جمعة تنحي (جمال الوالي) وتجميد ارصدة (الحضري)

من غرائب الاشياء ان (الجمع) الماضية كل الناس تابعوا فيها تدفق الجماهير والشعوب في المنطقة العربية بداية من تونس ثم مصر الي ليبيا والبحرين واليمن.

و..و..و وحاجات تانية حامياني.

وعرفت تلك (الجمع) تباعا باسماء مختلفة مثل جمعة الغضب وجمعة الرحيل وجمعة الصمود وجمعة الزحف...الخ.

وجمعة بكرى المدينة.

وجمعة عبده جابر.

نحن أي حاجة عندنا بي (جمعة).

كل ما اشوف بكرى المدينة ...اقول الله يجيب لينا (الحضري).

نحن يا الحضري عشان نكون واضحين معاك ...ناويين عليك نية كعبة.

ح تفهم حاجة.

والجمعة مشهودة.

كانت ميادين التحرير في مصر ودوار اللؤلؤة وغيرها من الميادين مسرحا لتلك الجمع المشهودة.

واغرب من كل ذلك ان الرئيس التونسي زين العابدين بن على (هرب) يوم جمعة ..و(خلع) محمد حسني مبارك يوم جمعة ايضا.

ويتوقع الناس ان يخرج معمر القذافي من ليبيا في الجمعة القادمة.

ولا ندرى هنا في السودان كيف ستكون الاحوال؟ ...في جمعة الغد والتي سوف يلتقي فيها باذن الله فريقا الهلال والمريخ.

لكن الاغرب من كل هذا ان غدا الجمعة سوف يكون اللقاء بدون (جمهور) في وقت كانت تمثل فيها (الجمع) مسرحا زمنيا للتدفق الشعبي والجماهيري الكبير.

غدا الجمعة... وبما ان في كل جمعة (يتنحي) رئيس عربي نتوقع في جمعة الغد ان يتنحى (جمال الوالي) لا سيما وان جمال الوالي صاحب (خبرة) كبيرة في (التنحي) وهو قد سبق زين العابدين ومبارك في (التنحي).

وبكرة بعد المباراة ...ليكم على تشوفوا مشجع مريخابي شايل ليه لافتة مكتوب فيها (ارحل بقى) وحايم في شارع العرضة.

والعبارة مقصود بيها (الوالي).

سوف يكون مطلب كل الجماهير المريخية هو ان (يتنحي) جمال الوالي ..وانا قلت ليكم (التنحي) ما غريب على جمال الوالي.

الزول دا كل موسم (بتنحي).

بكرة جماهير المريخ ح تقول ما عاوزين (طابق تاني).

ح يشيلوا (لافتة) بهذا المعني.

نحن الطابق التاني بدون (كورة) نعمل بيهو شنو؟.

سوف تصدر غدا عدد من القرارات من قبل جماهير المريخ (الثائرة).

الحضري طبعا ح يكون عنصرا (اساسيا) في الموضوع.

ناس المريخ بعد (الهزيمة) اول حاجة ح يعملوها هي (تجميد) ارصدة عصام الحضري.

الذي حصل لي (وارغو) سوف يحصل للحضري.

او بالمصري كدا.

ما حصل على جمال مبارك الذي جمدت ارصدته في البنوك سوف يحصل على (الحضري).

شايل ليك مليون دولار يا الحضري وعمرك اربعين سنة ..ويسجلوا فيك هدف من (البجراوية).

هدف في محمد كمال ما بجي.

يا ناس بكرى المدينة ..الزول دا كبر في (السن).

دي فرصة ما تفوتوها ...شوتوا من بعيد.

الحضري (هدية) من السماء.

هدية وقعت ليكم في الواطة.

عبده جابر ذاتو عندو كلام.

عندو رأي.

نشوف باقي قرارات الثورة في المريخ بعد الهزيمة ح تكون كيف؟.

شطب موسي الزومة.

موسي الزومة ذنبو شنو؟.

يا زول المريخ دا لو اتهزم بكرة ان شاءالله ح تحصل حاجات كتيرة.

اول حاجة (المجلس الاعلى) ح يمسك المريخ.

المجلس الاعلى في المريخ زي المجلس الاعلى للجيش المصري.

نحن أي حاجة عندنا بي نظام.

نحن ما عندنا حاجة ساكت.

عشان ناس المريخ يفهموا حاجة.

المجلس الاعلي ح يكون فيه (ود الياس) ...طبعا الكلام بعد (تنحي) جمال الوالي.

عشان الانضباط يرجع للمريخ.

نحن ما بندور حاجة كعبة للمريخ.

معقولة في 7 سنوات ...جمال الوالي شال الممتاز مرة واحدة.

لذلك ود الياس اول ما يمسك المريخ اول قرار بعملو بشيل ليك (الطابق التاني).

في واحد مريخابي قال لي والله انتوا يا ناس الهلال (البركة) مالياكم ساكت.

شبعانين بركة.

استادنا السمح دا ...وطابقنا التاني ..وكراسينا ...(مشجع) واحد ما ح يقعد فيها.

عشان تفهموا حاجة يا مريخاب...خلي (الكراسي) تنفعكم.

قلنا ليكم ما في حاجة دائمة في الدنيا دي ..قعدتوا تغالطوا.

اها استادكم دا بقي (خرابة) يا مريخاب ...فاضي.

بس اريت بعد دا تتعظوا.

نرجع لقرارات ود الياس بعد ما يستلم السطلة في المريخ.

شطب فيصل العجب...انت يا فيصل العجب عاوز تلعب لمتين ...تجيب ليك (هدف) في مباراة ودية ...وتقعد على كدا موسم كامل.

لكن انتوا باقي ليكم جمال الوالي دا ح يتنحي.

الزول دا ما بتنحي ..قاعد 6 سنوات (وصيف).

غلبناه جوة استاد المريخ ...وبرة استاد المريخ.

في الممتاز وفي كأس السودان..وبرضو ما عاوز (يتنحي).

جمال دا ما بتنحي ليكم بالساهل.

تذكروا ساعة جمال الوالي دا عمل فيها (اتنحي).

طبعا دي (تمثيلية) ساكت.

والتمثلية الاكبر عملوا ليهم (مسرحية) في قاعة الصداقة...عشان يرجعوا جمال الوالي.

قالوا جماهير المريخ عاوزة الوالي يرجع ...والروابط طالبت بي عودته.

وجمال الوالي ذاتو صدق.

المشهد دا نحن حفظناه.

ناس سادوبما يخلوا جمال الوالي (يتنحي)...والجماهير المسكينة ترجع الوالي.

نحن نشيل.

وهم يرجعوا.

في استاد المريخ نشيلوا برة ...(تنحي) عديل.

في قاعة الصداقة يحنسوه عشان يرجع.

الفيلم دا نحن حفظناه.

نقشناه.

بقي فيلم قديم.

نهاية الموسم (يتنحي).

بداية الموسم (يرجع).

لكن السنة دي الحكاية اتقلبت (التنحي) ح يكون من الاسبوع التاني.

في قرار نسيتو ليكم.

في قرار ح يطلع الساعة عشرة وربع.

قرار فوري.

قرار مستعجل شديد.

قرار اقالة حسام البدري.

واقالة عماد النحاس.

فريقكم الزي (ليالي الحلمية) دا ح نفرتكوا ليكم.

انا قلت ليكم الكلام دا قبل كدا.

قلت ليكم ناس حسام البدري ديل من (الاسبوع التاني) ح نخليهم (يتراوحوا).

ما عاوزين أي (حضري) هنا.

خليهم يمشوا يشوفوا (ثورتهم) وين؟.

بعدين الحضري دا في بورتسودان جابو فيه قون من الحدود الشرقية.

في ام درمان يعمل شنو؟.

قالوا ليك (جكسا) الجاب الهدف في الحضري من نص الملعب تمرين المباراة ما شارك فيه.

حالتها دي بدون (تمرين).

يا زول تمرين شنو؟.

الزول دا قالوا ليك ليه شهر ما اتمرن مع ذلك جاب ليه هدف في الحضري من (طوكر).

هدف دا وإلا (نسيان).

غايتو حسن شحاتة لو شاف الهدف الذي سجل في الحضري دا ...تاني ما بختاروا ليكم في المنتخب المصري.

حارس عمرو اربعين سنة انا ما عارفو جاء السودان يعمل شنو؟.

حامد بريمة لو متابع الاحداث كان رجع يلعب تاني.

حامد بريمة لو كان بيلعب في المريخ الي الان بالنسبة للحضري دا كان ممكن يلعب (مراحل سنية).

يا بريمة والله اعتزلت ساكت.

الناس القدرك الي الان بيلعبوا.

ساكت استعجلت يا حامد بريمة.

ملحوظة : لكن بكرة ح تفهموا حاجة.

هوامش

اهلي شندي خسر للمرة الثانية في الممتاز.

الاهلي دفع ثمن اللعب في الدامر.

كان من المفترض ان يكون استاد شندي جاهزاا لاستقبال مباريات الاهلي التي جدولت لتلعب في ارضه ووسط جمهوره.

لكن برضو ما مشكلة.

ان شاءالله الاهلي شندي يستعدل من الاسبوع الثالث.

الارسنال (برلوم) في الممتاز.

انتظروه من الاسبوع الثالث.

الكابتن عبدالسلام حميدة اصابه بعض الرشاش من كتابتنا السابقة من غير قصد وعبدالسلام حميدة يشهد له تاريخه بالوفاء والاخلاص والتضحية من اجل المريخ.

بل ان عبدالسلام حميدة كان يمثل المريخ لاعبا وهو (مصاب) في رأسه ويذكر الناس له انه كان يلعب ورأسه ملفوف بعصبة بيضاء.

كل الاعتذار لعبدالسلام حميدة الذي هاتفته ووجدت فيه روح المريخ القديمة ...عندما كان المريخ (مريخ).

قبل الطابق التاني.

ناس عبدالسلام حميدة ديل كانوا بيلعبوا حرارة قلب ساكت ..وكانوا ما بشيلوا (حافز).

ما عندهم حاجة اسمها (مرتب).

وقد دفع عبدالسلام حميدة ثمن اخلاصهم بان خرجوا من الكورة من غير أي شيء يذكر.

ما نقوله عن عبدالسلام حميدة ..نقوله عن عاطف القوز ومنصور بشير تنقا وطارق ومجدي كسلا.

من يلتفت الي اولئك النجوم.

ما وجده عصام الحضري ووارغو لم يجده كل نجوم المريخ في الزمن الماضي.

يلمها جمال الوالي وياطاها (الحضري).

لكن الحضري حسابنا معاه ح يكون تقيل في مباراة الغد.

ان شاءالله (الحضري) يلعب لينا.

بالمناسبة بكرة ان شاءالله سوف احدثكم عن رؤية هيثم مصطفي حفظه الله ورعاه لمباراة الغد.

هيثم مصطفي افضل من يفكر قبل مباراة القمة.

الحراك الاداري من قبل مجلس ادارة نادي الهلال يجب ان يكون اكبر من هذا الحراك الذي نشهده للمجلس الجديد الان.

الامين البرير مطلوب منه حراك اكبر.

خسارة الهلال لا قدر الله من المريخ غدا سوف تهز المجلس الجديد وتجعله في مهب الريح.

لذلك فان الانتصار غدا اكثر شيء يثبت المجلس المنتخب.

الامين البرير عارف شغل الكورة.

وشغل القمة تحديدا.

معظم لاعبي الهلال عاوزين حقوقهم المادية.

المجلس يجب ان يوفر ما يطلبه لاعبو الهلال ماديا ليكون الانتصار في الغد ان شاءالله كبيرا.

في وجود فوزي المرضي نثق في انتصار الهلال.

على عادل ابوجريشة الابتعاد من (المنطقة).

ما عاوزين نشوف ابوجريشة في الكنبة.

وغدا ان شاءالله تجمد ارصدة (الحضري).

وغدا ان شاءالله (يتنحي) جمال الوالي.

وغدا ان شاءالله اقالة (حسام البدري).

وغدا ان شاءالله (هروب) عماد النحاس.

ونحن أي حاجة عندنا بي نظام.

نحن ما عندنا حاجة ساكت.

بس اصبروا.

بكرة الطابق التاني ما ح يلقي زول يقعد فيه.

وناس هيثم مصطفي ح يلعبوا بي مزاج.

وعبده جابر ناوي بشكل خاص على (الحضري).

بكرى المدينة وعبده جابر على موعد مع شباك الحضري.

تعجبت من الهجمة التي تتعرض لها قناة قوون.

اول مرة اشوف لي ناس ما بخجلوا من (حقدهم).

هل وصل الامور الي هذا الحد من (الحقد).

متي يخجل هؤلاء؟.

غدا مباراة القمة حصريا على قناة قوون.

قوون فقط.

الما عاجبوا يحضر المباراة في (الاذاعة الرياضية).

خبر عاجل : كل جمعة وانتم منتصرون.

اهو كلام وراجين يوم بكرة والمستطيل الاخضر يفصلنا يا ناصر بعدين المفيد في كلامك كلوا يا ناصر خسارة الهلال لا قدر الله من المريخ غدا سوف تهز المجلس الجديد وتجعله في مهب الريح.

لذلك فان الانتصار غدا اكثر شيء يثبت المجلس المنتخب.

الامين البرير عارف شغل الكورة.

وشغل القمة تحديدا.

معظم لاعبي الهلال عاوزين حقوقهم المادية.

المجلس يجب ان يوفر ما يطلبه لاعبو الهلال ماديا ليكون الانتصار في الغد ان شاءالله كبيرا
ولنا عودة بعد المباراة مباشرة غدا ياناصر

عبد المحسن سيد احمد كتب:اهو كلام وراجين يوم بكرة والمستطيل الاخضر يفصلنا يا ناصر بعدين المفيد في كلامك كلوا يا ناصر خسارة الهلال لا قدر الله من المريخ غدا سوف تهز المجلس الجديد وتجعله في مهب الريح.

لذلك فان الانتصار غدا اكثر شيء يثبت المجلس المنتخب.

الامين البرير عارف شغل الكورة.

وشغل القمة تحديدا.

معظم لاعبي الهلال عاوزين حقوقهم المادية.

المجلس يجب ان يوفر ما يطلبه لاعبو الهلال ماديا ليكون الانتصار في الغد ان شاءالله كبيرا
ولنا عودة بعد المباراة مباشرة غدا ياناصر

سكواها سواها
بالله المسمار كان كيف المهم هاردلك يا باشا والقادم انشاء الله 3مسامير

جمعة تنحي (جمال الوالي) وتجميد ارصدة (الحضري)

جمعة تنحي (جمال الوالي) وتجميد ارصدة (الحضري)

رد: جمعة تنحي (جمال الوالي) وتجميد ارصدة (الحضري)

رد: جمعة تنحي (جمال الوالي) وتجميد ارصدة (الحضري)