البلد..نورت

*تعود ان يأتي (المساء) الي حلتنا ...وحليمة تمشط الشوارع بحثا عن (معزتها) السوداء.
*هي في ذلك الموعد ...منذ اكثر من عشرين عاما ..بتفتش علي (غنمايتها) ...تتبدل الاغنام عاما بعد عام ..ام هي فلا ..حتي (توبها الاحمر) المشجر لا يتبدل.
* اذا سافرت وعدت الي الحلة بعد عشر سنوات سوف تجد حليمة هي ذاتها حليمة ..بثوبها الاحمر المشجر ..وبحثها الدائم عن (الغنماية) السوداء ..وشكوتها المستمرة من الفتر وضعف النظر ..وزيادة سعر السكر.
*وهي مازالت تشكي عن ولدها الذي يعمل في الخرطوم وما بضرب ليها.
* قالت بتلقي اخبارو في بيت بنت عمتو التي خطبها وسافر.
* وكانت (السرة) في كل مساء ..عندها (جدادة) رايحة ..بتقلب ليها الحلة قلب ..في النهاية تلقاها وتشكي منها.
* هكذا كان يأتي المساء ..في تلك القرية ...(حاج احمد) لاحق الصلاة ..يهرول في خشوع..وانت كلما استوقفته للحديث معه يقول ليك : (المغرب وقتو ضيق).
* ثم يضيف حاج احمد ..(بجيكم اشرب معاكم شاي المغرب..كلم ابوك ما يطلع).
*وتأتي في هذه اللحظات الطفلة (نهي) ..لم تتجاوز الخامسة ..لكنها فصيحة ..مستعدة ان تحدثك عن كل شيء ..بداية من وعد بلفور (وعد من لا يملك لمن لا يستحق) وحتي خلايا تنظيم القاعدة في افغانستان وباكستان واليمن.
* نهي وسط كل هذه الثقافات ..لا تنسي ان تحدثك عن مصطفي النقر ومحمود سامي البارودي وجيمس بوند.
*لا اعرف لماذا كانت تجمع بين حمد دفع الله واشهر البومات مايكل جاكسون (Free willy).
*ربما لأنها طفلة مشاغبة.
* والمساء يتمهل..او يتسكع ..رغم ان (الامسيات) سريعة الافول ..و(عاصم) طفل اخر يقفز من قوز لي قوز ..ويغني يلتق اغنية عبدالعزيز محمد داؤود في اغنية حسن عطية ..( كنت شايف الجنة في نظرات عينيهو.. وكل أسباب السعادة الكنت بتمناها ليهو..ثم يدخل بدون فاصل موسيقي في يا الحرموني شوفتك).
* ويا الحرموني شوفتك ..كان بتمها بي (أوتذكرين صغيرتي ..او ربما لا تذكرين).
* يا ولد انت الكلام دا بتلتقو من وين؟...ديمة بخش في شمطة مع اخوه الكبير.
*عاصم كان طفل (فرحان) ...لا يزعجه في هذه الدنيا غير شيء واحد ...تزعجه فقط المدرسة.. عندما يتذكر بكرة المدرسة واستاذ عباس الذي لا يهضمه ولا بتبلع ليه..فانه يحس بان هذه الدنيا اضيق من خرم الابرة.
* وخرم الابرة ذاتها في الهند ..سكنوا فيها.
* عاصم كان بعتقد ان مشاكل الدنيا دي كلها سببها الاستاذ عباس...كثيرون يظنون ذلك في اساتذتهم.
* تلك القرية ..التي تتجمع كلها في دكان فتح الرحمن بعد المساء ليأخذ اهلها تباعا الشاي والسكر والصابون والشعيرية والكبريت والدقيق.
* يا فتح الرحمن ابوي قال ليك : ادينا بسكويت وقيدو في الكراس ..مع حساب الشهر الجديد...حساب الشهر الفات قفلو علي كدا.
* يا فتح الرحمن انت (الطحنية) الجبتها اخيرة دي ما سمحة ..تاني ما تجيب لينا.
* يا فتح الرحمن ..يا فتح الرحمن ..يا فتح الرحمن.
* فتح الرحمن عيشتو تطير.
* فتح الرحمن من الجري من الرف للدرج بقي زي (البطيخة) البفتحوها للعرض ...البشتري والما بشتري يتفرج فيها.
*ناس القرية ديل كانوا بختلفوا في اي شيء ..في السياسة فيهم الانصاري وفيهم الختمي وفيهم العندو اولاد عاوز يربيهم وبقي مؤتمر وطني.
* في الفن فيهم البسمع عثمان حسين وفيهم البسمع محمد وردي وفيهم كمان البسمع تامر حسني.
* في الادب فيهم البجادلك بي (بعض الرحيق انا والبرتقالة انت) ..وفيهم البحدثك عن (البرجوازية الصغيرة) ...وفيهم كمان البتكلم ليك عن الفيلم الهندي (kismat konnection).
* الناس ديل عارفين اي حاجة.
* بختلفوا في اي شيء... لكن في الهلال لا ...كلهم هلالاب ..بي حليمة ونهي والسرة وعاصم وفتح الرحمن سيد الدكان.
*زمان كان معاهم واحد مريخابي ...قالوا من هدف الوحدات الرابع تاني ما في زول شافو.
* اتذكرت حضور هذه القرية ...وصورها والهلال رجع البلد.
* اعتقد ان السكر بقي احلي من اول ..والكهرباء رجعت ...والشفع لقوا (شليل).
* البلد نورت ... المطر ..من الشفقة جات قبل الهلال.
* يا ولد انت ما عارف الخرطوم دي وقت يكون فيها (مطر) ..الفول من الدكان بكمل من تمانية.
*الناس مالها فرحانة؟.
*الناس مبسوطة ...خلاص ح تشوفوا هيثم مصطفي حفظه الله ورعاه ..سيدا كلما هاجموه ناس الوصيف ...رد عليهم بلقب جديد.
* هاجمه البعض من اهل الوصيف في المحروسة ...فرد عليهم ان جاء في موقع قول من افضل اربعة لاعبين وسط في الوطن العربي.
* هيثم دائما يثبت ان خير الامور اوسطها.
*الناس مشتاقة لي (تمريرة) سيدا ... في ناس التمريرة دي بقطروها للعين قطرة.
* بتريحهم في العضم.
*وفي ناس بجيبوها في حفلات عيد الميلاد.
*الناس عاوزة تشوف امبيلي ... قالوا (خوفو) ..سأل منو؟... كان مفتكرو (هرم) هارب من الخدمة الوطنية.
* كابوندي قالوا ..في الطرف الشمال ..حفلتو بتدور من خمسة...الساعة 11 ناس النظام العام بجوا.
* سادومبا طبعا الناس تابعوا (كرتو) اكتر من متابعتهم لمسلسل (نور) ..اكتر من متابعتهم لمسلسل (ايلول)..موسم المطر.
*الهلالاب ديل ما عندهم موضوع ..كرت سادومبا عملوا ليهو قومة وقعدة اكتر من سيكافا.
*غايتو يا الهلالاب ..مع اعتذاري ليكم ..بتعملوا لي حاجاتكم توم وشمار.
*انتوا عارفين الهلال دا لو كان قاعد في البلد ...كان تمرين واحد للهلال بفرتك ليكم (سيكافا).
*الناس عاوزة تشوف تمارين كامبوس ..مشتاقة لي صفارتو ..خططو ..كلامو.
* كامبوس طبعا شبه المقاولين العرب بي فريق المريخ.
*عشان كدا بعد ان اكتشف كامبوس الشبه دا ...طوالي دخل ناس الدعيع وصدام الدروشاب وايفوسا ...وطلع ناس امبيلي وكاريكا والمعز وهيثم وعمر البخيت.
*اصلو المريخ ما عاوز اكتر من كدا.
*بالمناسبة ...(نجيلتنا) كرتها وصلت.
*السياج بقي يقول : سا سا سا سا سادومبا.
*غايتو يا الهلالاب عندكم جنس سور.
* قالوا ليك (السور) بفلع براه ..حكم الرأية.
* راية مين يا عم؟.
*خلاص عاوزين تغالطوا.
* ملحوظة: سادومبا يجقلب ..والكرت ما وصل.
هوامش
*جمال الوالي دا في الاذاعة وفي التلفزيون وفي الصحف ..باقي ليهو فقط يكتب عمود صحفي.
* ماشي علي خطوات صلاح ادريس بالمسطرة.
*ريتشارد (نحن ما رضيناها ليك) ..معقولة ح تقعد كدا من لجنة لي لجنة.
*مباراة الهلال والمقاولون العرب نتمني ان تكون بروفة ساخنة في التشجيع لمباراة القمة.
* المباراة سوف تكون فرصة لروابط الهلال حتي تكون تلك الروابط جاهزة للقاء القمة.
*مطلوب من جماهير الهلال ان تقول كلمتها اليوم ..حتي تقول كلمتها يوم السبت القادم.
*مباراة القمة القادمة سوف تكون تحديا بين جماهير الهلال وجماهير المريخ في التشجيع والمساندة ...وكلمة جماهير الهلال دائما هي الكلمة الاعلي.
* تعودت جماهير الهلال ان تحتفل بانتصارات فريقها في استاد المريخ.
* لذلك فان لها ان تعيد ذكري تلك الاحتفالات في 18 يوليو.
*مازمبي قالوا لو وصل النهائي كان بيأخذ 50 الف دولار ..حسب لائحة سيكافا.
* لكن لو ما وصل النهائي بيأخذ 100الف دولار.
*غايتو سيكافا دي فيها جنس لوائح.
* اللائحة يعملوها قبلها في المنطقة الصناعية.
*معقولة بس يا مريخاب ...تلعبوا الشوط الاول من مباراة المريخ ومازمبي بي لائحة والشوط الثاني بي لائحة ..والزمن الاضافي بي لائحة.
* الطريف في الامر ان جمال الوالي جاء للتلفزيون ليثبت شرعية اللائحة.
*انت قايلنا نحن مازمبي.
* مازمبي ما فارقة معاه ..في كل الاحوال لن يشيل الكأس...ناس اتعشوا وكرموهم وسافروا ..عاوزينو يشيل الكاس.
* يشيل الكاس في البرد دا.
* في مريخابي قال لي ان شاءالله كرت كريم الدافي ما يصل.
*صاحبكم ما عارف انو الكرت وصل ..قبل اللاعب ذاتو.
*كرت شنو ..كمان الدافي عاوز ليهو كرت.
* دا مفروض يسجلوه بي ايصال مخالفة مرور.
*خليفة في مباراة اليوم امام المقاولون يحتاج الي مساندة خاصة من جماهير الهلال.
* وضح ان اللاعب لا يحسن اللعب تحت الضغط الجماهيري لذلك تألق في مصر.
* عليه يجب ان تمنح الجماهير هذا اللاعب الثقة ..بعد ان منحها له مدربه واشاد به لاعبو الفريق.
* كابوندي طبعا طريقو واضح.
* قالوا ناس المريخ الي الان ببحثوا عن طرف يمين بعد ما عرفها بلة جابر.
*الباشا اعتذر.
* سعيد السعودي اعتذر.
* الشغيل اعتذر.
* امير دامر اعتذر.
* عاد الاعتذار بحلكم.
* اهم حاجة في مباراة القمة..كامبوس يعرف يقفل (الحكام) كويس ...حكم الراية بالتحديد عاوز مراقبة قوية.
*خبر عاجل: خلاص يا الهلالاب عاوزين تخلوا اي شيء وتقبلوا علي حكم الراية

البلد..نورت ﻿