11 مارس اليوم العالمي للحصوات

< في حلتنا عندنا زول اسمو (عبده مناسبات)..اي مناسبة في الدنيا دي عارفها.

< ما في حاجة بتفوت عليه.

< أي حاجة عارفها.

< أي حجر اساس وضع في البلد دي عارف ليك تاريخو.

< تاريخ اول اجتماع ..وتاريخ اول لجنة منبثقة...وحفل التأبين...قلت ليكم عارف أي حاجة.

< اعلان الاستقلال دا متابعوا ليك من صالون الزعيم اسماعيل الازهري الي ان اعلن من داخل البرلمان في 19 ديسمبر 1955م.

< قلت ليكم عبده مناسبات دا ما في حاجة بتفوت عليه.

< العرس الفي هو بكون عارفو قبل (العريس)...في الحاجات دي خطير ما في زول بلحقو.

< محلل عديل كدا.

< يمسك ليك العرس من قولة الخير ...الي الحنة الصغيرة ثم الحنة الكبيرة...لمن يصل الي العقد.

< زول خطرى.

< عبده مناسبات ...يقولوا ليه (كمال) عرسو يوم 4- اكتوبر ..طوالي يطلع (الاجندة)...يقول ليك المناسبة دي واقعة يوم الثلاثاء.

< وشوفها ليك كمان واقعة في ياتو شهر عربي.

< يفلفل ليك المناسبة فلفلة.

< عبده دا ما النوع البتقول ليه عرس كمال يوم كدا ..يقول ليك كمال دا منو؟.

< في ناس بحبو يسفهو ليك الموضوع.

< يقولوا ليهم كمال عاوز يعرس ..ينط واحد من الجماعة يقول ليك بالله شوف : كمال دا كان (طيش) فصلنا.

< قول بجي (الطيش) ما يعرس يعني.

< انت بالمناسبة دي كمال دا منو؟...الشابكنا بيهو من الصباح.

< عبده مناسبات دا مرة لاقتو لابس ليه (قميص اخضر) ..قلت ليه تعال هنا يا عبده مناسبات الليلة لابس ليك قميص اخضر زي (الفلفة) كدا ماشي على وين؟.

< عبده مناسبات قال لي : شوف انا لما ألبس القميص الاخضر دا ..يعني ماشي (عيد ميلاد)...الليلة عندي واحد صاحبي عشر سنوات ما شفتو ..لاقتو الليلة في (الفيس بوك)..قام عزمني (عيد ميلادو).

< بقيت كل ما اشوفو لابس ليه قميص اخضر بعرف ليك عبده مناسبات دا ماشي ليه (عيد ميلاد).

< افتكر الموضوع ظاهر ..ما عاوز ليه اجتهاد كتير.

< عبده مناسبات ..اي يوم عندو فيه مناسبة.

< مرة لاقيتو لابس ليهو (قميص احمر) ..قال لي لليلة اليوم العالمي للبطيخ.

< قلت ليه : انتو (العنب) ما عملتوا ليهو (يوم عالمي) عاوزين تعملوا يوم للبطيخ.

< البطيخ شن طعمو عشان تعملوا ليه يوم عالمي.

< عشان كدا رفعتوا لينا البطيخ في رأسنا.

< ليه حق البطيخ يبقي (غالي) كدا ...طول ما انتوا عاملين ليهو (عيد ميلاد).

< بطيخ هو وإلا نيسلون مانديلا.

< عبده مناسبات دا ..مرة لاقيتو الصباح يوم 17 اغسطس ..قلت ليهو الليلة ماشي وين من الصباح كدا...زي الزول العاوز يشارك في مسابقة للبكور.

< قال لي انت ماعارف.

< قلت ليه عارف شنو؟....البلد دي الواحد بقي فيها ما عارف أي شيء..عنوان البيت الساكن فيهو لو ما بتكتبو في ورقة خارجية ممكن وقت تطلع منو تنساه.

< عندنا واحد بعمل لي نفسو (رنة) عشان يشوف الرقم الشايلو.

< الناس بقت تنسي.

< عندنا واحد مشي ليه مطعم سمك ...نفسو كان في اليوم داك ياكل سمك.

< صاحبكم مشي قعد في المطعم ...الجرسون جاهو شايل (جك الموية)..وقال للزبون نعم يا استاذ.

< الاستاذ ساعة ونص بتذكر ليه جاء هنا ..وعاوز شنو؟.

< والجرسون مسكين قدم ليه ورقة الاصناف ...سمك مشوى ..سمك محمر...شوربة سمك ..سمك بلطي.

< زولكم برضو ما اتذكر هو ليه جاء قعد في المطعم هنا ...قال في نفسو (يا ربي انا عاوز شنو)..وجيت هنا ليه؟.

< الزول دا قدر ما اجتهد ما اتذكر.

< اخر حاجة قال للجرسون ...اسمع يا ابوالشباب في تحويل رصيد هنا.

< الجرسون عاين ليهو كدا ..وقال ليهو : يحولوك سجن كوبر...شايف ليك هنا في الناس القاعدين ديل واحد ساكت (بكرش) ليه في (اسكراتش).

< ما علينا ..نرجع لي عبده مناسبات ...قلت ليه يا عبده الليلة في شنو ...(النقطة الكنا واقفين فيها).

< قال الليلة يوم 17 اغسطس.

< قلت ليه يعني شنو يوم 17 اغسطس ...انا يوم 17 اغسطس عندي زي 4 ابريل..ما في حاجة فارقة معاي.

< كلو واحد.

< عبده مناسبات اضايق بقي زي حلة الضلع في اخر المناسبة..قال لي يوم 17 اغسطس دا يوم عيد ميلاد هنري.

< انت قاعد وين؟.

< قلت ليهو والله لو هنري دا بيلعب في الهلال ما اشتغل بي عيد ميلادو ...نحن ناقصين كمان.

< اوعك تفتح لينا فاتوحة زي الفاتوحة دي.

< مرة تانية كدا ...لقيت ليك عبده مناسبات دا حزين ...حزن شديد.

< زي علبة الحلاوة خامس يوم في العيد.

< قلت ليه خير ...مالك الليلة كمان..الحاصل شنو؟.

< قال لي انت عارف الليلة يوم كم؟.

< قلت ليهو الليلة يوم 23 ابريل.

< قال لي : طيب التاريخ دا ما بعني ليك حاجة.

< قلت ليه بعني لي حاجة واحدة بس ...(المرتبات) باقي ليها اسبوع.

< قال لي غير كدا ...التاريخ دا بعني ليك شنو؟.

< قلت ليه ما بعني لي أي حاجة.

< عبده مناسبات زعل ..قال لي انت عايش وين؟...هل تعلم انو في نفس هذا التاريخ من عام 1616م رحل وليام شكسبير.

< قلت ليه : والله شكسبير دا لو رحل في هذا التاريخ من (بيتنا) ما اشتغل بيهو.

< انت فايق وإلا شنو؟.

< هكذا كان يعيش عبده مناسبات.

< اتذكرت عبده مناسبات ...عندما شرعت في كتابة هذا العمود ..الذي وضعت عنوانه (11 مارس اليوم العالمي للحصوات) استباقا وهو اليوم الذي سوف يلتقي فيه ان شاءالله الهلال والمريخ.

< ومن عجائب الصدف اني بحثت بعد ذلك عن هذا اليوم فوجدت ان يوم 11 مارس هو اليوم العالمي للكلى.

< يعني عبده مناسبات يقصر.

< والله يا اكرم الهادي ح نفقدك.

< عصام الحضري يمكن (الفيفا) تمرقو من (الحصوة).

< الحاجة الغريبة ان صحيفة كويتية نشرت ان عصام الحضري طالب بانهاء تعاقده مع المريخ ...وان كان عصام الحضري نفي ذلك بعد ذلك في الصحف السودانية.

< لكن طبعا ما في (دخان) من غير نار ...الصحيفة الكويتية ما عندها مصلحة في ان (تشتل) هذا الخبر عن عصام الحضري.

< ما عندها مصلحة في ذلك.

< لذلك نحن لا نستبعد صحة الخبر.

< لا سيما وان عصام الحضري (خلع) عن فريق الاهلي المصري الذي عاش في كنفه سنوات عديدة ...وهرب بعد ذلك.

< وحسب البعض ان عصام الحضري سوف يستقر بسويسرا التي ذهب اليها هاربا ولعب في (سيون) السويسري.

< لكن الحضري لم يستمر هناك اكثر من شهور معدودة عاد بعدها ليلعب في فريق الاسماعيلي.

< وفي الاسماعيلية ايضا دخل الحضري في خلافات وصراعات مع مجلس الادارة ولم يبق الحضري في الاسماعيلي اكثر من 6 شهور.

< انتقل بعدها الي فريق الزمالك ...وكما اختلف الحضري مع مجالس ادارة الاندية التي لعب لها ..اختلف كذلك مع مجلس ادارة نادي الزمالك ودخل في خلاف طويل مع الجهاز الفني ليبيع فريق الزمالك اللاعب المشكلة الي فريق المريخ.

< جاء الحضري للمريخ وهو موقوف وعليه (غرامة) لم تسدد حتي الان..مع ذلك عصام الحضري عاوز (يخلع) من المريخ.

< واذا سدد جمال الوالي الغرامة لفريق الاهلي المصري من دون شك لن يجد الحضري بعدها مانع في ان يخلع نفسه من فريق المريخ.

< لا سيما وان الحضري يريد ان يختم حياته الرياضية في فريق مصري وهو يتمني ان يكون ذلك الفريق هو فريق الاهلي المصري ..لا سيما وان ادارة الاهلي الحالية متهمة في قضايا فساد ...مما يشير الي احتمالية ذهاب مجلس ادارة نادي الاهلي الحالي ليأتي مجلس جديد قد لا يجد حرجا في ان يضم الحضري مرة اخرى للاهلي المرفوض من القاعدة الاهلاوية.

< مضحك ان يطالب الحضري بانهاء تعاقده مع المريخ وهو حتي الان لم يلعب للمريخ.

< نحن نتمني ان يقود المريخ في مباراة القمة القادمة عصام الحضري حتي يكون وجود الحضري دافعا لبشة واخوانه في انهاء تعاقد الحضري بنفس الصورة التي تم بها انهاء تعاقد رمزي صالح.

< ومن غير شك ...كلكم تتذكرون كيف تم انهاء تعاقد رمزي صالح من المريخ ..وهو الذي دخل لكشوفات المريخ بقاعدة من قواعد الجامعة العربية.

< وتتذكرون كيف تم انهاء تعاقد اكرم الهادي سليم مع المريخ ..فقد تم شطبه بتقرير طبي خرج من سادومبا ..اكد اصابة اكرم الهادي سليم بـ (حصوة) مزمنة.

< حصوة مزمنة دي اول مرة نسمع بيها.

< انتظروا (الحصوة) الجديدة التي سوف تصيب حارس مرمي المريخ في 11 مارس.

< 11 مارس اليوم العالمي للحصوات.

< ملحوظة : الحضري عرفها.

هوامش

< المشكلة في مباراة القمة القادمة ..ليس في (بشة).

< ولا في (سادومبا).

< المشكلة في (فيلكس).

< فيلكس شغال بالجوز.

< ما عندو قون واحد.

< عبده جابر سوف يكون (مفاجأة) مباراة القمة.

< زول لعاب وحريف ....مشاركته مع مهند الطاهر يعني ان فريق المريخ سوف يكون في حصار كامل.

< زنقة ..زنقة دي ح تبقي عليكم.

< اسألوني منها.

< مباراة الهلال غد مع النيل ..هي مباراة تهم ايضا لاعبي الهلال لأن المباراة سوف تكون بدون جمهور.

< هذا القرار من دون شك سوف يعطي لاعبي النيل دافعا...فهم يلعبون امام الهلال بدون جمهوره.

< لذا على لاعبي الهلال ان يتعاملوا مع هذه المباراة بشيء من الحذر والمسؤولية.

< فريق المريخ مؤهل ان شاءالله للتعثر امام هلال الساحل في اول مباراة للمريخ.

< لا سيما او بورتسودان تعرف كيف تحتفظ بنقاطها.

< هلال الساحل دائما ما يتهاون امام المريخ.

< مطلوب من هلال الساحل هذا الموسم ان يخلص نقاطه من المريخ.

< امام هلال الساحل 3 نقاط ..يجب إلا ييفرط فيها.

< استاد بورتسودان اصبح اكثر اغراء لأن يفقد المريخ نقاطه في اول مبارياته.

< المريخ الي بورستودان.

< توقعوا حدوث مظاهرات في بورتسودان.

< يا محمد الطاهرايلا اعمل حسابك.

< في (هوا) ماشي عليكم.

< مباراة الهلال امام النيل من غير جمهور بروفة جيدة للهلال ليلعب مباراة القمة بدون جمهور.

< يعني الهلال اسبوعين ح يلعب بدون جمهور.

< الشوق سوف (يكتل) جمهور الهلال.

< سوف يحرموا الجمهور من الهلال لمدة اسبوعين.

< مباراة الهلال الافريقية سوف تكون تعويضا لهذا (الحرمان).

< نتمني ان يبدأ الهلال موسمه الحالي ببداية جيدة ومبشرة.

< فريق النيل ...خصم لا يقل عن المريخ في شيء.

< النيل هو مريخ اخر.

< لذلك عليكم ان تعرفوا ان النيل لن يكون خصما سهلا.

< الحضري لو قعد ..سوف يرحل بعد 11 مارس.

< يا الحضري ما تضيق...عشان احتمال كبير حسام البدري يمشي معاك.

< المباريات القادمة للهلال ..مباريات (تصفية).

< مباريات تخص لاعبي الهلال وحدهم.

< خبر عاجل: اكيد الحضري سمع عن (فيلكس) عشان كدا عاوز (يخلع).