سوداني زعلان بس ليه حق ..

من طرف محمد كامل الجمعة يناير 28, 2011 1:44 pm

كنت ح تلتزم بالمواعيد - كنت ح تدفع فاتورة المحامي أو الطبيب قريبك - كنت قاضيت المهندس اللي خرب ليك بيتك - كنت عملت مشروعك بنفسك دون محاكاة - كنت بدأت دوامك في الموعد المحدد - كنت حتنطق حرف ال (ق) و ال) غ) كما ينبغي وما كنت ح تقول للتسعة تزعة - كنت بطلت تسف سعوط - كنت صرت متخصص وعالم في مجالك - كنت ح تلبس شيك جدا عند خروجك أمام التلفاز وأجهزة الاعلام - كنت تتحدث بطلاقة وإنسيابية بدون أ أ أ أ أ أ– ولو ما كنت سودانى كنت عرفت أن بالدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا وكنت خططت لحياتك ومستقبلك و كنت اخترت المساق التعليمي بنفسك و درست الجامعة بالكلية اللي تناسب مقدراتك ومواهبك ورغباتك المستقبلية مش عشان ود جيرانكم اختار الكلية دى بالذات يعنى أخنق فطس.. كنت ح تتصل بالتلفون قبل زيارة أحد في منزله بدري شويه, مش و أنت في خشم الباب ده طبعا لو اتصلت وما جيت داخل زي قدر الله بدون حتي ماتدق الباب وتدقو ليه؟؟مش في سلك تجرو وتدخل!!بدون مراعاة لحرمة البيت
منقول

من طرف محمد كامل الجمعة يناير 28, 2011 1:47 pm

ولو ما كنت سوداني...كنت انتظرت دورك في الصف وخلصت معاملتك بنظام بدل الململة البتعملوها وكنت ح تنهر أولادك لما يبهدلوا ليهم بيت زول ويعيثوا فيهو فسادا وحضرتك قاعد تضحك ومتعجب لأولادك ورافع لي ناس البيت الضغط والسكري.... كنت ح تتوقع بحصل شنو لما ترقد طفلك الصغير بدون بامبرز في سرير في بيت ناس!!وأولادك الاكبر شوية بعملو شنو في نباتات وازهار الناس التعبانين عليها وزارعنها وراوينها بدم قلبهم ..والطامة الكبري لو كان عندهم حوض سمك ...
و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية

من طرف محمد كامل الجمعة يناير 28, 2011 1:48 pm

.كنت ح تتردد في إعطاء رقم تلفون أو عنوان شخص ما.. دون إذنه او حتي سؤاله اذا كان عندو رغبة يتواصل مع الناس ديل أو مفهمهم انو ما عندوا تلفون من اصلو بدل تورطو وتحرجو كدة!!!.وكنت امتنعت عن السماح بجلوس طفلك الرضيع في المقعد الأمامي على حجرك أو حجر والدته ولمن يحصل حادث الحبيب يأكلها لا لذنب جناه سوي انو أهله سودانين!!...كنت ح تترد في زيارة شخص ما.. أنصاف الليالي و صابح تاني يوم مدارس و عمل وتساهر بالناس وتطلع روحهم تشرب العصير والشاي ويعملو ليك العشاء علي أمل انك تمشي وتخليهم ينومو وانت برضو قاعد تبري فيهم وما تحس الإ قبل آذان الفجر بشوية وتقوم تنكشح بعد ما الديك قرب يعوعي!!!ولو ما كنت سوداني ...كنت ح تخلي الصغار في البيت عندما تكون المناسبة مناسبة كبار..-كنت اتونست بصوت معقول, خصوصا' عندما يكون الطرف الآخر قاعد جنبك في نفس الكنبة.. و يا حبذا عندما يكون الطرف الآخر ساكت

من طرف محمد كامل الجمعة يناير 28, 2011 1:49 pm

كنت امتنعت عن التدخين في منزل شخص آخر, أو على الأقل استأذنت قبل ما تولع...كنت ترددت في ارسال حاجات وزنها خمسة كيلو أوأكتر مع كل من تسمع بأنه ماشي السودان...كنت رجعت القروش الاستلفتها في وقتها, أو في الحقيقة رجعتها و بس..كنت امتنعت عن زيارة أحدهم في مكتبه , للونسه أو مناقشة أمور لا صله لها بالعمل كنت خجلت من عدد المسكولات التي تعملها, مش كمان تقول 'شنو يا فردة, خمسه مسكولات ما ترد عليها؟ و الله الفيك اتعرفت'.....كنت ح تقعد فى صالون الناس بدل تلوص فى البيت كلو..كنت ح تبطل التحشر فى خصوصيات الناس وتعمل الحالة واحدة وتدى نفسك الحق تسأل اى سؤال يخطر على مخك .. لو كان فى يعنى

من طرف محمد كامل الجمعة يناير 28, 2011 1:50 pm

كنت ما ح تمشي مستشفى الولادة وتقعد تحقن النسوان الفى العنبر كلهم واللللللللللله عيب كبير يا سودانيين أصلا ما شفت غيركم بتحاوم فى عنابر الولادة وكمان معاها هرجلة وإزعاج ..أصلا انتو البوديكم شنو مستشفي الولادة؟؟ عشان تودو نسوانكم طيب آمنا بالله طيب أقعدوا في الاستقبال لزومو شنو الحوامة في العنابر يعني حبكت تباركو للأم استنو لمن تطلع في البيت أما لو كانت اختك او زوجة أخوك يا ريت الزيارة تكون من طرف الأوضة وتتوكل علي الله ... ولو ما كنت سودانى كنت بطلت تطلع بالعراقى والسروال والسفنجة وراسك مكشوف وصوتك يجيب الطاش..لو ما كنت سودانى ما كنت أكلت ميراث أخوانك الصغار واستوليت على بيت أبوك ليوم يبعثون عشان بس انت الكبير!!

من طرف محمد كامل الجمعة يناير 28, 2011 1:51 pm

ولو ما كنت سودانى كنت إبتكرت فى خريطة بيتك بدل تشف حقت صاحبك بالكربون وكنت استثمرت فى حاجة غير الركشة !! ومحلات الاتصالات !!لو ما كنت سودااااااااااانى ما كنت سقت معاك كتيبة وانت ماشى المطار وما كنت عملت الضوضاء والغوغاء العجيبة البتعملوها فى المطارات ولابسين الجلاليب والبراطيش وراسكم كاشف وفي أحسن الأحوال لابسين طاقية ويوم تحبو تقشرو تلبسو مركوب نمر يقزز .. ونسوانكم معنكشين بدهب البيت كلو ولابسين الأحمر والأخضر والترتر وزفة ألوان ما شفناها حتي في أعتي صحن سلطة ده غير شباشب الظار البرتقالي والليموني وهلم جرا وشفعكم يكوركو ويتساككو ده غير التحنيس والدناءة عشان يمشو ليك الوزن !!!

من طرف محمد كامل الجمعة يناير 28, 2011 1:51 pm

ولو ما كنتو سودانين كنت قعدتو محترمين فى الطيارة وما قرفتو المضيفات بالطلبات والأصوات والمشية والجية والهمجية وبكاء الشفع والشنط والكراتين والصفايح الداخلين بيها الطيارة والأصوات العالية والجلاليب الشربانة وما كان نسوانكم غيرو التياب فى الطيارة وما كنتو فكيتو الأحزمة ووقفتو قبل الطيارة تنزل..لو ما كنت سودانى ما كان ممكن تدخل فى زول شمال وتقول ليهو راتبك كم؟؟؟؟ولو ما كنت سودانى ما كان ممكن تفكر انك تمشى عرس بتاع ناس وتقيف بكل بجاحة تصور العروس بموبايلك وانت ما بتقرب للعروس ولا حتى بى حواء وآدم بدون ما تسأل نفسك منو الأداك الحق ده في إختراق خصوصيات الناس ومنو السمح ليك تدخل وتتعشي وتصور!!!!

من طرف محمد كامل الجمعة يناير 28, 2011 1:52 pm

ولو ما كنت سودانى ما كنت طلعت من شغللك ولمدة تلاتة أيام وسبت المراجعين يتبهدلو عشان حبوبة جار جاركم ماتت عن عمر يناهز المية وشوية والبكا جاى خبر من الشمالية.. والمراجعين برضو لو ما كانو سودانيين ما كان سكتو عن حقهم وكل يوم يمشو ويجو المؤسسة عشان موضوع تافه ما بياخد اكتر من عشرة دقايق!!! لو ما كنت سودانى كنت استفدت من غربتك وأمنت مستقبل أولادك وقدمت استقالتك ورجعت بلدك بي كرعينك مش بالصندوق..لو ما كنت سودانى ما كان كل يوم جاييك تلفون رسل وجيب وحول عشان هم يقعدوا يأكلو فى حقك لا شغل لا مشغلة ويشتغلو ليه؟؟كفاية عندهم سودانى مغفل زيهم يرسل بدون تفكير

من طرف محمد كامل الجمعة يناير 28, 2011 1:53 pm

ولو ما كنت سودانى مستحيييييييييييييييل تدى أخوك يبنى ليك بيتك وترجع بعد خمسة سنين تلقاو لسة ما حفر الساس ولو سألتو عن القروش الحولتها طول السنين دي يزعل منك ويخاصمك ويعملها حكاية طويلة وعريضة ولو ما كانو أهلك ذااااتهم سودانييين ما كان غلطوك وطلعوك انت الكعب!!وجبروك تسكت عن حقك وطلعت من الموضوع بأزمة نفسية!! صدقنى لو ما كنت سودانى كانت حياتك مشت بأريحية ونظام ورااااااااحة كانت مجاملاتك ح تكون حلوة وفى حدود المعقول بدل كل يوم جاري ولاهث من بيت لبيت في الفارغة والمليانة!!..

من طرف محمد كامل الجمعة يناير 28, 2011 1:54 pm

كنت نمت لما تحب وتصحى لمن تحب..كنت انت القررت مشروع زواجك بمن تحب بدل القبيلة كلها تقرر معاك.. ويجزمو بأغلظ الإيمان انو فلانة هي البتناسبك !!!عرفو احتياجاتك كيف؟؟ميولك كيف؟؟طلبك كيف؟؟ أنا ما عارف!!!!!. كنت سميت أولادك الأسماء البتحبها مش البختاروها ليك عمك وجدك ونسيبك وتقوم الدنيا وما تقعد لو ما سميت ليهم الاسم الدايرنو ويسلبوك ويسلبو الأم أبسط الحقوق انها تسمي الكائن الكانت شايلاو تسعة شهور وتعبانة فيهو ده!!! .كنت استمتعت باجازتك وبوقتك وحياتك بدل كل واحد يديك الفتوي الفى دماغو..لو ما كنت سودانى كنت ح تكون سييييييييييد نفسك ووووووووووووو ............ وبرضو أقول أفتخر بأنى سودانى

منقول

*************

سوداني زعلان بس ليه حق ..

سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..

رد: سوداني زعلان بس ليه حق ..