مقبرة خمس نجوم

* (غربة في ارض الوطن) هذا احساس كان يعاني منه الهلال في الفترة الماضية.
* في ناس (اتكاعبوا) علينا في (حق الحكومة).
* النجيلة (اتفاسلوا) بيها يا كافي البلا.
* باقي ليكم ناس يمنعوا (الدكتور) من ممارسة رسالته ..ويمنعوا (الموية) ..بكون فيهم امل.
* قونعتونا .....عديل كدا.
* حوالي ثمانية اشهر والهلال بعيدا عن ملعبه...ثمانية اشهر والهلال ينتقل من ملعب الي ملعب في ظل ضيق الملاعب.
* لكن ما نحمد الله عليه ان الهلال رغم ذلك العناء والرهق الذي وصل لمرحلة (التشرد) كان متصدرا ومتقدما في كل البطولات التي يشارك فيها.
* ذلك التفرد الذي كان طابع الهلال وهو بعيدا عن ملعبه من دون شك سوف يتضاعف والهلال يعود الي ملعبه (مقبرة الخصوم).
* رغم المخاوف المصاحبة لافتتاح الاستاد باعتباره انه لم يصل للصورة المطلوبة بعد ..إلا اننا نتفاءل خيرا بعودة الهلال الي ملعبه.
* الاخ المهندس رامي كمال حذر كثيرا من توصيلات الكهرباء في كشافات الهلال واشار الي عدم وجود (مولد) كهربائي قادر علي سد قطوعات التيار الكهربائي عند انقطاعه.
* كهرباء استاد الهلال النقطة الاضعف في الاستاد..لا ادري لماذا صرفت اللجنة النظر منها.
* لجنة تأهيل استاد الهلال رغم الدور العظيم الذي قامت به إلا انها تناست موضوع التوصيلات الكهربائية..لا سيما وان مشكلة استاد الهلال اساسا في (كشافاته).
* الي جانب ذلك فاننا نخشي ان تكون (نجيلة) الملعب مازالت تحتاج الي المزيد من الوقت قبل ان تكون جاهزة لاستقبال المباريات وتمارين الفريق.
* اذا تم افتتاح الاستاد قبل ان تكمل النجيلة دورة نضوجها فان الافتتاح هذا سوف ينعكس سلبا علي ارضية الملعب مستقبلا وسوف يخسر الهلال كثيرا.
* هذه مخاوف نقولها ..رغم قناعتنا ان الهلالاب من باب شوقهم لملعبهم لا يحبون ان يسمعوا مثل هذا الكلام.
* غير ذلك فان اللجنة المناط بها تأهيل الملعب لا بد انها تعرف مثل هذه الابجديات وهي تضم خبراء نثق في قدراتهم.
* لكن الذكري تنفع ....نتمني ألا تكون رغبات الهلالاب شكلت ضغوط علي اللجنة فجعلتهم يعجلوا بافتتاح الاستاد دون ان تكتمل مراحل تأهيله.
* نرجو ان تكون (المقبرة) تحولت الي مقبرة خمس نجوم ...بعد الاضافات التي حدثت في المدرجات باضافة 7 الف كرسي.
* كذلك تحسنت كثيرا مقاعد الاحتياطي التي يجلس عليها الاجهزة الفنية واحتياطي اي فريق.
* شكل الملعب اصبح متميزا بعد السياج البلجيكي الذي اضاف الكثير لجماليات الملعب.
* ناس المريخ عاوزين يطعنوا في السياج البلجيكي لكن باقية ليهم شينة.
* كذلك تحمد اللجنة علي العمل العظيم الذي قامت به في (المضمار) ..ولا ننسي التحسينات التي حدثت خارج الملعب حيث يجري عمل كبير في الملعب الرديف وموقف العربات الخارجي.
* كنا نتمني عمل اكبر في المدرجات ...لكن كفانا فرحا ان العمل في الاستاد سوف يتواصل من وقت لاخر ليصل استاد الهلال للصورة التي نريدها له.
* الذي يهمنا في افتتاحية استاد الهلال وفي احتضان الاستاد للقاء الهلال وكانو النيجيري ان الاستاد سوف يكتمل بحضور جماهير الهلال.
* جماهير الهلال هي الرهان الحقيقي للهلال في المباراة القادمة وهي التي سوف تجمل استاد الهلال وتجعل كل النواقص تكتمل.
* لذلك حق علينا ان نسعد ونفرح بافتتاح الاستاد ، لأن قيمة استاد الهلال في جماهيره.
* اذا كان الجهاز الفني للهلال يضاعف من استعدادته وكذلك يفعل لاعبو الهلال فان المطلوب من جماهير الهلال اكثر من ذلك في المباراة القادمة.
* كفي ان المباراة تقام في (المقبرة) التي تتلهف لاحتضان (الضحايا)..وسيكون باذن الله وتوفيقه (كانو) اول ضحية تزف الي المقبرة في صورتها الجديدة.
* الجميل ان المقبرة تتجهز منذ الان لاحتضان ضحيتها المختارة في 11 سبتمبر.
* تبقي جماهير الهلال اهم عنصر في زفاف الضحايا وفي دفنهم في المقبرة.
* اترك استاد الهلال واتجه الي نقطة هامة عند الهلالاب وهي نقطة تثبت طموح الهلال وحسن تصرفهم.
* هذه النقطة تتمثل في ان كل الهلالاب الان غير راضين علي الهلال (شكليا).
* شكليا دي زي رفض الشكوي (شكلا).
* الهلالاب يظهرون عدم رضائهم عن الفريق وان كان في حقيقة الامر هم راضون تماما عن الفريق وقلبهم مطمئن للفريق.
* لكنهم مع ذلك يشكوا ...وهذا من حسن التصرف.
* فريق اقتلع نقطة من المريخ في ملعبه في البطولة الافريقية وفاز في استاد الخرطوم علي زيسكو ليكون الهلال في الصدارة مع كانو النيجيري.
* مع هذا الهلالاب غاضبون.
* هذا هو الذكاء الذي يتميز به الهلالاب دائما هم يعملون من اجل الوصول الي الافضل.
* في بطولة الممتاز يتصدر الهلال بفضل الله وجهود الفريق ككل بفارق 6 نقاط عن الوصيف.
* تخيلوا ان الهلال يبتعد عن الوصيف بـ 6 نقاط ولولا التحكيم الذي انحاز للوصيف في الرد كاسل وفي بورتسودان لكان الفارق الان بين الهلال والمريخ 10 نقاط.
* والهلالاب غاضبون.
* لا بد من انهم يبحثوا عن الافضل.
* لذلك نقول ان كلمة مرور الهلال هذا العام سوف تتلخص في كلمة (كعب).
* كلمة السر ..الهلال كعب.
* تعاولوا نغش نفسنا ونغش ناس الوصيف ونقول ليهم: الهلال كعب.
* ما كعبة معانا ان نقول ذلك وان نمضي في كل يوم بعيدا.
* المدهش ان شباك الهلال في 12 مباراة متتالية لم تستقبل هدفا.
* لعب الهلال وديا امام المقاولون العرب ولعب امام ناساروا مرتين وامام الخرطوم...ولم يسجل علي الهلال هدفا.
* والهلال كعب.
* ولعب الهلال خمس مباريات متتالية في الممتاز ولم تستقبل شباكه هدفا ..اذ كان اخر هدف استقبلته شباك الهلال امام الامل عطبرة في المباراة التي انتهت 5/1.
* نسأل الله ان يحفظ شباك الهلال من ولوج الاهداف فيها ونتمني ان يحافظ دفاع الهلال وحارسه علي شباك الهلال في مباراة اليوم التي سوف يلعبها الهلال امام الاتحاد مدني.
* في البطولة الافريقية ثلاث مباريات متتالية لم يحرز في الهلال هدفا حيث كسب الهلال اول اغسطس 2/صفر وتعادل مع المريخ وكسب زيسكو 1/صفر.
* تصوروا بعد هذا كله ناس الهلال ما عاجيبهم فريقهم.
* ناس المريخ ديل يتعادلوا في مدني يقولوا ليك ما مشكلة الدوري طويل ...والمطر حدها الركبة.
* في نيجيريا المريخ خسر 1/3 ...قالوا الحكم ...بنعوض في (سنار).
* الامل اوشك من ان يتعادل معهم في ملعبهم وسجل في شباكهم هدفين ..قالوا عادي ...الفريق ماشي لي قدام.
* الغريب ان الامل هذا خسر امام المريخ في الموسم الماضي 6/صفر.
* شفتوا المريخ دا مع كلتشي ورتشارد ووارغو وايداهور كيف؟.
* فريق النيل انهي الشوط الاول متقدما علي المريخ ....المريخاب قالوا المهم الشوط الثاني.
* إحنا مالنا...فريقكم دا احسن فريق في الدنيا ...وماشي متقدم في تصنيف الفيفا كمان.
* صدقوا عليكم الله.
* اخر حاجة نقولها هي ان الكثير من المواقع والمنتديات الرسمية وغير الرسمية توقعت صعود الهلال مع كانو من مجموعة الهلال وهناك من توقع الهلال وزامبي للنهائي الافريقي.
* كل هذه الاشياء نتمني ناس الهلال ما يشتغلوا بيها.
* قلنا ليكم كلمة السر : الهلال كعب.
* ملحوظة: والهلال كعب لكن.
هوامش
* مباراة الهلال اليوم امام الاتحاد مدني نتمني ان يصل فيها الهلال الي الصورة المطلوبة وان يعود هجوم الهلال للتسجيل وان تكون هناك وفرة في اهداف الهلال.
* كذلك نسأل الله ان تبقي شباك الهلال نظيفة.
* مشاركة سادومبا وكابوندي منذ البداية امر لا بد منه استعدادا لمباراة كانو.
* ناس الهلال ديل اغرب ناس.
* اعاروا (امولادي) الي ناساروا ...وجابوا فريق ناساروا كلو للسودان.
* شفتوا قوة العين دي.
* يعيروا ليهم لاعب واحد ويجبوا ليهم فريق كامل قوامه 35 فردا.
* ناس الوصيف الكلام دا ما بفهموا ليكم.
* الكلام دا صعب عليهم.
* الناس ديل جابوا ليهم (امولادي) عشان يشرح ليهم الاعارة عديل ..ما فهموا.
* يا عماد الطيب نوع ديل يعملوا ليهم شنو؟.
* بعد الحصة الصباحية بتاعة امولادي ...الجماعة ديل عاوزين ليهم درس عصر من دي سوزا.
* هسع دي عاوزة ليها درس عصر.
* درس عصر في عينك.
* عين مين يا عم؟.
* مشاركة ايفوسا اليوم سوف تجعل مدرجات جماهير الهلال اكثر انتعاشا.
* حفلتنا بي ايفوسا.
* بما ان مساوي لن يشارك في مباراة كانو ...نتمني ألا يشارك في مباراة اليوم حتي تتاح الفرصة للاعب اخر.
* علي مهند الطاهر ان يودع النجيل الصناعي لملعب استاد الخرطوم باكثر من (هوبة).
* يا مهند اهلك ديل كتر ليهم في (الهوبة).
* نحن ناس هوبة ساكت.
* الهوبة بتريحهم في دمهم.
* اعمل ليهم (الهوبنة).
* خبر عاجل : الليلة ان شاءالله في استاد الخرطوم ..عودة الزمن الجميل