوزين تغلبوا جيبوا لي (ديك) بالمواصفات دي.

زولكم طلع من ابوكوة وجاء راجع تاني وقال ليه : يا ابوكوة رخصة ركشة بتنفع.

ابوكوة مصّر علي رخصة القيادة.

زول صعب وكلمتو واحدة.

مشينا غطسنا ...جبنا الديك.

احمر وطويل وعلعلو (اصفر)...تقول عربة اسعاف...ورخصتو كمان رخصة عامة.

هيع.

نحن بنلعب كمان.

ابو كوة عاين للديك وعاين لينا.

نحن قلنا في سرنا ...هسع لو الزول دا قال لينا : اكلوا الديك دا نيّ ...نمشي وين نحن؟.

ابوكوة شاف الرخصة ...وفحصها...قال لينا الرخصة دي منتهية ليها اربعة ايام.

يا ود الناس مشي ...يعني عاوز تبقي لينا في الاربعة يوم دا.

ابوكوة حلف ..ما يتزحزح ...قال جددوا (الرخصة).

نجدد الرخصة ليه ...نحن داخلين بيه سبق...وإلا عاوزين نعقد ليه.

في النهاية مشينا جددنا (الرخصة) ورجعنا.

ابوكوة بعد ما شاف (الرخصة) مجددة....قال اعملوا لي (الديك) دا شوربة.

قلنا ليه وقت عاوز تعملوا من البداية (شوربة) الرخصة لزومها شنو؟.

وإلا دي (جرجرة) منك ساكت.

ابوكوة قال لينا (الرخصة) عشان امخمخ ليكم الديك دا بي مزاج ...وعشان استمتع بالشوربة.

قالوا ليكم الديك العندو (رخصة) شوربتو ما زي الديك الما عندو (رخصة).

الفرق واضح في الطعم.

يا عم روح...لو ما مستعجلين كنا غالطناك ...والله للصباح ما تمرق مننا ...لكن عندنا مباراة مهمة.

ابوكوة ضرب الديك.

شرب الشاي ...ونحن قاعدين نتفرج عليه.

قام ليك بالشوربة براه ...ونحن ماسكين الرخصة.

حالتنا تحنن.

زولكم بعد ما شرب الشاي ...قال عادتو بعد الشاي بيأخذ ليه (تكيلة).

بنوم نومة صغيرة يعني.

قال لينا كدا ...نظام ما نعمل ازعاج.

ابوكوة نام ...ونحن ماسكين الرخصة.

نعاين للرخصة سبعة ...سبعة.

تقول (الوحدات).

ابو كوة صحي ...قال جيبوا لي (الجبنة).

نظام بشرب الجبنة بعد ما يقوم من النوم.

ونحن قاعدين ماسكين (الرخصة).

الرخصة عيشتها تطير.

ابوكوة شرب الجبنة وعاين لينا كدا ..قال لينا انتوا منو ؟...عاوزين شنو؟.

قعدنا نشرح ليه من البداية.

يا ابوكوة نحن اصحاب الديك الاحمر الطويل ...العلعلو اصفر.

ابو كوة اصلو ما اتذكر حاجة.

يا ابوكوة (الشروبة) الشربتها هسع نسيتها.

اصلو ما اتذكر.

يا ابوكوة ...(الديك) حقنا نسيتو.

ابوكوة قال لينا ديك شنو؟.

قلنا ليه ديك الشغل.

شغل شنو؟.

شغل المباراة يا ابو كوة.

مباراة شنو؟.

انت نسيت أي حاجة ...انت هسع دي موش اكلت ليك ديك ونحن قاعدين قدامك.

دييييك.

ايوة ديك ...وكمان دي رخصتو؟.

رخصة شنو؟.

رخصة الديك.

انا الديك دا اكلتو في رمضان عشان تجيبوا لي رخصتو.

يا جماعة اتكلموا ليكم كلام بتعقل.

قولوا ليكم حاجة تتعقل.

يا جماعة ...نحن بنقول الحق ...الكلام دا هسع حصل ...ودا كمان (ريش) الديك.

ابو كوة قال لينا (ريش) الديك انا بعمل بيه شنو؟.

نحن قاعدين نتغالط كدا ...دخل علينا زول ...واضح عليه بفهم.

زول قريب ابو كوة.

الزول قال لينا الحاصل شنو؟.

حكينا ليه الموضوع من الالف للرخصة.

الزول اتفهم الحاصل ...وقال لينا معليش يا جماعة ...انتوا ما عارفين ابو كوة وقت ينوم بصحي ماسح أي شيء.

طيب والحل شنو؟.

الحل تبدأوا مع ابوكوة من جديد ..علي انكم اول مرة يشوفكم.

قلنا للزول ما مشكلة ...بس تاني ما يقول لينا : جيبوا لي (ديك).

نحن (الديوك) دي فترنا منها.

واعلام الهلال واقف لينا في رقبتنا.

المهم قعدنا مع ابو كوة وحكينا ليه الحاصل من البداية..قلنا ليه نحن عندنا سبع اصابات وعندنا خمسة لاعبين موقوفين.

ابو كوة تاني قال لينا : موقفكم صعب شديد.

يا ابو كوة نحن عارفين ..ولو ما صعب ما كنا بنجيك هنا.

ابو كوة قال لينا جيبوا لي (ديك).

ديك تاني يا ابو كوة.

قال لينا الديك ضروري شديد...انا ما بعرف اشتغل بدون (ديك).

يا ود الناس انت (الشوربة) دي ما بتشبع منها.

بقينا نعاين لي ابوكوة سبعة ..سبعة.

ابو كوة قال لينا جيبوا لي (ديك) احمر وطويل ..وعلعلو اصفر وعندو سنون.

قلنا ليه اخير الرخصة ..نحن نجيب ليك ديك عندو (سنون) من وين؟.

نتقطع نحن.

قال لينا دا ما شغلي ..لو عاوزين تغلبوا جيبوا لي (ديك) بي سنونو.

انا قلت للزول المعاي ...اكيد الديك العندو (سنون) بتكون شوربتو طاعمة اكتر من الديك البدون سنون ...زي الديك العندو رخصة قيادة.

المهم قعدنا نفتش عن الديك ..حسب مواصفات ابو كوة.

طبعا ما لقينا ديك عندو سنون.

قنعنا من الموضوع ...قلنا ما مشكلة ...نتغلب ..نتغلب ..ديك بي سنون نحن نجيبو ليكم من وين؟.

لكن في واحد مننا كان (مفتح) قال لينا شوفوا ليكم ديك احمر وطويل وعلعلو اصفر وركبوا ليه طقم اسنان.

سمعنا كلام الزول دا وجري علي طبيب اسنان.

عملنا الطقم وركبناه للديك.

الديك ما صدق....قشر علي (جداد) الحلة.

شلنا الديك وجري علي ابو كوة.

ابو كوة عاين للديك كدا ...ونزل وطلع ...وقال لينا (الطقم) دا مركب.

قلنا ليه ما اصلو مركب يعني ح نجيب ليك ديك بي اسنانو من وين؟.

ابوكوة قال لينا دا بضعف الشغل.

شوية كدا ...ركب ليك ابوكوة (الحلة).

عرفنا ليك الموضوع فيه (شوربة).

بقينا نعاين للديك تسعة ...تسعة.

عليك الله انت يا ابوكوة وقت عاوز تعملوا (شوربة) ...طقم الاسنان دا لزومو شنو؟.

ابوكوة ضرب ليك الديك وشرب الشوربة.

ونحن قاعدين نتفرج.

ابو كوة جابو ليه الشاي.

ونحن قاعدين نتفرج.

صاحبكم طبعا بعد (الشاي) بيأخذ ليه (نومة).

ولو نام بمسح أي حاجة.

عشان بندقس ليك تاني يا ابوكوة.

قبل ما ينوم ثبتنا قلنا ليه : اسمع يا اخوي ...احسم لينا موضوعنا دا في الاول.

ابوكوة قال لينا : لكن انا بعد (الشاي) بنوم.

قلنا ليه : دا كان زمان ..عاوز تنوم بي حقنا.

ابوكوة شاف (الضغط) عليه...قال لينا انا بشتغل ليكم المباراة للدقيقة 89 فقط.

الدقيقة 90 والزمن بدل الضايع ما عندو بيهو قضية.

رجعنا للمدرب وقلنا ليه ابوكوة قال بشتغل المباراة للدقيقة 89.

المدرب قال لينا بي حالة فريقي دا ...لو المباراة وصلت للدقيقة 89 وما جا فينا قون ...تاني ما بجي.

قلنا لي ابوكوة اشتغل.

ابوكوة اشتغل.

رجعنا ...لعبنا المباراة للدقيقة 89 ما في أي هجمة شكلت علينا خطورة.

الدقيقة 90 المدافع شايت ليه كورة من النص ...جات فينا قون عالمي.

الحكم رفع الزمن البدل الضائع 5 دقائق.

في الخمسة دقائق جابوا فينا خمسة اقوان.

المباراة انتهت 6-صفر.

نزلنا التانية طوالي.

مشينا لي ابوكوة قلنا ليه اتغلبنا 6-صفر.

ابو كوة قال لينا : انا ما قلت ليكم (طقم الاسنان) بتاع الديك تركيب.

تعرفوا انتوا غلبكم (طقم الاسنان) ما غلبكم حارسكم.

ملحوظة: غايتو ابوكوة دا طلع أي كلام.

هوامش

يوم الخميس ناس المريخ سوف يغنوا (في الليلة ديك).

غدا الذكري الثانية لرحيل الفنان عثمان حسين.

ان شاءالله في الغد نتحدث عن عثمان حسين.

بعد مباراة الخميس محمد كمال سوف يشكو من (الحصوة).

دي حاجة أسألوني منها.

سعر الديك في السوق بقي 20 دولار.

عارفين السبب شنو في ارتفاع اسعار الديوك.

اكيد كلكم عارفين.

خبر عاجل: وفي الليلة ديييييييييييييييييييييييييييييييك.