الرجل الذي فقد (اسنانه) في المحطة الاخيرة

< انا مهموم بهؤلاء الاشخاص.

< مثلا.

< ممكن يكون في بكاء شديد في الحارة...(وفاة) يعني.

< وناس يدخلوا ..وناس يطلعوا...وعربية تقيف ..وعربية تقوم ..وخلق ما ليها حد.

< واي ضل واقفين فيهو خمسة.

< في هذه الزحمة ...يكون في (شخص)...بشيل الفاتحة...ما بخلى ليه زول ما بشيل معاه الفاتحة.

< القريب والبعيد بعزيهو.

< الزول دا ببكي...بكاء بي اخلاص.

< ثم يسألك هذا الشخص بعد ما الاحوال تهدأ ويقول ليك : (هنا الحاصل شنو؟).

< او يقول ليك المات منو؟.

< طبعا ممكن تجيب ليه بي كل بساطة ..وتقول ليه : ما حاصل أي حاجة ..لكن في (ديك) رايح.

< انت تعال هنا (الديوك) الشاباكنا بيها الايامات دي شنو؟.

< او في بروفة موت بسيطة.

< وشخص تاني.

< في الحفلة ...الناس دي كلها واقفة ...البقوم من الكرسي حقو عشان يبشر للعريس ..يرجع يلقي الكرسي شالوه.

< لو قهيت في (العروس) ساكت ..بسحبوا منك (الكرسي).

< الحلة كلها في الدارة.

< حتي عمتك بنت الخليفة جوة الدارة ..وقت تقول ليها : يا حاجة انت البدخلك الدارة شنو؟.

< بنت الخليفة تقول ليك : عاد لو ما جاملنا العريس الليلة نجاملو تاني وين؟.

< يعني انت يا بنت الخليفة ما لقيتي تجاملي العريس دا إلا في اغنية (المال ما بهمو هوى ان كتر وان راح).

< اها في الزحمة دي ..في (شخص) كدا يظهر.

< يدافر ليك من بداية الصيوان.

< يدافر وشايل تلفونو.

< يا جماعة ..افتحوا لينا الدرب (الخط فاتح).

< يا حاجة لو سمحتي ارجعي شوية.

< الشخص دا يدافر في الخلق الي ان يصل (العريس).

< الناس كلها تعاين ..يا ربي الزول دا عاوز يقول للعريس شنو؟.

< الشخص يصل للعريس ويمد ليه (التلفون)..ويقول ليه دا عباس عاوز يبارك ليك.

< عباس منو؟.

< عباس ود الحاج.

< الحاج منو؟.

< الحاج ود الجزولي.

< الجزولي منو؟...العريس يقول ليه انا ما بعرف زول بالاسم دا.

< الشخص يقول ليه : هو ذاتو ما بعرفك...لكن انا قلت ليه الليلة عرس صاحبي قال لي ادينا (ابارك) ليه.

< العريس يشيل التلفون ...ويتقبل المباركة...ويرجع التلفون.

< الشخص يتخارج.

< قبل الفاصل الاخير ما ينتهي ..(الشخص) دا تاني يرجع ..يا جماعة لو سمحتوا افتحوا الطريق.

< يا حاجة معليش.

< يا بنت امشي قدام شوية.

< الي ان يصل ذلك (الشخص) الي العريس وهو شايل تلفونو.

< العريس يقول ليه : اها تاني في شنو يا شخص.

< الشخص يقول ليه دا عباس.

< عباس منو؟.

< عباس ود الحاج.

< الحاج منو؟.

< الحاج ود الجزولي.

< الجزولي منو؟...يا زول انا ما بعرف زول بالاسم دا.

< الشخص يهيج في العريس ..ويقول ليه : كيف ما تعرفو دا عباس (البارك) ليك قبل شوية.

< ايوة اتذكرت..مالو عباس دا؟.

< الشخص يقول ليه : عباس دا قال عاوز يبارك للعروس ..قبيل انت قفلت الخط قبال ما يبارك للعروس.

< وعباس دا ما بحب يتلوم ليه في زول.

< بخاف من اللوم.

< في (اشخاص) كدا.

< هذه (انماط) لشخصيات موجودة في وسطنا.

< انا مرة دخلت مباراة للهلال.

< ما في داعي احدد ليكم الهلال كان لاعب مع منو؟...عشان ما تعرفو الزول البتكلم ليكم عنو.

< المهم الهلال كان لاعب مباراة سخنة.

< مباراة مولعة ..(سجارتك) تولعها من خط التماس.

< قلت ليكم مباراة مولعة.

< الدم للركب.

< كبع جد.

< الرعاف دا عادي شغال ..اللاعب بيرعف ...والمدرب بيرعف ..والمشجع القاعد جنبك بيرعف.

< مباراة بس (كرري).

< الما شاف سقوط الخرطوم..يشوف المباراة دي.

< اها في (اللبعي) دا ..الهلال جابو فيه قون.

< قون من اول 10 دقائق.

< في زول كبير كدا قاعد جنبي ..بعد الهدف دا (نام).

< زولكم بقي كل خمس دقائق يصحي ..يقول لي الهلال (درن).

< اقول ليه : لسع!.

< زولكم يرجع ينوم تاني.

< تاني يصحي بعد خمس دقائق ...اسمع الهلال (اتعادل).

< لسع يا حاج ..وقت الهلال يتعادل بصحيك ..انت نوم نومك.

< عمك يقول لي : لكن انا الهلال وقت يكون مغلوب ما بقدر انوم ...النوم بطير من رأسي.

< طيب يا حاج وقت النوم بطير من رأسك ..اصحي تابع المباراة.

< لكن انا ما بحب اشاهد الهلال مغلوب ...زولكم تاني ينوم.

< يصحي بعد خمس دقائق ...اها الهلال ان شاءالله اتعادل.

< اتعادل وين يا حاج؟...الهلال جابو فيه الهدف التاني.

< عمك غضب...قام يكورك ..دي ما طريقة دي ..الحكم ظالم عندنا 4 ضربات جزاء واحدة فيهن ما حسبها ...دا كلام فارغ ..كيف الهلال يتغلب 2 صفر ..وين هيثم مصطفي (حفظه الله ورعاه) وين المعز محجوب ؟..وين عمر بخيت ؟..وين علاءالدين يوسف؟.

< يا حاج اقعد ..ما تفضحنا ..الهلال اللاعب دا ..هلال بورتسودان ..ما هلال السودان.

< عمك قعد ...وقال لي طيب ما تقول كدا من الصباح ..تخلينا ننوم نومنا.

< هسع هلال بورتسودان ذنبو شنو؟.

< انتوا مجانين ..انا بحضر لي مباراة الهلال يتغلب فيها 2.

< دي في (السلة) ما بتحصل.

< لكن بالجد في ناس كدا ..في (اشخاص) بالطريقة.

< خلوا ديل كلهم في (شخص) غياظ جدا.

< شخص ...لايوق شديد.

< انتوا ما حصل ..مرة تكونوا راكبين ليكم عربية ....يقوم الزول السايق العربية دي ..يدخل غلط ..وإلا يخش ليه في مسار ما مسارو ..يقوم يضايق العربية التانية.

< سواق العربية التانية بغضب ..ودا من حقو.

< الحاجة الما من حق الزول دا ..انو الزول البكون قاعد جوار السواق (كرسي الشهيد) في العربية التي تضررت من خطأ العربية ...بقوم يطلع رأسو برة العربية ..ويقول للسواق الغلطان : انت ما بتشوف ..دي سواقة دي ..جايبنكم من وين انتوا ..حريقة تحرقكم.

< يا شخص انت مالك ...تقول سايق العربية.

< الحاجة المدهشة ..انو الزول الراكب جوار السواق في العربية التي حدث منها الخطأ ..بقوم يطلع رأسو برة العربية برضو ويقوم يرد على الزول دا : انت مالك سايقها انت؟.

< والشكلة تدور بين الاثنين ...وهما الاتنين ما في واحد سايق العربية.

< الحاجات دي بتحصل.

< في (شخوص) بالصورة دي.

< ناس صعبين.

< الواحد يلاقيك شايل ليك لوح تلج ...يقول ليك (التلج) دا مودي وين في البرد دا.

< انت مالك؟.

< في ناس كدا.

< من بين هؤلاء (الشخوص)..يشتهر (الرجل الذي فقد ظله).

< ونحن عندنا الرجل الذي فقد (اسنانه) في المحطة الاخيرة.

< طبعا في المحطة الاخيرة ..(العكة) دايما بدور.

< يا مع الكمساري ..عشان ما رجع الباقي.

< يا مع السواق عشان فوت الراكب المحطة قبل الاخيرة.

< المهم ..ممكن تفقد (اسنانك) بي كل بساطة في المحطة الاخيرة.

< عادي دي.

< ممكن دا يحصل بي كل سهولة.

< ما علينا ...من بين هؤلاء (الرجال) هناك رجل اثار فضول العالم في الفترة الاخيرة.

< رجل غريب ..كل الناس اهتموا به ...وكلهم قالوا : دا منو؟.

< هذه الرجل ظهر في احداث الثورة المصرية ...اغرب رجل في الدنيا.

< طبعا الثورة المصرية هي من الثورات التي اعتمدت اعتمادا كبيرا على (الكوميديا) وطرافة الشعب المصري وخفة دمه ..اظهرت الكثير من النكات والطرايف في الـ 18 يوم التي اشتعلت فيها الثورة حتي تنحي الرئيس المصري محمد حسني مبارك.

< في صحفة (يا هو) الاخبارية عبر خدمة الشبكة العنكبوتية قرأت مقال تحدث عن (الرجل) الذي ظهر خلف عمر سليمان نائب الرئيس السابق عندما قرأ عمر سليمان بيان تنحي مبارك.

< رغم ان هذا البيان كان مدته 49 ثانية ..إلا ان الكل علق على الرجل الذي كان يقف خلف عمر سليمان وظهر في الصورة.

< ما جعلنا اتوقف عند هذا التعليق والمقال الصحفي الطريف ان هذا الرجل قيل انه حسام البدري مدرب الاهلي السابق نسبة للشبه الكبير بين البدري والرجل الذي كان يقف خلف عمر سليمان.

< وحتي لا افسد لكم الامر اقدم لكم المقال كما جاء في الموقع..وبعدين احكموا انتوا على طرافة الشعب المصري.

< المقال جاء بعنوان (اعتذارات من المصريين للرجل »اللي ورا عمر سليمان«).

< واقدم لكم النص حرفيا كما جاء:

< (تمتع المصريون خلال مظاهرات ميدان التحرير طيلة 18 يوما (هي عمر ثورتهم) بنوع من الفكاهة والسخرية، انعكس ذلك في اللافتات الكثيرة التي كان يحملها المتظاهرون بعد أن كتبوا عليها كلمات خفيفة الظل تطالب الرئيس مبارك بالرحيل، حالة الفكاهة لم تختف بعد انتهاء الثورة والإطاحة بالنظام؛ فمع إلقاء نائب الرئيس عمر سليمان كلمته »التاريخية« التي تضمنت قرار تنحي مبارك، لفت نظر كثير من المصريين وجود شخص كان يقف خلف النائب خلال الكلمة المتلفزة، ليتساءلوا بعد أن هدأت الأمور قليلا عن هوية ذلك الرجل، خاصة أنه كان يقلب بصره يمينا ويسارا أثناء الكلمة التي لم تستغرق سوى ثوان معدودة، كما اتسمت ملامحه بالجدية والصرامة البالغة، مما جعل هناك فضولا لمعرفة من تكون تلك الشخصية الغامضة، وسر تواجدها في مثل هذا الموقف.

< وكنوع من »المزاح السياسي« تكونت عشرات المجموعات على موقع الـ»فيس بوك« للتساؤل عن هوية هذا الرجل، أغلبها حمل اسم »الراجل اللي واقف ورا عمر سليمان« ضمت آلاف الأعضاء، تسابقوا في الكشف عن هوية الرجل من خلال التعليقات، فالبعض رجح أنه السكرتير الخاص لنائب الرئيس، وآخرون أشاروا أنه ضابط في الجيش المصري، ووضع آخرون صورا لشخصيات قريبة الشبه بالرجل منهم الرئيس التونسي السابق زين العابدين بن علي، والإعلامي اللبناني جورج قرداحي، والمدير الفني السابق لفريق الأهلي المصري لكرة القدم حسام البدري.

< كذلك كان الحال في موقع »تويتر«، حيث شهد مئات المشاركات التي تحاول الإجابة عن هوية هذا الرجل.

< على جانب آخر، أثارت تعليقات هذه المجموعات غضب البعض، خاصة بعد الكشف عن صاحب الشخصية، الذي تكشف أنه المقدم أركان حرب حسين شريف، قائد المجموعة 64 قتال من القوات الخاصة، بعد أن قام ابنه من خلال صفحة خاصة على موقع الـ»فيس بوك« بالتعريف به وطالب فيها الجميع بالاعتذار لوالده ولأسرته جميعها عن حالة التهكم والسخرية التي سادت خلال الأيام الماضية، مشيرا إلى شعوره بالحرج تجاه والده الذي لم يكن له ذنب في ذلك.

< وبالفعل استجاب كثيرون وكونوا مجموعات أخرى للاعتذار للرجل، أبرزها »أعتذر للمقدم أركان حرب حسين شريف وكل أسرته« والتي ضمت 47 ألف عضو، أبدوا اعتذارهم وتقديرهم لشخصيته، وأرجعوا ما حدث إلى خفة دم المصريين وليس إلى التقليل من شخصه، فيما جاءت المشاركات مثل »الرجل يحمل كل معاني الاحترام التي تعودنا عليها من ضباط الجيش«، »لكل رجال القوات المسلحة التقدير منا فهم حماة الثورة وحماة الوطن«، »أعظم راجل في التاريخ يا ريتني أنا اللي وقفت ورا عمر سليمان.

< اللافت أن المجموعات المتكونة في الجانبين عملت طرح تساؤلات أخرى حول اللواء عمر سليمان، البطل الحقيقي في هذا المشهد، وعما يفعله في الوقت الحالي، وهل سيكون له دور في المرحلة القادمة.. والدافع وراء طرح هذه الأسئلة هو تواري النائب السابق عن الأنظار منذ إلقاء هذا الخطاب وتنحي الرئيس مبارك)).

< هذا ما جاء بالحرف تعليقا على الرجل الذي كان يقف خلف عمر سليمان ..حيث ترك الجميع عمر سليمان وتحدثوا عن الرجل الذي يقف خلفه ..رغم ان هذا الرجل لم يظهر منه غير (الوجه).

< علما ان مدة البيان لم تتجاوز الـ 49 ثانية.

< الشيء المضحك ان الرجل شبه بـ (حسام البدري) الذي عرف بانه المدرب السابق لفريق الاهلي المصري.

< يعني حسام البدري كأنه الان في (اجازة)...زول بعرف المريخ مافي ..كان يمكن بدلا من السابق ..يقولوا المدرب الحالي لفريق المريخ.

< لكن واضح ان (المريخ) غير معروف في مصر ...رغم ان الجهاز الفني كله من مصر.

< اضف الي ذلك ان عصام الحضري (حارس افريقيا) الاول يحرس مرمي المريخ.

< يعني مفروض المريخ دا يكون على الاقل معروف من قلة في مصر.

< ملحوظة: حسام البدري شكلو كدا ح (يتنحي) من تدريب المريخ.

هوامش

< المنتخب الوطني اليوم في مباراة مصيرية امام منتخب النيجر.

< الانتصار اليوم يعني ان المنتخب السوداني اصبح قريب من كأس البطولة.

< مع احترامنا لكل المستويات الفنية للمنتخبات الاخرى...إلا ان المنتخب السوداني احق بالبطولة.

< نتمني ان يلعب بكري المدينة مع مدثر كاريكا منذ بداية المباراة لتكتمل قوة المنتخب الهجومية.

< مهم جدا ان يبدأ بكري المدينة.

< ومهم ان يبدأ مهند الطاهر.

< في وجود بهاءالدين ..اصبحنا لا نخشي حتي من اللجوء الي الضربات الترجيحية.

< بهاء الدين حارس افريقيا الاول (محليا).

< عشان المريخاب ما يزعلوا.

< المنتخب اليوم يحتاج الي مساندة جماهيرية كبيرة.

< يجب ان نتعامل مع البطولة باحساس الفوز باللقب.

< المنتخب السوداني اقرب للقب.

< الاخضر الليبي سجل هدفين في شباك الحضري.

< الحضري معذور ..بقيف قدامو طارق مختار.

< لو دا مستوى الحضري ..فان أي (باك) في أي نادي ممكن هذا العام ان يكون هداف الممتاز.

< حسام البدري شهرين ما بستمر مع المريخ.

< عمر حسام البدري مع المريخ قصير.

< وكذلك عصام البدري.

< نتمني ان تكتمل انتخابات الهلال ليدخل الفريق للموسم الجديد وهو اكثر استقرارا.

< خبر عاجل: انتوا المريخ دا بعد ليبيا مشوا اليمن.