فكرة جديدة...اعارة والدة سادومبا

اقرأ الصحف الرياضية هذه الايام ...بشيء من الحزن ..فتتداخل علي الاشياء.

الحضري يتألق.

سادومبا يتأخر.

مرة (جوازو) انتهي.

ومرة والدته مريضة في جنوب افريقيا.

ومرة الطائرة فاتتو.

واخر حاجة يقولوا ليك موبايلو مقفول.

اتخيلوا نحن في الزمن دا ..في زول بتفوتو (طيارة).

يا سادومبا دا علينا نحن.

انت ابوالسريع ...اسرع من البرق ..تفوتك طيارة.

يا سادومبا انت (صاروخ) ما بفوتك.

الباشا اعاروه الي ليبيا وجا راجع ..الي الان نفسو مقطوع.

يا جماعة الله ..الناس في شنو؟.

البلد عاوزين يقسموها.

الجنوب عاوزين يفصلوه عن الشمال.

والسودان تاني ح يكون بدون (جنوب).

الدولة الوحيدة التي سوف يكون ما فيها (جنوب)....هي دولة السودان.

دولة بدون جنوب.

لا ابدا ح يكون في جنوب جديد.

كوستي ح تبقي (جنوب السودان)...وجنوب السودان ح يكون دولة مستقلة.

الحاصل شنو؟.

اطلع منيّ ..اليّ ...واقيف على مدخل الروح.

كانت حاجة حليمة في مثل الموقف تقول لولدها وهو بحل في الكلمات المتقاطعة ..(عليك الله ما تشحتف لي روحي).

هل سينقسم الوطن..وينفصل الشمال؟.

في شحتفة اكتر من كدا.

نحن كنا بنقسم (اللقمة) بيناتنا ....هسع ح نقسم الوطن.

زي طفلين اتشكلوا في (قطعة جبنة) ..ابوهم قرر يحسم الموضوع دا ويقسم ليهم قطعة الجبنة.

(كل زول يشيل خرراية واحدة).

ح نحسبها تاني كدا بالخيار.

هل سوف نبلغ هذا الحد من (التعسف)؟.

ربما يحدث هذا ...يلاقي المريخ في تمهيدي الكونفدرالية ...(كتور) جوبا.

دور الـ 64.

كتور جوبا ذاتو بعد 5 سنوات ما بيلعب في التمهيدي.

ويلاقي الهلال في بطولة الاندية الافريقية في دور الـ32 فريق (اطلع برة).

ناس الباشا ووارغو تاني بتم اعارتهم الي (اطلع برة).

جوبا اقرب من (طرابلس).

سؤال.

هل سوف يصبح (عصام الحضري) لاعب وطني ..(سوداني عديل كدا)..بينما سيكون (اتير توماس) لاعبا اجنبيا.

وعصام الحضري ..لا يعرف الفرق بين (رواب) اللبن ...ومواصة الكسرة.

وما عندو أي فكرة عن عصيدة الدخن.

واتير توماس متل (ابراهيم الكاشف)...حام في شوارع الموردة ..ما خلي ليه شارع ..واكل سمك عوضية ...ودخل بيوت الموردة بيت ..بيت.

اتير لعب في ميدان البيان ..ووقف في دكان عبدالعظيم العجلاتي ..وشرب ليمون علي الفكي بعد ان اكل سمك شعيب.

اتير توماس سوف يكون (اجنبيا).

واتير توماس ..ما براهو.

ريتشارد الذي نشأ في الخرطوم ...لعب في فريق الصحافة ..يافعا ..(ابنوسيا) يتلمس خطاه.

ثم لعب في صباه الباكر في فريق الخرطوم عندما كانت الخرطوم ...الخرطوم تلاتة.

أي حاجة في البلد دي اتغيرت.

أي حاجة نقصت.

حتي الخرطوم زمان كانت (تلاتة)...هسع بقت (صفر).

الخرطوم ساكت كدا.

والله خايف مع الاوضاع دي ...الخرطوم تبقي سالب خمسة.

أي حاجة في البلد دي بتنقص ..إلا الاسعار والاعمار.

عفوا ...المقصود بهذه (السلبية) الخرطوم العاصمة ..ما الخرطوم الفريق.

ريتشا د ...انتقل من الخرطوم تلاتة (سابقا) الي الهلال ...(كان جنوبيا هواها)...واحد مننا وفينا ...حتي اننا اسميناه بـ (قلب الاسد).

ريتشارد ..شرب ام درمان شراب ...عارفها ..حتة ..حتة...( من فتيح للخور للمغالق من علايل ابروف للمزالق).

ما في حاجة بتفوت عليه.

ريتشارد ..بقي جزءا من ام درمان ...من سمرتها ..من نكهتها ..من عجاجتها.

من قهوتها.

كيف لا يكون كذلك وريتشارد لعب في الهلال.

وريتشارد لم يكتف بذلك ..فقد اكد سودانيته ...ومثلما لعب في الهلال لعب في المريخ.

واصبح سودانيا هكذا ...لعب في الهلال والمريخ ...اكتر من كدا يعمل.

ريتشارد ..بكل هذه (السودانية) ..سوف يصبح (اجنبيا).

ومنو كدا (باسكال)...لاعب حتي الان لم يشرب موية النيل ..استخرجت له الجنسية ليكون (سودانيا).

وعلى النونو الما معروف هسع وين ؟...(سوداني).

واليجا تانا.

وايفوسا ..وكاسروكا ..و..و...

بينما ريتشارد لا.

اتير توماس لا.

ريتشارد الذي نشأ بيننا ...وكان مننا وفينا ..سوف ننزع منه (الجنسية)...بعد ان قارب للاربعين.

اما عصام الحضري فقد منحناه الجنسية السودانية بعد ان بلغ الاربعين.

دي جنسية مفروض يمنحوها ليه ناس المعاشات.

مفروض تطلع من الصندوق القومي للمعاشيين.

الحضري ما بعرف عن (الكلاكلة) أي حاجة...ولا حصل شاف (شندي).

سوف يكون سودانيا.

سوداني بالنية.

لا حام في مدني ....ولا قعد في قهوة (هبار)...كيف يبقي سوداني؟.

لا اكل باسطة (هدنديلو)... ولا ركب قطر كريمة..ولا نزل في سواقي كسلا....بتبقوا سوداني كيف؟.

دا سوداني بالعافية...ما سوداني بالتجنس.

سوداني بالواسطة.

لا غني (عازة في هواك)...ولا بعرف (زهرة الرياض).

ولا حكوا ليهو عن عبدالقادر ود حبوبة ...ولا بعرف محجوب شريف.

دا سوداني شنو دا؟.

ناس سودانيين بالميلاد ..سوف تسحب منهم (الجنسية)...وجماعة كدا منحوا الجنسية وهم بين طيات السحاب.

هل تصدق ان ريتشارد جاستن (السوداني) الذي سجل في شباك الحارس (الاجنبي) المصري هدفا عندما واجه الهلال فريق الاهلي المصري في عام 2005م ...سوف يصبح (اجنبيا) بينما سوف يصبح الحارس الاجنبي الذي سجل في شباكه (سودانيا).

لو معلق هذه المباراة قال الكلام دا اثناء سير المباراة في ذلك الوقت في زول كان بصدق الكلام دا.

منو الكان بتخيل ...عصام الحضري حارس الاهلي المصري في تلك المباراة سوف يصبح (سودانيا)..بينما سوف يصبح لاعب الهلال السوداني ريتشارد (اجنبيا).

منو الكان بتخيل الكلام دا يحصل.

باسكال (كوبري توتي) ما بفرزو من كوبري الفتيحاب ..بقي (سوداني).

سوداني عديل كدا.

لكن دا كوم.

وقصة سادومبا كوم براهو.

الانفصال دا هسع عرج لينا منو؟...الناس ما ناقصة.

سادومبا دا كل مرة يسافر ..ويتأخر ...وكل يوم مجلس الادارة يقول : سادومبا سوف يصل في الغد.

الغد ح يحصل شنو؟.

في الغد الطيارة ح تفوت سادومبا.

طيارة سادومبا دي اسألوني منها انا.

العذر دا نحن حفظناه.

اول حاجة يقولوا ليك سادومبا سوف يصل في الغد.

تاني حاجة يقولوا ليك : الطيارة فاتت سادومبا.

ثالث حاجة ...بلقوا حكاية الطيارة دي ما بتنفع ...بقوموا يقولوا والدة سادومبا (مريضة).

مالها خير.

كل سنة وقت ولدها يسافر ليها بتمرض.

وبتمشي جنوب افريقيا كمان.

اخر حاجة وقت الموضوع ما يلقوا ليه حل ..بقولوا ليك : سادومبا قفل الموبايل.

وقت سادومبا يقفل الموبايل ...اقنع.

اعرف طوالي انو الموضوع مشربك.

مشربك شربكة شديدة كمان.

ناس الهلال ديل لو ما اعاروا والدة سادومبا دي ...ما بتنحل مشاكل سادومبا.

اعيروها لينا الي ليبيا.

ريحونا من الموضوع دا.

انتوا وقعتوا مع سادومبا ...وإلا مع والدة سادومبا؟.

والدة سادومبا دي الظاهر عليها (مريخابية).

الحركات البتعمل فيها دي حركات (مريخاب).

تاني أي لاعب محترف تسجلوا لينا يا ناس الهلال.

احسموا لينا موضوع والدته اول حاجة.

وقعوا لينا عقد مبدئي مع والدة أي محترف.

عشان يكون هناك في التزام وانضباط.

حصل مرة واحدة سمعتوا ان والدة كلتشي (عيانة).

الحاجات دي ما بتحصل إلا في الهلال.

اعملوا ليكم قطاع امهات.

عشان نخلص.

ونشوف حكاية تأخير الطيارة دي.

ملحوظة: الحضري دا لو شاف (فليكيس) بقفل موبايلو.

هوامش

طارق مختار ...سمع بي (فليكيس)...رجع تاني للبطانية.

صاحبكم ...لقي سادومبا ما رجع ...قال يطلع من (البطانية).

في زول في البرد دا بطلع من (البطانية).

عصام الحضري قالوا عاوز ليه في التمرين 5 الف دولار.

طيب في المباريات عاوز شنو؟.

الحضري كل ما يشوف موسي الزومة قدامو ..بقول ليهم ضاعفوا لي الحافز.

ما في حارس بجازف ...ويلعب قدامو موسي الزومة.

مع صواريخ مهند الطاهر دا ...المريخ الموسم القادم عاوز ليهو حارس افغاني عديل.

مرة جابوا ليهم حارس من نيجيريا.

ومرة من فلسطين.

ومرة من مصر.

ومرة جابوا ليهم مدافع من (البوسنة).

ومدافع من توغو ..قالوا لعب ضد تيري هنري.

برضو ما في حاجة نفعت.

ضرب محل ما قبلو.

وصافة 7 مرات في 8 سنوات.

جمال الوالي اس سبعة.

او (جمال الوالي)7 ...يعني وصافة سبع مرات.

ناس المريخ مفروض يعملوا ليهم نفرة لي غرامة الحضري.

نحن بنساعدكم بالطوب.

لاعب اجنبي يبقي وطني ...سمعنا بيها.

لكن لاعب وطني يبقي اجنبي دي ...ما سمعنا بيها إلا في السودان.

لو استمرينا بالطريقة دي ..انا خايف (عمر بخيت) يبقي اجنبي.

يعني (الجريف) ذاتها ح تنفصل.

الله يستر.

قالوا الحضري يتألق في تمرين المريخ.

الحضري لو ما اتألق في تصويبات هنو ..ح يتألق وين؟.

يا الحضري اوعك تفتكر كل المهاجمين في السودان متل (هنو).

هنو دا نحن جايبنو للتمويه.

انت ما شفت مهند الطاهر عمل شنو في حارس مازمبي.

هدف (ارهابي) عديل سجله مهند الطاهر في شباك المنتخب الكنغولي.

يا الحضري انت بعد الاربعين ما بتقدر على الشغل دا.

الشغل دا صعب عليك.

انت في التلاتينات فشلت مع ناس كرنقو.

كرنقو هسع في نيل الحصاحيصا.

عندنا مهاجم ...صعب شديد ..قالوا قونو بجيبو من اول 5 دقايق.

قونو بجيبو من بدري شديد ..زي (المرارة) بتطلع بدري شديد في الخروف.

محمد كمال مع هذا المستوى المتواضع الذي ظهر به ..سوف يكون الحارس الاول في المريخ.

الحضري ما بقدر على البهدلة دي.

اتخيلوا شكل الوصافة في الحضري.

دي وصافة مغرية خالص.

موسي الزومة ...ما عندو مشكلة مع الوصافة.

الكلام الحضري ...ما متعود عليها.

ساكوها ...شكلو واضح انو (وصيف).

طارق مختار ..برضو الوصافة خايلة معاه ..رغم انو كان بيلعب في الهلال.

طمبل بقي وصيف اكتر من الوصفاء.

يعني ملكي اكتر من الملك.

تستاهل يا طمبل.

خبر عاجل: الهلال بقي فيه 6 اجانب ...(اتير توماس ..وجمعة جانيرو)...يعني اكتر فريق متضرر من الانفصال الهلال.