دعوة الي (جمعة الخلاص) من الحضري

< مية مرة قلنا ليكم ...مفروض يكون في (تغيير) للنظام في المريخ.

< المريخ يحتاج الي (ثورة حقيقية).

< لا يعقل بعد كل هذا الصرف (الخرافي) ان يخرج المريخ من دور الـ (32).

< وجمال الوالي بعد دا كلو بقول في فضائية قوون امس ان المريخ (ببني) في فريق للسنوات القادمة.

< فريق تبني بي منو؟.

< بـ (الحضري) 40 عاما.

< وإلا طمبل وإلا العجب!!.

< خلوها معقولة شوية.

< بالحضري دا ..يا جمال الوالي إلا تكون عاوز تبني ليك (متحف).

< المشكلة كل مرة بتقولوا المريخ ببني في فريق.

< طيب نحن نقول شنو بالنعيم وجمعة وعبده جابر وبشة وبكرى المدينة وبويا.

< نقول شنو؟.

< المريخ بقي في البطولات الافريقية زي (عابر سبيل).

< البطولة يدخل ويطلع منها زي (المسكول).

< زي الشعرة من العجين.

< زي واحد كدا بتاع كوتشينة ...من الساعة اتنين بفرش تربيزتو.

< يطلع التربيزة.

< ويرش الواطة.

< ويحضر الكراسي.

< ويجيب (ترمسة) الشاي.

< الساعة خمسة (الحريق) بدور ..زولكم بحرق اول زول...بقوم يقعد برة.

< القيم الاول يقبضو شايل 14 ورقة ...فيهم جوكر.

< القيم التاني بقبضو برضو بـ 14 ورقة ..بعد ما يكون جر خمسين غلط.

< هسع جمال الوالي زي الزول دا.

< يجيب في الاجهزة الفنية الاجنبية.

< ويتعاقد مع محترفين كبار في السن...(الحضري 40 سنة).

< ويحضر الاستاد.

< وينظم البطولات ...ويختار الحكام كمان.

< مع ذلك بطلع من دور الـ 32.

< قروشكم دي لو صرفتوها في (الاهلي الخرطوم) كان جاب البطولة.

< واضح انو (جمال الوالي) دا ما مكتوبة ليهو بطولة في المريخ.

< الموضوع دا اقنعو منو.

< لذلك مفروض جمال الوالي دا يخلى المريخ ..يمشي يشوف ليهو موضوع تاني.

< جمال الوالي ما بعمل في المريخ اكتر من (المقصورة).

< يا كافي البلا (المقصورة) العملها ذاتها (طايرة).

< أي حاجة عندو (بطيّر).

< ونحن نظام ..اي حاجة عندنا بي نظام.

< نحن ما عندنا حاجة ساكت.

< لذلك لا بد من رحيل جمال الوالي ....الكلام دا قلناه قبل كدا ..قعدتوا تغالطوا.

< كذلك يجب اقالة الجهاز الفني للمريخ.

< انت يا حسام البدري ..قايل نفسك جايبنك عشان تركب لينا (طبق).

< في مدرب بيلعب بـ (9) مدافعين.

< نحن معاك انو (طارق مختار) ما محسوب في الـ (9) ديل.

< لكن برضو كان لازم تفتح اللعب شوية.

< حسام البدري بلغ به الاستهتار بعد فوز المريخ على انتركلوب في الخرطوم ان سافر القاهرة تاركا الفريق لفاروق جبرة.

< ماذا تنتظرون من مدرب يسافر كل (خميس) الي القاهرة.

< هسع من (ميشو) دا تعاقد مع الهلال ...سمعتو بالغلط ساكت ..انو ميشو دا مسافر الي دولة خارجية.

< إلا اذا كان سفره هذا مرتبط بمهمة هلالية لمراقبة فريق منافس او مراقبة لاعب ينوى الهلال التعاقد معه.

< غير كدا في فترة الراحة ...(ميشو) بكون مرابط في استاد الهلال.

< انتوا حسام البدري دا لقي التذاكر (المجانية) دي ..وبقي كل خميس بسافر الي القاهرة.

< لكن نرجع ونقول حسام (البدري) طلع اسم على مسمى.

< البدري طلع من (بدري).

< من دور الـ 32.

< كان تيجبوا فاروق جعفر...على الاقل كان (جعفر) ليكم شوية من البطولة.

< قالوا ليك حسام البدري في نقطة في صالحو في العقد ...ما بتخلى المريخ يفسخ التعاقد معه.

< المريخ وقع عقد مع حسام (البدري)...يعني يطلع من أي بطولة (بدري) زول يسألو مافي.

< اما الموضوع الذي يجب ان يحسم (مبكرا) ...من (الجمعة) القادمة هو موضوع (عصام الحضري).

< 40 سنة.

< وغرامة 800 الف دولار.

< وخروج من دور الـ (32).

< انتوا يا مريخاب غلطانين ...جايبين ليكم (مدرب وحارس مرمي) دفعة واحدة.

< البدري والنحاس والحضري.

< في واحد قال لي المريخ دا بقي كلو (مصريين).

< قلت ليهو المريخ دا زي (حلايب) منطقة تكامل.

< جمال الوالي مع حسام البدري مع عصام الحضري هدفهم كان واحد.

< الجماعة ديل عاوزين (يقشروا) فقط في الفضائيات المصرية.

< (والله يخلي لينا الوالي).

< الوالي عاوز يتكلموا عنو في الاعلام المصري..وكذلك الحضري والبدري.

< لكن الان المريخ طلع من دور الـ 32.

< وفشل الهدف الذي اجتمع من اجله هذا الثلاثي.

< لذلك انهيار هذا (الترابط) سوف يكون قريبا.

< الهدف الاول الذي من اجله اجتمعوا (انتهي)..ولم يعد هناك داعيا واحد يدعم بقاء البدري والحضري.

< انتوا قايلين يا الحضري ويا البدري جمال الوالي جايبكم ليه؟.

< عشان الاعلام المصري ..(ومصطفي الاغا).

< اصلو الوالي شبع من (الاعلام السالب).

< زولكم عاوز الاعلام المصري يتكلم عنو.

< خلاص راحت عليك يا جمال الوالي.

< جمال الوالي (هين)...المشكلة الحضري.

< الجمرة الخبيثة.

< 40 سنة.

< وغرامة 800 الف دولار.

< الزول دا يتخارجو منو كيف؟.

< اعملوا ليكم (مظاهرة).

< لا بد من ان تخرج جماهير المريخ الجمعة القادمة فيما يسمى بـ (جمعة الخلاص).

< جمعة الخلاص من (الحضري).

< الحضري دا عاوز ليهو (جمعة) براهو.

< بي اخوى واخوك ...الزول دا ما بفوت منكم.

< إلا تشوفوا ليهو (جمعة).

< ونحن بنكلم ليكم (الجزيرة)...والعربية ذاتها ما بتقصر معاكم.

< لكن بيني وبينكم الحضري (جمعة) واحدة ما بتفككم منو.

< دا عاوز ليهو (17) جمعة...عشان يرحل.

< هو لو ما (لايوق) بيلعب الي ان يصل عمره (40) سنة.

< لكن جمال الوالي اوعى يغشكم ...يفشل ليكم (جمعتكم).

< جمال الوالي ما يقول ليكم ح نعلى (سور) الاستاد.

< قديمة.

< انتوا تعلية السور عاوزين بيها شنو؟.

< شن طعم (التعلية) وفريقكم بطلع من دور الـ 32.

< اوعى جمال الوالي يقول ليكم ح نعمل ليكم (مقصورة) تانية في المسطبة الشعبية.

< قديمة.

< شفتوا لو قال ليكم أي (مشجع) مرخابي ح نعمل ليهو (مقصورة) في بيتو ...ما تواقفوا.

< شن طعم (المقصورة) وفريقكم بطلع من دور الـ (32).

< اوعى الوالي يقول ليكم ح نجيب (محترف) كبير.

< قديمة.

< جبتوا كلتشي ..وجبتوا وارغو وجبتوا الحضري ..عملوا شنو؟.

< برضو طلعتوا من دور الـ (32).

< اوعى الوالي يقول ليكم ح نظم طولة (سيكافا).

< قديمة.

< انتوا (سيكافا) دي كل مرة يغشوكم بيها.

< المشكلة انكم بتصدقوا.

< ح يجيبوا ليكم (بالونات كبيرة) والعاب نارية ...وانوار تطفي وتولع.

< والاعلام السالب بكرة بقول يا سلام على جمال الوالي ...(جاب لينا البالونات).

< وانتوا تاني ح تنسوا.

< وترجعوا تتحدثوا عن (الحضري).

< قبل كدا ...قعدتوا تتكلموا عن (وارغو).

< قلنا ليكم وارغو دا ما نافع ...وما بقدم ليكم حاجة.

< قعدتوا تغالطوا.

< السنة كلها تغالطوا.

< في النهاية تمت (اعارة) وارغو الي ليبيا.

< وهذا دليل (من اهله) يثبت فشل وارغو.

< هسع في موضوع الحضري ..قلنا ليكم نفس الشيء ...ما عجبكم كلامنا.

< والحضري قدامكم ...يشارك مع المنتخب المصري وهو (طيش) لمجموعته في الوقت الذي نجد فيه المنتخب السوداني متصدرا مجموعته مع المنتخب الغاني.

< والحضري يخرج المريخ الان من دور الـ 32.

< انتوا عارفين لو اكرم الهادي سليم موجود.

< اكرم (الحصوة) لو كان موجود في كشف المريخ وشارك في الضربات الترجيحية ...كان صعد بيكم.

< اكرم ما في حارس بلحقو في (الضربات الترجيحية).

< طيرتو (اكرم) وجبتوا الحضري (40) سنة.

< عمر اكرم × 2.

< و800 الف دولار (غرامة).

< والله لو جمال الوالي دفع (الغرامة) كان المغصة (كتلتكم).

< 800 دولار تجيب ليكم اربعة حراس.

< تجيب ليكم شركة حراسة (امريكية) كاملة.

< الحضري دا (تورتة) ابوجريشة كتيرة عليهو بعد الخروج من دور الـ (32).

< عاوزين بعد دا تدفعوا ليهو (800) الف دولار.

< لو دفعتوا 100 الف دولار لي محمد كمال ببقي افضل حارس في القارة الافريقية.

< محمد كمال شنو؟.

< مائة الف دولار دي لو دفعتوها لي (مشجع) بكون اخطر من (الحضري).

< مفروض الهلالاب يقولوا (الله يخليك لينا يا الوالي).

< بدل ما يقول الكلام دا (عصام الحضري).

< فعلا اكتر ناس مستفيدة من وجود الوالي في المريخ ...هم الهلالاب.

< حسام البدري فشل في الاهلي المصري احضره جمال الوالي.

< هرب الحضري من الاهلي.

< وفشل الحضري مع سيون.

< وفشل مع الاسماعيلي.

< وفشل مع الزمالك.

< وبرضو جمال الوالي جابو بي (غرامتو).

< الله يخلى لينا الوالي.

< وابوجريشة برضو.

< ابوجريشة هسع ذنبو شنو؟.

< نسيت اقول ليكم حاجة مهمة.

< المريخ عسكر في مصر لهذه البطولة ...مصر (ولعت).

< وعسكر المريخ في ليبيا ايضا ...وولعت ليبيا.

< ولولا ان الهلال سافر مع المريخ الي (انغولا).....انغولا ذاتها كانت بتولع.

< طيب (اليمن) مالها؟.

< اليمن قالوا طائرة المريخ في طريق العودة مروا على محيطها الجوى.

< في واحد قال لي قول لي (اوباما) دا اعمل حسابك...وإلا...

< قلت ليهو وإلا شنو؟.

< قال لي وإلا ح نودى (المريخ) يعسكر في امريكا.

< عشان ناس امريكا اليوم التاني من وصول المريخ يطلعوا الشارع ويقولوا : (الشعب يريد تغيير النظام).

< غايتو ناس (القاعدة) لو عرفو النظرية دي بدفعوا تكلفة معسكر المريخ في امريكا.

< ملحوظة: نحن ممكن نشارك معاكم في (جمعة الخلاص) بالاناشيد الثورية.

هوامش

< موسي الزومة لاقي (الضربات) الهملة دي ..ويضيّع فيها.

< الحكم برة ما بقصر معاكم.

< اخبار الهلال مقطوعة.

< تقول الهلال كان لاعب مباراة (سرية).

< لو ما جبتوا لينا (الشريط) ما بنصدق انو الهلال اتعادل.

< خاصة موقع الكاف قال الهلال (طار).

< طبعا ناس الكاف ما بعرفو المريخ.

< نسبوا (طيران) المريخ للهلال.

< يا ناس الكاف نحن لينا 5 سنوات بنلعب في المجموعات...معقولة نطلع من دور الـ 32.

< سكواها جاب ليهو قون في الهلال ...صرفوه مرتب 7 شهور.

< عشان كدا نام على كدا.

< تذكروا المريخ وقت فاز على الهلال في الممتاز جمال الوالي عمل شنو؟.

< جمال الوالي حفز اللاعبين بـ (60) الف دولار.

< عشان كدا موسي الزومة بقي يعاين في الكشافات ويهدف.

< تاني يلعبوا ليه؟.

< المريخ السنة دي كلها تاني ما بركب ليهو (طيارة).

< إلا طيارة لي (بورتسودان).

< لكن جمال الوالي دا ما بقصر معاكم.

< يمكن (شندى) يوديكم بي (طيارة).

< قناة الشروق ..جابت للمريخ الهوا.

< الغريبة جمال الوالي بنقل كور المريخ في الشروق ..وبصرح في قناة قوون.

< طيب انت ما تصرح في (قناتك).

< قالوا ليك كابتن فريق انتر كلوب الانغولي قال بعد المباراة (الله يخليك لينا يا الوالي).

< مواجهة الهلال القادمة مع الافريقي تحتاج الي ترتيبات واستعدادات خاصة.

< تجاوز محطة الافريقي يعني ان الهلال سوف يحلق في مرحلة المجموعات في البطولة التي يحبها.

< تاني ح نلعب في المجموعات.

< فريق الافريقي ليس بالخطورة التي يروجونها عنه.

< ناس بشة وبكرى المدينة وسادومبا وكاريكا وفليكس قادرون على حسم الافريقي في الخرطوم.

< الانتصار على الافريقي على اسوأ الفروض يجب ان يكون بثلاثية نظيفة.

< مجلس ادارة نادي الهلال عليه ان يفتح عينه منذ الان.

< الافريقي ضحيتنا القادمة.

< هدفنا واحد.

< وهو اخراج الافريقي من بطولة الاندية الافريقية.

< عاجل: ناس الحضري ديل بس يقعدوا يتفرجوا...ويستعدوا للامل عطبرة.

تتسرعوا وتصفوا المريخ بالضعف لأنه أذاقكم المر في آخر مباراتين للقمة!

خسارة المريخ أحيت مضاريب سكواها بعد موات.

آخر خبر: أسوأ ما في خروج المريخ أنه يؤدي إلى (تضخم) الصفر الدولي!

[b]اخي العزيز محسن .. نريدك أن تقول لهم .. كم مات من قومٍ هموا منك أرفع .
وليس التطاول رافعاً من أحد منهم .. فشيمة أهل المريخ أن تتواضع لهم ..
وقل لهم هكذا علمنا مريخ البطولات القادر علي تحويل الهزيمة إلي نصر وهذه
ليست نهاية الدنيا .. بل إن نهضة المريخ سوف يبدأ من هنا .. .............
ولا أنسي أن أقول لك دعك من كتاباتهم فهم دائماً يراهنون علي كرههم لهذا
المريخ العظيم فإذا فشلوا كان في ذلك موتهم وعذابهم ونهايتهم وروحهم
الرياضية التي لا تعرف إحتمال النصر وإحتمال الهزيمة .... ودمتم بعافية ..
..........................( أبو رامي ) .................[/b]

دعوة الي (جمعة الخلاص) من الحضري

دعوة الي (جمعة الخلاص) من الحضري

رد: دعوة الي (جمعة الخلاص) من الحضري

رد: دعوة الي (جمعة الخلاص) من الحضري