قصيدة .. وشاعر .. وفنان

القصيدة الخالدة : احرموني ولا تحرمونى
كلمات الشاعر الرقيق : محمد ود الرضي
والتى قال فيها :
عل راء الريم تبقى لام
وبرضي قابل الظلم احترام
ويوماً سموما ويوما غمام
00-------------------------00
احرموني ولا تحرموني سنة الإسلام السلام
--
عطفكم يا من الموني كالأشعة الاسهم رموني
والشجون بالليل نادموني الأنين والنوح علموني
لو معنعن قولي كلموني حبي طاهر لم تظلموني
برضي قابل الظلم احترام
--
يا النفوني كفى أعرفوني ساهي ساهر ساجات جفوني
في هواكم يا من جفوني لا الوم إن لم تنصفوني
انعكاس الأحوال كفوني أيضا الأيام عرفوني
يوم سموما ويوما غمام
--
كل ما النسمات عطروني فاجأوني دموع مطروني
رب اغفر للعكروني في وداعة الباقي العروني
رب وقت يتزكروني أو يقول القايل دروني
أو يحدث عني المنام
--
طاف خيالك والليل طافر شفت بدره المتجلي سافر
صك غاضب لقى دمعي دافر قالي طبع الريم أصله نافر
فاله حجلة وعقده الأظافر قلت عليه تريم النوافر
عل راء الريم تبقى لام ....
00----------------------00
قصيدة .. : فلق الصباح
للشاعر الوطنى الكبير : خليل فرح بدرى
00-------------------------------------00
فلق الصباح قولي ..
أهو نورك لاح خلي ..
يا خفيف الروح ..هو هذا نداك أم ندي الأزهار ..
من جنان رضوان أصلك ..
لذا كل ربيع فصلك ..
إتنفس فوح ..تتنفس ناس ورياض وبحار..
ما ألذ نسيم وصلك ..
ما رأيت يا جميل مثلك ..
يا بليبل الدوح .. هو هذا هواك أم هوي الأسحار..
أنت روضة وليك زهرة ..
ولا كوكب وليك بهرة ..
ضمخوك للجبير زعفران وعبير ..إنت نار في بهار..
صبغ الخدين حمرة ..
بعد ساعة يشوف صفرة ..
الإصفرار دة كتير .. أخجلوك يا أمير ولا نمت نهار..
صبح البستان شايل ..
شجر الرمان مايل ..
السلاف في الدنان .. والكنار في حنان .. والهزار في هزار..
إنت كالطاؤوس خائل ..
كبرياءك وفيك خايل ..
أنزلت إنت كمان .. غني وقول يا زمان وين حبيبي آزار..
ما عرفنا عدوك زاهل ..
ولا لسه غلام جاهل ..
متهلل صيف شتا عندك كيف في اللعب بالنار ..
في لهيبك أشوف ساحل ..
كالفراشة اجيك راحل ..
أنا خايف كيف .. يا لطيف الطيف أهوي وأبقي نار ..
فلق الصباح نور ..
في نحور الغيد صور ..
جمعن في الدور .. من خدود وبدور صدفة ومحار ..
عزة شوفي الحوش نور ..
بي نجوم الليل غور ..
يا صباح النور ..علي العيون الحور .. والخديد الحار..
عزة قومي كفاك نومك ..
وكفانا دلال يومك ..
إنت يا الكبرتوك .. البنات فاتوك .. في القطار الطار ..
عزة شوفي شباب قومك ..
سبقوك علي كومك ..
بت رجال ولدوك .. للقبيلة هدوك .. إنت عز وبطار ..
الجمال في كمال وصفك ..
أدبك وجمال خلفك ..
الضمير كالعود.. والعيون السود .. في البطانة كتار ..
منزلك عنوان ظرفك ..
نوريه يصون ألفك..
زعلك يا أم خدود.. سوي ليهو حدود .. منو يا ستار ..
00-----------------------------------------------00
قصيدة : قسم بي محيك البدري
للشاعر العملاق : صالح عبد السيد (أبو صلاح )
وقد تغنى بها الفنان الموسيقار : محمد وردى
00..................................00...............................00
قسم بي محيك البدري
غرامك منه ضاق صــــــدري
حبيبي بي العلي تــدري
--
المَحَي نور ليلة القدر
نصب قوس حاجبه لي غــدري
و معاك في داخل ألخدري
فؤادي المالكه من بـــــــــــدري
--
حياتي ونعمتي ويسري
رضيت لو يرضي بي أســــــري
وفرض يا دموعي تنتثري
إذا منــه النسيــــم يســــــــــري
--
حمام الأيك والقمــري
يصيح ينبيــــك عــن أمـــــــــري
وبين نواعسك السمري
روا يحي وفاكهتي وخمــــــــــري
--
أراك وتوفي بي نذري
دموعي ألفي الوجــن تـــــــــزري
حنانك ما عليك وزري
أنا قاسيت الهوى العــــــــــذري
--
صحيح لجروحي لا تبري
هواك برضــــــاي مـا جبــــــــري
وبسيمات فاهك ألتبري
يا جمــيل كم قللت صبــــــــــــري
00.................................................00
قصيدة : ما بنسي ليلة
للشاعر الرقيق : محمد بشير عتيق
*----------------------------------*
ما بنسي ليلة كنا تايهين في سمر بين الزهور
أنا وأنت والنيل والقمر
0-0
وين يا جميل يوم كنا تايهين في سمر
من أنسنا اتمتعنا بي جني الثمر
كم قلبي بالأنفاس لإنفاسك غمر
الجو سكر من ريك إتعطر خمر
0-0
ما بنسي ليلة كنا في شاطيء النهر
نتعاطي خمر الحب بكاسات الزهر
والبدر مزق ظلمته و سفر ازدهر
في النيل سطع بي نوره واتقطع بهر
0-0
الليل هدا والجو صفا وغاب الأثر
النسيم بجيب من توتي أصوات المتر
أتا يا جميل بي صوت ضميرك المستتر
من شعري كم أسمعتك ألحان في وتر
0-0
شفت النجوم تنظرنا بي نظرة شذر
لما القمر في أفقه بغيابه إعتذر
صافين عفاف ياحبيبي خالين من قدر
في هوانا لا واشي ولا مراقب حذر
0-0
أنا بي غرامك ياحبيب دمعي انفجر
وأنا بي غناك أيقظت سكان الشجر
قبال أراك أنا كنت في حيرة و ضجر
اليوم حظيت بلقاك يا ظبي الحجر
*........................................*
القصيدة الحالمة : ياناعس الاجفان
كلمات الشاعر الرقيق : محمد بشير عتيق
00------------------------------00
ياناعس الأجفان أنا من صفاك مسحور
بالله إنت ملاك ؟ ولا من حسان الحور
تذرف عيونى بحور اقضى الليالى قيام مابين شوق وهيام
وارعى النجوم فى سحور
وفؤادى آه منحور مقتول بغير سلاح وأقول بكل صراح
سببى العيون الحور
فيك الكمال محصور أكظمت كل حسود وحسنك مقامه
يسود على كل جيل فى عصور
وطرفك لحاظه تريع أسدًا شجاع وهصور
ليك نفرة الغزلان مع جبرة الفرسان فى هيبة المنصور
أهيف رشيق متبور تتهادى تيه ودلال مابين غرف وظلال
نعمة وترف وحبور
وسهمك على مهبور إيه ذنبى غير هواك أنا ياجميل
بهواك من قلبى مامجبور
يا البى العفاف مشهور
ندك عبير فياح وقوامك المياح
أينع ثمر وزهور
فى حبى دمعى جهور
أنا فى دجاك ياليل نجمك بقالى خليل
فارقت نومى دهور
أنا لى زمن مأسور
هجرانى ماهماك ياللى قاسى لماك
من طول جفاك محسور
وحياة خديك وجيدك وطريفك المكسور
أنا شعرى مابيوفيك مهما أبالغ فيك
منظومى والمنثور
* * --------------------------------* *
القصيدة : يا مداعب الغصن الرطيب
للشاعر الكبير : سيد عبد العزيز
0------------------------------------0
يا مداعب الغصن الرطيب
في بنانك ازدهت الزهور
زادت جمال ونضار وطيب
**---**
يالمنظرك للعين يطيب
تبدل الظلمات بنور
وتبدل الأحزان سرور
إن شافك المرضان يطيب
**---**
تعجبني والشئ العجيب
هادي وأليف ماك النفور
بحصنك صنت السفور
والحسن والأصل النجيب
**---**
أنا وأنت في الروض يا حبيب
راق النسيم وحلى للمرور
بقى أحلى من ساعة السرور
وأدق من فهم اللبيب
**---**
والروضة في موضع خصيب
حضنوها واتلفوا النهور
ترى فيها انواع الزهور
من كل لون اخذت نصيب
**---**
يانع ثمارها وغض وطيب
اشبه بربات الخدور
الاتبرجن في يوم حبور
زادن جمال ونضار وطيب
**--------------------**

القصيدة الجميلة : لى نية فى قمر السما
للشاعر الكبير : سيد عبد العزيز
لنسمع ما يقول :
صفاء بهجتك ما أعظما
شوفتك ظمأ وتروي الظما
الذكرى دايما مؤلمة
لله أموري أسلما
للقمرا مالقيت سلما
**----------------- **
مقاصدي آه ما أجسما
لي نية في قمر السما
أبني الفكر وأهدما
والعين تسيل دمع الدما
والدمعة مرات أعدما
ليه حقيقة روحي اقدما
ليته يرضى ويخدما
حواسي مالها كلما هبت نسيمة تألما
روح يانسيم لها كلما
أنا المعذب لـ اللما
عجبا ملاك ساكن حما
في حماية الحما اتحمى
منعوا الدلال يظهر حما
هلك النفوس وأبا يرحما
ومن هجره يا حامي الحمى
كم من محاسن وأعظما
فيك خايلة خلقة منظمة
زي معنى شاعر ناظما
صفاء بهجتك ما أعظما
شوفتك ظمأ وتروي الظما
حي المسالمة ومسلما
ذكراها أنسي أقل ما
الذكرى دايما مؤلمة
لله أموري أسلما
للقمرا مالقيت سلما
لي نية في قمر السما
**------------------**
كلمات الشاعر الرقيق /محمد بشير عتيق
والقصيدة الرائعة / أذكرى أيام صفانا
-------------------------------------
أذكري ايام صفانا واذكري عهد القاء
والليالي الفي حبور
اذكري ايام صفانا والليالي الفيها متبادلين وفانا
جينا بي كل اقتراب
من حديث يشفي الجراح
بي مغازلة وانشراح
والقمر بي ضياهو آالق والنسيم يهدينا انفاس الزهور
كنا داخل روضة مافيش حد سوانا
غير ان القمري يهتف بي هوانا
من اهازيج فنه يسمعنا اسطوانة
اما ارواحنا الخفاف
رافلة في اثواب عفاف
زي عرائس يوم زفاف
والنجوم بي عيون تسارق في اشتياق
تنظرنا من خلف الستور
الرياض مبتهجة داخل اقحوانا
والزهور نديانة تستقبل اوانة
زاهية يانعة ورايعة في توب ارجوانا
والنهر لينا اقترب
والطيور تسجع طرب
عاملة موسيقة قرب
انحنا صار مجلسنا عامر في طرب
في قبطة في نشوة وحبور
يا أمير الحسن يا سامي المكانة
من عواطفك حبي لو فاقد مكانة
اهدي لي تفاحة بس او برتكانة
فهي غير شك مرضية
بيها اقتبس الضياء
بل اذوق طعم الحياة
أنت ملهمني الاغاني
وانت مصدر فني
إحساسي وشعوري
0---------------------------------0
الزمان زمانك : عبد الرحمن الريح
أهدى لي مـن فـضـــلـك نـظـرة فى رمانك
يا الفريـــــــد فـى عصرك قلبى فاقد أمانك
حرام عليك تهجرنى وترضى بى حرمانك
بالكـمــال شــرفـــــت مـنــاطق أم درمانك
وبالجمال امــتــــــزت عـلـى شباب أزمانك
يا أنيس الصـيـــــــد أنــا فى الغرام إنسانك
إنت روح شعـــرى وأنا فى الشعر حسانك
إن قصدت هلاكــى تـجــدنـى مـن فرسانك
وإن عـطــفــــت عــلـــى ذاك مـن إحسانك
يا الحنـيـــن فـى نفـسك قولى ويـنه حنانك
شلت قلـــــــبـى ودمــى خـضـبـت بيهو بنانك
إن مرقت تـــمــر فى الـروض عـلى أفنانك
النجوم تـتـــــــغــزل فــى بـيــــاض أسنانك
0----------------------------------------0
مع الشاعر المرهف : عبيد عبدالرحمن
وقصيدته الرائعة : أنا ما بقطف زهورك
آداء الفنان العبقرى : إبراهيم الكاشف
*.................................................*
أنا ما بقطف زهورك.. بس بعاين بعيوني ....
يا الغصن الفي نهورك ..
ويا البدر الفي خدورك..
مترقب ظهورك..
أتأمل في محاسنك..
وأتمتع بمناظرك..
وأتوسع في فنوني ....
لعبت بي دورك..
وأصبحت مسحورك..
سبحت في بحورك..
وعرفت أوزانك..
وعزفت ألحانك..
أهات تواليني....
لا زلت مأسورك..
وما قادر أزورك ..
ملأ العيون نورك ..
كشف الظلام بسمك..
واتجلي لي رسمك..
شخصك ملا عيوني....
أضناني تأثيرك..
وما بشكي لي غيرك..
أعياني تفسيرك..
يا الرمز الحيرني ..
وهواك صيرني..
أتحدي العزلوني....
يا الغالي موهوبك..
يالراقي أسلوبك..
الناس يأنسوبك..
يالعالي تعليمك..
أنا من مظاليمك..
أيه ذنبي وريني..