رادان و افياني و محسن

[right]ناس الهلال ديل (كرهونا)... ما خلوا لينا اي حاجة عشان نتميز بيها... (دي مريخابي بتكلم بينه وبين ضلو).. السنة دي المريخ ما عندو غير سيكافا.
* سيكافا لو الهلال شارك فيها ... ما بلقي المريخ منها شيء غير (الوصافة).
* وصافة سيكافا طعمها ملح ..ملح.
* الهلال دا مجلسه ما شرعي مع ذلك بتعاقد مع مدرب ريال مدريد.
* دي مشاكل شنو الوقعنا فيها دي.
* انا اول مرة اشوف لي مجلس بالطريقة دي.
* الحاجة البتحيرنا (المجلس) بامر المحكمة غير شرعي .. مع هذا اليوم والتاني المجلس بتم في الصفقات.
* صلاح ادريس دا الهلالاب ... واقفين ليه (الف حمراء)... والاقطاب يشيلوا ويطعنوا في قانونية المجلس.. الكاردينال دا ..خلي قودوين وقبل علي صلاح ادريس.
* الصحافة تهاجم فيه ... الجمهور يهاجم فيه .. وشداد يهاجم فيه .. والمحكمة تقول ان مجلسه غير شرعي.
* مع ذلك هو متمسك بالهلال ..اي رحلة بقود البعثة صلاح ادريس ... اي لجنة هو رئيسها.. شفتوا الفرق.. جمال الوالي في المريخ ... الاعلام يتغزل فيه .. والجمهور يشيل ويصفق ليه .. والدولة معاه ما بتقصر.
* مصطفي عثمان اسماعيل ... سافر مع المريخ حتي يوغندا.
* وعشر شركات وهمية تدعم وترعي في مؤتمرات المريخ الوهمية ... مع ذلك جمال الوالي كل فترة والتانية يهدد بتقديم استقالتو.
* وناس المريخ من يسمعوا سيرة الاستقالة .. بكبوا الجرسة.
* يشيلوا ويحنسوا.. يا الوالي لا ... واصلو ما ممكن ... ومستحيل... (وتفارق كيف) .. وننساك ..انت انت بتتنسي.
* انا ما عارف العاجبكم في (وصافة) الزول دا شنو؟.
* وارغو جابوه بي خمسة مليون دولار ... ائمة المساجد المبلغ دا انتقدوه... نحن خلونا.
* تفتكروا بعد دا عاوزين وارغو ينجح.
* زول جاب ليه هدفين في كل البطولات التي شارك فيها.
* اتذكرت عنده هدف في (الشجرة).
* الشجرة تعمل ليكم شنو؟... تتقطع ليكم.
* والله حاجة بالجد كدا تحير ... مجلس غير شرعي ويتعاقد مع مدرب ريال مدريد السابق.
* مدرب كان المدرب العام لريال مدريد ... دي ما بتفهموها لينا هسع.
* نحن عارفين ... الموضوع دا عاوز ليه ستة شهور عشان تستوعبوه لينا.
* عاوزين ليكم سنة ... عشان تقعدوا تناقشونا في الموضوع دا.
* قالوا ناس المريخ ... المدرب دا ..عمل ليهم (قلق) ... قالوا فتحوا خط ساخن مع (لقاط) الكور بتاع برشلونة.
* عاوزين ليهم اي حاجة من برشلونة ... ان شاءالله (غفير) النادي.
* جمال الوالي مرة مشي اتصور مع رئيس نادي برشلونة ... اعلام المريخ سنة مدور في الموضوع دا.
* صورة ساكت خلعتهم.. اها نوع ديل عاوزين يستوعبوا لينا حكاية المدرب دا كيف؟.
* تتخيلوا المدرب دا يصل البلد ... ويمسك الهلال ..اول مرة مباراة يلعبها الهلال ... يطلع لينا مدرب وطني.... يقول شنو يقول عاوز يحلل مباريات الهلال.
* لا معليش يا كابتن ..الموضوع دا ... كبير عليك .. معقولة عاوز تحلل لي كامبوس.
* اقعدوا اتفرجوا ساكت.
* الهلال قالوا جايب ليه مدرب .. في الخمس دقائق ببدل الخطة.. عشر مرات.
* بختك يا مهند .. تاني الهوبة تقلبها اربع مرات في المباراة.
* انتوا يا ناس الهلال ما تتفاصحوا ساكت ... هسع يقولوا ليك المدرب غير رأيه.
* ناس الهلال ديل ما مضمونين .. اسألوني منهم انا.
* خلاص عاوز تقلب علي الهلال.
* ارجع ليكم واقيف ليكم في الحتة دي .. عشان هي حتة مهمة خالص.
* تصوروا مجلس الهلال غير شرعي ومطعون فيه ... مع ذلك تعاقد مع مدرب كلف النادي مليون دولار.
* يعني لو كان شرعي ... كان عمل شنو؟... كان اتعاقد مع الجهاز الفني كلو بتاع ريال مدريد..احتمال يجيبوا مجلس ادارة ريال مدريد ويمسكوه قطاع الناشئين في الهلال.
* وتصوروا مجلس الهلال غير الشرعي دا ... تعاقد مع شركة بلجيكية للسور.
* الضحايا مع (السور) دا تاني ما عندهم اي مفر من الهروب.
* المقبرة عملوا ليها سور.
* ناس المريخ قالوا عاوزين (السور) القديم ... اتاريهم ليهم سنة بتكلموا في (التعاون).
* وتتخيلوا مجلسنا الما شرعي دا... جاب ليه (نجيلة) امريكية من الامارات.
* بختك يا مهند تاني تقلب الهوبة سبع مرات في النجيلة دي .. في المباراة الواحدة.
* ومجلسنا الما شرعي دا ... بخطط للتسجيلات بترتيب وتخطيط دقيق.
* مجلس المريخ الشرعي دا واحد فيه متفرغ للتصريحات وواحد قاعد في الطابق التاني.
* مجلس المريخ تعاقد مع مدرب بتدفع مرتبه الشركة الراعية.
* عشان كدا.. عشان كدا شنو؟.
* عشان كدا جابوا ليهم مدرب رخيص ... (افياني) محسن .. افياني زايد واحد .. مدرب مقدمه 80 الف دولار.
* ليه حق الاسبوع والتاني تضربو ملاريا.
* مدربكم دا مفروض تدفعوا ليه مقدم العقد (كينين).
* يعني كامبوس بساوي عشرة رادان.
* زولكم دا عشرة دقائق ما بثبت مع كامبوس في المجموعات.
* مفروض ناس الهلال يفتحوا باب القبول للانضمام للهلال.
* ناس المريخ ديل شايفهم متضايقين شديد.
* طمبل قالوا بقي يلقط في حاجاتو ... خلاص مغادر.
* ايداهور ... حلمو ومني عينو يلعب في الهلال.
* يا ايداهور ... قلنا ليك في التشكيلة ما عندك طريقة ... لكن كامبوس دا ممكن يشوف ليك مكان في (الكنبة).
* كنبة الهلال ولا اساسي في تشكيلة المريخ.
* فرصة ايداهور بعد (كامبوس) بقت ضعيفة شديد.
* قلت ليكم ناس الهلال ديل عندهم حاجات غريبة.
* المجلس غير شرعي وبتم في تعاقدات خرافية.
* الفريق بدون مدرب صعد لمرحلة المجموعات.
* مساعد مدرب ما عندنا.. فريقنا ما عندو ملعب تصدر للممتاز بفارق اربع نقاط... احسن هجوم ... احسن دفاع.. هداف الدوري.
* انتوا عندكم ملعب وعندكم طابق تاني .. عملتوا شنو؟.
* عندكم مجلس شرعي .. قاعد ومتفرغ بس علي الرد علي تصريحات صلاح ادريس.
* الضل عمرو ما يبقي زول.
* بعدين انتوا الزعل في شنو؟... في موضوع المدرب البرازيلي الذي سوف يحضره ( ان شاءالله) الهلال.
* انتوا اكتر ناس مستفيدين من الموضوع دا.
* فائدة المدرب دا بتنعكس اول حاجة بشكل اساسي ورئيسي علي (الضل).
* قالوا كامبوس بهتم اهتمام خاص بالبدلاء والضل.
* لكن بالجد كدا ناس الهلال ببالغوا... السنة دي ما خلوا ليهم حاجة للمريخ عشان يتميزوا بيها.
* المجموعات دي وقت تبدأ المريخ سوف يكون وصيف في اي حاجة.
* وصيف في الممتاز.. وصيف في البطولة الافريقية.
* وصيف في النجيلة ... نجيلتكم دي ما بتاكل عيش مع نجيلتنا.
* قلنا ليكم نجيلتنا بتشرب موية صحة وكرستال.
* سوركم ذاتو ح يكون وصيف مع سورنا.
* سورنا نحن من (بلجيكا) ... وسوركم من المنطقة الصناعية بحري.
* شن جاب بلجيكا للمنطقة الصناعية ...فرق الليل من الهلال اقصد من النهار.
* مدربنا كان المدرب العام لفريق ريال مدريد ... ومدربكم فشل في السلطنة.
* عندكم شنو تاني عاوزين تناقشوا فيه.
* ما عندكم غير تفتحوا سيرة (سيكافا) وكاس دبي ... وممكن نحسب ليكم كاس مانديلا.
* غير كدا ... إلا تعملوا ليكم (نفرة) طوب ... فهذا هو الشيء الوحيد الذي يمكن ان تتفوقوا فيه علي الهلال.
* عارفين بتتفوقوا في نفرة (الطوب) ليه؟.. عشان الطوب (احمر).
* ملحوظة: ورغنة ووصفنة مرة واحدة.
هوامش
* التعاقد مع مدرب الحراس السويركي .. خطوة جميلة وموفقة من مجلس الهلال... السويركي افضل مدرب حراس عمل في السودان ... وقد يكون الافضل في المنطقة العربية.
* استمرارية باهوس امر يثبت ان عين ادارة الهلال فاحصة فقد احسنت في الابقاء علي هذا المدرب .. الذي لمسنا فوائده واضحة عند لاعبي الهلال.
* مدرب الاحمال اصبح لابد منه لاي فريق يعمل علي تنمية القدرات البدنية للاعبين والمحافظة علي مهاراتهم.
* مجلس الهلال اكتسب خبرات علمية وفنية في كيفية التعامل مع الامور.
* نتمني ونسأل الله ان يوفق الهلال في كسب توقيع كامبوس كمدرب للفريق حتي تكتمل الفرحة الهلالية ويبقي امر الفوز بالبطولة الافريقية مسألة وقت ليس إلا.
* تصريحات همد تثبت ان استعدادات ولاية الخرطوم للخريف ضعيفة .. والرجل يقضي جل وقته في الرد علي صلاح ادريس.
* يجب ان ترتفع تعاقدات الهلال مع اللاعبين مع الارتفاع الهائل الذي حدث بعد اتجاه الهلال للتعاقد مع البرازيلي كامبوس.
* مجلس ادارة نادي الهلال عليه ان يعمل بجدية اكبر للتعاقد مع اطراف (شمال ويمين) عشان ناس امولادي ديل .. ما يحرجونا ساكت مع كامبوس.
* الزول دا قالوا صعب .. امولادي دا ما بستحملو ليكم.
* المفوضية لن تصدر قرارا حول قرار المحكمة العليا، ومجلس الهلال خاطب المحكمة العليا من اجل مراجعة القرار.
* الصحيح هو ان تنتظر المفوضية ما سوف تحكم به جهة الاستئناف في المحكمة العليا بعد ان خاطبها مجلس الهلال بشكل قانوني.
* خبر عاجل: نجيلتنا قالوا سألت من (هوبة) مهند الطاهر.