حسام البدري (هدية) اخرى من الوالي للهلال

< الكثيرون يحاولوا ان يهدوا الهلال وان يزعزعوا استقراره ويهدموا بنيانه ...لكن دائما يفشلون في اهدافهم وتنقلب السهام عليهم فتردهم لوصافة مطلقة.

< ما تعرض له الهلال في السنوات الاخيرة ..لو تعرض له لـ (ريال مدريد) كان سوف يكون الفريق الملكي بلعب معانا في ميدان عقرب.

< وكان رونالدو فهم حاجة ...يمين الله ..قدر ما يضربو ما في حكم بحسب ليه حاجة.

< المباراة يكون فيها ضرب ..موت ..وما فيها كرت اصفر.

< كرت اصفر واحد ما فيها.

< زي الزول البخش ليه في شارع غلط.

< فجأة كدا يلقي نفسو قدام (طابونة).

< يقوم يقول بدل ما ارجع ساكت ...احسن اشيل لي (رغيف).

< الرغيف ان شاءالله (اقرضو).

< هسع (الرغيف) ذنبو شنو؟.

< قالوا ليك واحد مشي ليه لي (طابونة) الساعة اربعة صباحا.

< زولكم اتمدد وقال لي بتاع الطابونة : اسمع في رغيف.

< بتاع الطابونة قال ليه : ابدا في (تحويل رصيد).

< المهم.

< الهلال دا كلو ما يحاولوا يكسروه بمشي لي قدام.

< ولا بنقيف.

< نحن بقينا وقت نشوف لينا عقبة وإلا زول بحاول يكسر في الهلال بنفرح.

< عشان الهلال في (العقبات) بمشي لي قدام.

< ولا بنقيف.

< البوقفنا شنو في (البرد) دا.

< في 8 سنوات ...جمال الوالي شال الممتاز مرة واحدة.

< الجماعة ديل بيلعبوا في الممتاز ..بالمريخ وجزيرة الفيل والنيل الحصاحيصا واهلى الخرطوم وحي العرب بورتسودان والاهلي مدني والاتحاد ...مع دا كلو شالوا الممتاز مرة واحدة.

< انتوا ما بتخجلوا.

< 8 سنوات ..فازوا بالممتاز مرة واحدة.

< ونهواه في كل الظروف.

< والله ظروفكم كعبة.

< كعبة شديد.

< حالتكم صعبة.

< دي زي الزول الموهوم البمشي للدكتور ...ويقول ليه : يا دكتور انا عندي شنو؟.

< الدكتور يقول ليه : يا زول انت ما عندك أي حاجة.

< زولكم يقول للدكتور ..لكن (ما عندك حاجة) دي نفس المرض المات بيهو جارنا.

< وهم بس.

< وهم ساكت.

< الموسم الماضي...ناس المريخ ديل دخلوا الممتاز بي فهم جديد.

< نظرية حديثة.

< ما في زول سبقهم فيها.

< الجماعة كانوا عاوزين يقلبوا الدوري (تونسي).

< جابوا ليهم (جواسيس).

< من الساعة اربعة تلقاهم حايمين جوار استاد الهلال.

< ونحن ما فاهمين حاجة.

< فاكرين الموضوع عادى.

< قلنا ما فيها شيء.

< شابكين التوانسة ..(اتفضلوا)..اتفضلوا ...وهم بتجسسوا علينا.

< ونحن بي طيب خاطر ..نشيل ونعزم.

< جابوا ليهم ربع دستة توانسة.

< في واحد كدا اسمو مهدى بن ضيف الله منحوه الجنسية قبل الكشف الطبي.

< الجنسية عندهم بتطلع قبل الطلب.

< دي سمعتوا بيها قبل كدا.

< ما في زول بسمع بي الحاجات دي ...انا عارفها.

< جنسية قبل الطلب.

< دي زي الزول البمشي يقعد ليه في مطعم فول.

< مطعم ما فيه حاجة غير الفول.

< يقوم الجرسون قبل الزول ما يقعد يجيب ليه طلب الفول.

< الزول يزعل يقول ليه : يا ود الناس يمكن انا ما عاوز فول ..يمكن عاوز سمك.

< سمك يجيبوا ليك من وين؟..قلنا ليك المطعم دا ما فيه شيء غير (الفول).

< يعني أي زول بقعد فيه بياكل فول.

< ما في زول بيقشر على التاني.

< كلهم سواسية في (الفول).

< البتفلهم شديد ..بزيد الطعمية.

< والله فهم.

< ما علينا.

< المريخ الموسم الفات قلت ليكم كتر (التوانسة).

< توانسة ساكت.

< خالد عبدالرحمن في مباراة القمة الاخيرة ..قالوا ليك شغال (برشا ..برشا ..برشا) من الدقيقة الخامسة.

< قالوا ليك السوق الشعبي ام درمان بقي كلو (توانسة).

< في واحد قال السوق دا فيه شنو؟..عشان التوانسة ديل يقعدوا يتجسسوا فيه كدا.

< يا ربي (السوق الشعبي) لاعب ضد الصفاقصي.

< قالوا ليك واحد كدا قام الصباح ...قطع ليه (جك ليمون) ولبس نضارتو وطلع.

< دي فيها حاجة.

< هو قاطع الشارع كدا ...دهسو ليك (قندران).

< جك الليمون زي ما هو (اندلق) في شارع الزلط.

< شفتوا (اندلق) دي كيف.

< اندلق يندلق اندلاقا.

< عشان ما فيكم واحد يقعد يغالط ساكت.

< الجماعة اتلموا ..يا حاج خير ..ان شاءالله ما جاتك عوجة.

< عمك قام يتنفض ..قال ليهم انا ما جاتني عوجة ..بس ان شاءالله (النضارة) ما تكون اتكسرت.

< جك الليمون قنع منو.

< ما علينا.

< ناس المريخ ديل 8 سنوات ..ما شافوا كأس الممتاز غير مرة واحدة.

< مرة واحدة بواسطة لجنة الحكام.

< والله ناس المريخ (المغصة) كاتلاهم.

< الاتحاد معاهم.

< ولجنة التحكيم.

< وجزيرة الفيل والنيل الحصاحيصا والاهلي (مدني والخرطوم) ..و..الخ.

< وبرضو شالوا كأس الممتاز مرة واحدة.

< لو كنتوا بتشجعوا (جزيرة الفيل) كان بطنكم بردت شوية.

< كان يكون عندكم شوية (منطق).

< في واحد قال لي ود عمتو ..انت تعال هنا (المنطق) دا شنو؟.

< ود العمة قطع ليه (جك ليمون) وقال ليه : افتكر المنطق دا حاجة بمسحوا بيها (البطيخة) قبل ما يبيعوها.

< هسع البطيخ ذنبو شنو؟.

< ود العمة ..قال احسن اشرع شوية.

< اصلو نحن في البلد دي أي زول بلاقي ليه زول بقعد معاه في اقرب ضل ويقعد يشرع ليه.

< ود العمة قال ليه ...المنطق دا يعني تلقي ليك روسي في شارع ضيق.

< تقوم تسلم عليه بي الروسي.

< دا منتهي المنطق.

< لو سلمت عليه بالعربي ..يبقي ما عندك منطق.

< زولكم قطع ليه جك ليمون وقال لي ود العمة ...عشان كدا في روسي كل ما القي راكب ليه عجلة ..بقعد يعاين لي كدا.

< اظنو بقول في نفسو ..(الزول دا ما عندو منطق).

< هسع المنطق دا خلي..حسام البدري دا قصتو شنو؟.

< تمسك في الشيء ..تكرهنا فيها ..زي قالب الحلو البقلبو في صينية البصل.

< الحلو يبقي ريحتو بصل ..بصل.

< البصل خلى هسع دي.

< حسام البدري دا افتكر اكبر هدية يقدمها جمال الوالي للهلال.

< جمال الوالي والله ما قصر معانا.

< دي خدمة خمس نجوم.

< عشان كدا نحن فرحنا وقت جمال رجع.

< التنحي براه ضيع مننا كأس السودان.

< دا تنحي ساكت.

< حسام البدري في المريخ.

< خلاص اهلي شندي دربو مرق.

< دربو طلع.

< خلوا ناس الاهلي شندي من هسع يفكروا في (الوصافة).

< السنة القادمة الاهلي شندي سوف يمثل السودان في بطولة الاندية الافريقية للابطال.

< فريق من اول سنة يشارك في الممتاز يمثل السودان.

< دي ما بعملوها إلا ناس شندي.

< هيع.

< قالوا ليك شندي نصها جعليين ..ونصها التاني نيجيرين.

< مالك ..فرانسيس.

< دا غير البيلعبوا في الاهلي من الموسم الماضي.

< وارغو قالوا مشي (ليبيا) كوبري لي (شندي).

< هيع.

< ناس المريخ ديل جابوا ليهم (مدرب)...فريق (النسور) بكون بسببه بقي يفكر في (الوصافة).

< مدرب ..يطمع أي فريق في الوصافة.

< دي خدمة تانية قدمها جمال الوالي للنسور.

< النسور ذاتهم ما قصر معاهم.

< قلت ليكم ناس (النسور) ذاتو الموضوع عجبهم وقعدوا يفكروا في (الوصافة).

< والله يا جمال الوالي حسام البدري دا (طابقكم التاني) يجهجهو ليكم.

< بطلعوا ليكم شمار في مرقة.

< امسكوا في (الطابق التاني)...الموسم الجديد ..الظروف ما معروفة.

< والله انتوا لو ما (نهواه في كل الظروف) كان رحتوا فيها.

< اقول ليكم حاجة امسكوا في ( نهواه في كل الظروف) عشان السنة القادمة ما بتطلعوا بي حاجة اكتر منها.

< البركة في (الطابق التاني).

< ونهواه في كل الظروف.

< حسام البدري دا قالوا ليك اول ما وصل الخرطوم ..الوالي قال لي ابوجريشة وديهو جرى على (الطابق التاني)..اصلو ما عندنا كورة.

< فرجوا في الطابق التاني.

< العجب ما ظاهر في الصورة.

< حسام البدري مشي على استاد المريخ..كل ما يشوف ليه (سيخة) يقعد يكتب في النوتة.

< ويقول جميل.

< يشوف ليه (طوب) ..ابوجريشة يقول ليه : والله الطوب دا فيه حلاة (كورنر).

< وحسام يسجل.

< ببدل في الخطة.

< البدري يلقي ليه (قوز رملة)...يقول ليك تمام ..تمام ..المريخ عندو (البنية التحتية) جيدة.

< لكن بعد (البنية التحتية) يا حسام البدري ما في حاجة.

< بنية تحتية قاعدة ساكت.

< ديل ما عندهم حاجة غير البنية التحتية.

< ما في شيء غير (نهواه في كل الظروف).

< 8 سنوات ..نهواه في كل الظروف.

< مع جمال الوالي ليكم حق تقولوا نهواه في كل (الظروف).

< انتوا بتحبوا (الظروف)..ما بتحبوا (المريخ).

< عشان الموضوع يكون بالنسبة ليكم واضح.

< قالوا ليك حسام البدري العقد الوقع فيه مكتوب فيه (نهواه في كل الظروف).

< في الترويسة فوق.

< حسام البدري قال ليهم (نهواه في كل الظروف ) دي شنو؟...دي خطة جديدة.

< نظرية حديثة.

< برضو احسن الواحد يفهم.

< ابوجريشة قال ليه ...ما تسأل كتير ...الجملة دي بتعرفها وقت نقابل الهلال.

< أي حاجة بي وقتها.

< اليوم التاني من مباراة القمة خطوط صحف المريخ كلها سوف تكون (نهواه في كل الظروف).

< والاعمدة الما بتحتجب لظروف فنية بكتبوا تحت (نهواه في كل الظروف).

< حسام البدري قال لي ابوجريشة ...جميل ..جميل ..انا يا دوب فهمت ليه بتركزوا على السيخ والاسمنت.

< البدري نقش ليكم الموضوع ما فيه فايدة ..عشان كدا رفع السعر.

< قال ناس (نهواه في كل الظروف) ديل دايشين...احسن نطلع منهم بي حاجة سمينة.

< وزولكم مفتح بقي كل ما يلاقي ليه زول في المريخ يقول ليه : (نهواه في كل الظروف).

< حسام البدري اتقدم شوية في استاد المريخ ..ما شاف ليه أي (كورة).

< البدري قال حاجة عجيبة ..الجماعة ديل عندهم 6 صحف رياضية عشان شنو؟.

< عشان تتكلم في (الطوب) دا.

< 6 صحف على شنو؟.

< 6 صحف تتغزل في الاسمنت والسيخ.

< كورة ما في ..يعني ح يتكلموا عن شنو؟.

< البدري قعد اليوم الاول ...الجماعة كلهم بفرجوا فيه في الاستاد.

< دي الغرفة.

< دي الصالة.

< يا جماعة انتوا فاكرين حسام البدري دا جاكم من (الصحراء الكبرى)..عشان تقعدوا تفرجوا فيه في (الغرف).

< الغرف هو شبعان منها.

< الانجازات ..البطولات ..التاريخ ...كلو في الاستاد دا.

< ما عندهم حاجة غير (الطابق التاني).

< البدري اليوم التاني عاوز يرجع القاهرة ..وما في أي زول جاب ليه سيرة (الكورة).

< عملوها ليه كلها فرجة في الاستاد.

< استاد بس.

< ما بقدروا يوروه (وصافات) الممتاز دي.

< كل ما يسألهم من الكورة يسوقهو للطابق التاني.

< اخر حاجة البدري قال احسن يسأل.

< البدري قال لي ابو جريشة ...انتوا ما عندكم (مهاجم) خطير كدا ..لاعب يتكلو عليه.

< لاعب قايد كدا زي (هيثم مصطفي) حفظه الله ورعاه.

< عشان (الطابق التاني) دا مرات بكون بعيد من الفورمة.

< ابوجريشة طلع ليه من الجزلان صورة.

< صورة زول كبير.

< البدري قال ليه : دا شنو؟.

< دا حكم يا حسام.

< نحن طول ما في ناس خالد عبدالرحمن دا ..ما بتجينا عوجة.

< عشان كدا ركز لينا في (الطابق التاني).

< لذلك انا عندي فكرة.

< فكرة عجيبة.

< حسام البدري دا ..قالوا عاوز يجيب ليه مساعد مدرب مصري.

< وعاوز يجيب ليه مدير كورة مصري.

< ومدرب حراس برضو مصري.

< يعني كنبة المريخ تاني ح تبقي زي (ليالي الحلمية).

< كلها مصرين.

< زي شارع المطار.

< حسام البدري دا مع المساعد والمدير ومدرب الحراس كلموه يجيب ليه (نقاش) مصري.

< نقاش لي شنو كمان؟.

< نقاش للطابق التاني.

< نحن أي حاجة عندنا بي نظام.

< نحن ما عندنا حاجة ساكت.

< نحن بنلعبها صاح.

< الموسم الماضي ...فريق المريخ كان كلو (توانسة).

< السنة دي ببقي كلو (مصريين).

< جامعة الدول العربية تقصر.

< شيء تونسي.

< وشيء مصري.

< وشيء فلسطيني.

< وشيء يمني.

< تذكروا على النونو.

< النونو الي الان بيلعب في منتخب اليمين.

< لاعب من زمن الريح كاريكا.

< حسام البدري دا لقي (التكية) دي بقي كل مرة يقول ليهم انا عاوز اجيب لي زول من مصر.

< الحكاية اول حاجة بدأت بي مدرب حراس مصري.

< ثم قال ليهم عاوز لاعبين من مصر.

< عاوز الحضري.

< شوية..شوية.

< تاني قال ليهم : عاوز لي مساعد مدرب مصري.

< شوية كدا قال ليهم عاوز لي مدير كورة مصري.

< ناس جمال ابوعنجة راحوا فيها.

< والله يا جمال الوالي تتابعوا حسام البدري دا يقول ليكم عاوز لي (جمهور) مصري.

< الجمهور الصفوة ..البجدع ويفلع ويشتم دا ما بنفع معاي.

< واي مشجع مصري يجيكم ..عاوز الشيء الفلاني.

< ما في مشجع مصري بجيكم اقل من 3 الف دولار.

< البدري بقنع ليكم الوالي بالنظرية دي.

< الوالي اصلو أي نظرية بتقنعوا.

< انا عارف حسام البدري بقول لي جمال الوالي المشكلة في (الجمهور).

< غيرتوا الادارة ..واتنحيت ما نفع.

< غيرتوا الاجهزة الفنية ..ما نفع.

< غيرتوا اللاعبين ..ما نفع.

< ما فاضل ليكم إلا تغيروا (الجمهور).

< اشطبوا الجمهور وجيبوا ليكم جمهور جديد.

< يمكن الاوضاع تصلح شوية.

< لكن انا ما بتفق مع حسام البدري في الحتة دي.

< انا شايف مشكلة المريخ في (الاعلام السالب).

< اعلام يغالطك في عيونك.

< الشمس دي ..بغالط فيها.

< السنة كلها تغالطوا.

< نرجع ونقول ان حسام البدري لن يضيف أي شيء للمريخ.

< ما بضيف الحبة.

< غايتو إلا تكونوا عاوزين ليكم شوية كلام في القنوات المصرية.

< احسن جيبوا حسام البدري.

< عشان تاني كل ما نغلب المريخ ..الفضائيات المصرية تتحدث عن هزيمة الوصيف.

< سوف تكون نهاية حسام البدري مع المريخ نهاية ماسوية ..مثل نهاية رمزي صالح.

< رمزي صالح هسع ذنبو شنو.

< رمزي صالح يتقطع يعني.

< يعمل شنو زولكم مركز في (فييرا) طلع ليه ديمبا.

< ديمبا دا ما بستوعبوا ليكم.

< ما بكون درسوها ليه.

< طيب انت عامل فيها (فدائي) في شنو؟.

< فدائي في خور ابوعنجة.

< فدائي في شنو بس.

< حسام البدري ..نهايتو زي رمزي.

< تذكروا كلامي هذا.

< حسام البدري الذي قضي الكثير من السنوات مع الاهلي المصري لم يكن له أي دور ..وبعد رحيل جوزية واجهت البدري الكثير من الصعاب.

< الزول دا دمر الاهلي.

< الاهلي المصري الان في المركز التاسع.

< ولو الجماهير ما ثارت ..كان الاهلي ممكن ينزل.

< لكن الادارة لحقت الفريق.

< اقالوه من بدري.

< ود البدري شالوه بدري.

< كان البدري مرفوض ادرايا من محمود الخطيب...مثلما هو مرفوض الان في المريخ من محمد جعفر قريش.

< وكان البدري مرفوض جماهيريا حيث كانت جماهير الاهلي تهتف ضده بعد المستوى الضعيف الذي وصل له الاهلي.

< والبدري في المريخ الان لا يحظي بي أي مساندة جماهيرية.

< وكان البدري مرفوض اعلاميا.

< الاخطر من ذلك ان حسام البدري كان مرفوض من قبل لاعبي الاهلي انفسهم.

< وقد صرح الخلوق ابوتريكة بعد رحيل البدري من الاهلي تصريحات تحسب على حسام البدري.

< وكانت هناك خلافات وصراعات حادة بين البدري واحمد حسن كابتن المنتخب المصري.

< وخلافات سابقة بين البدري وامير عبدالحميد.

< هذا هو البدري بكل هذا الرفض جاء للمريخ.

< لقي جماعتي ديل ...الزول لو جاهم من الصومال وقال ليهم انا مدرب ايطالي بصدقوا.

< طوالي بكبوا ليه (الدولار).

< حسام مدرب يمكن ان نقول عنه انه المدرب المرفوض.

< طول فترة حسام البدري مع الاهلي سواء كان هذا في الفترة التي كان فيها مساعد مدرب او في الفترة التي تلت فترة جوزية واصبح بعده مدرب .. طوال هذه الفترة لم نشاهد حسام البدري (مبتسما).

< السنة كلها مكشر.

< هذا يعكس عصبية حسام البدري وجموده ..ويؤكد انه مدرب حاد..وهذه النوعية لا تنفع في المريخ.

< ليست هناك مقارنة بين حسام البدري وكروجر ..وسوف يدفع المريخ ثمن هذا الخطأ قريبا.

< اننا نقول لجمال الوالي مرة اخرى شكرا على هذه الهدية التي قدمتها للهلال.

< انتظروا الموسم القادم ...حسام البدري سوف يفهم حاجة من ناس (بلة جابر).

< هل سوف يستمر حسام البدري حتي الاسبوع الخامس من الدوري الممتاز.

< لا اعتقد ان يستمر حسام البدري 3 اسابيع في المريخ.

< البدري لن ينفع المريخ.

< لن ينفعه.

< ملحوظة: (نهواه في كل الظروف) ح تكتر في الموسم الجديد.

هوامش

< من الاسبوع الاول ح تظهر حكاية (نهواه في كل الظروف).

< ركزوا معاي في الجملة دي.

< دي الفرمالة.

< الاهلي شندي سجل المحترف مالك وجعفر بركية.

< الخرطوم رغم من انه في الموسم القادم سوف يشارك في الكونفدرالية إلا انه فقد فرانسيس ومالك ..وهما افضل نجوم الخرطوم.

< عشان يا نقة تفهم حاجة.

< عشان نجم الدين مشي المريخ.

< بالمناسبة الحمدلله انو نجم الدين مشي المريخ.

< طبعا في الموسم الماضي فريق الخرطوم نط من كلمته مع الهلال ..وباع نجم الدين للمريخ وهو في غرفة الهلال.

< صلاح ادريس ما بخلي حقو...قبل ليك السنة دي على ناس الخرطوم.

< هلال الساحل اصبح مخزن للمريخ.

< أي نجم في هلال الساحل يقدمه للمريخ.

< انتوا (هلال) على شنو؟.

< قلق والصيني ..كان هلال الساحل قد قدمهم للمريخ.

< وقبلهم الجاغوم.

< والان يريد هلال الساحل ان يقدم يس للمريخ.

< يلا ما علينا.

< عشان تعرفوا نحن ما عندنا فريق.

< فرقنا هي البتعاكسنا.

< هلال كادوقلي هزم الهلال.

< وهلال الساحل اصاب لاعبه احمد سعد كابتن الهلال هيثم مصطفي حفظه الله ورعاه.

< والان هلال الساحل كما كان في الماضي يقدم نجومه للمريخ.

< هل سوف يلعب عصام الحضري في السودان بعد ان وصل لسن الاربعين.

< حارس مرمي في سن رئيس النادي.

< المضحك ما سوف يدفعه المريخ مقابل هذه الصفقة.

< المريخ سوف يدفع للزمالك ويدفع للاهلي المصري ويدفع لاللاعب.

< دا لاعب وإلا (صرفة).

< دا صندوق عديل.

< مصر كلها سوف تستفيد من هذه الصفقة.

< نتمني ان تكلل هذه الصفقة بالنجاح.

< التسجيلات باقي ليها 10 ايام.

< عشان ناس لجنة التسير يكونوا عارفين.

< الي الان لم افهم جدوى تصريحات ميشو عن مهند الطاهر وسادومبا.

< ما قدرت افهم الحتة دي.

< كيف يريد مجلس ادارة نادي الهلال ان يسوق مهند وسادومبا بعد التصريحات (السالبة) التي قالها ميشو في حق مهند وسادومبا.

< دعوني اقول انها (اغبأ) تصريحات تخرج في الفترة الاخيرة.

< ترصيحات (غبية) جدا.

< هنو قالوا الي الان طالع في (التربيزة)..خايف من الشطب.

< يا زول انزل ..ما في زول بشطبك.

< مع سعادتنا بوجود شندي في الممتاز ..حزنا لخروج كسلا.

< الدوري الممتاز يحتاج الي كسلا الخضراء في الدوري الممتاز.

< عاوز اسأل سؤال.

< هل سوف يسافر حسام البدري الي شندي لمواجهة الاهلي هناك.

< معقولة البدري يقدر على هذه المشقة.

< ناس شندي ديل في (الحفلات) عندهم (جلد).

< في الكورة كيف.

< ديل العريس ما برحموا.

< انتوا بتتكلموا كيف؟.

< حسام البدري تبقي عليه عطبرة وشندي.

< ولاية نهر النيل بقت مولعة نار.

< ما في فريق بشيل ليه نقطة من ولاية نهر النيل.

< الوسط الرياضي بما فيه من اشياء غير حميدة يحتاج الي الشيخ محمد خير.

< من اسباب تألق هيثم مصطفي وتفوقه هو وجود الشيخ محمد خير معه.

< هذا الوسط يحتاج الي هذا النور.

< سوف يعود هيثم مصطفي اكثر تألقا.

< البرنس راجع بدوافع اكبر.

< والثمن سوف تدفعوه في الميدان.

< الحساب كتر عليكم.

< زيكو شال الكورة عشان (ضربة جزاء) صحيحة.

< هيثم مصطفي رغم الذي تعرض له ..اكمل المباراة ...والتزم سلوكيا بادب الهلال.

< الفرق كبير.

< اتير توماس وعبده جابر اضافة قوية للهلال.

< طبعا عودة حمودة بشير سوف تجعل اطراف الهلال تشتعل.

< عبده جابر شال رقم فانلة (طارق مختار).

< سجل النمر.

< عشان تبقوا عارفين.

< نحن أي حاجة عندنا بي نظام.

< خبر عاجل: يا حسام البدري ..خليك ماسك في (نهواه في كل الظروف) بتمرقك.