حدد لونك الرياضى و اضحك

اخيرا وفي الاسبوع (التاسع) للدوري الممتاز .. وارغو جاب ليه (قون) في الاتحاد ... قالوا (القون) جابو بعد ما اتحرك بيه من منتصف الملعب.
* والله يا وارغو (قونك) دا لو اتحركت بيه من (الحدود الشرقية) ما بحلل ليك الخمسة مليون دولار قيمة تسجيلكفي المريخ.
* انت بتلعب علي منو؟.
* الحركات دي ما بتمشي علينا نحن ... تصورنحن الهلالاب القدامك ديل ..(افياني) جاب ليه (قون) في اينمبا.. هدف يتمتع بكلالمزايا والخواص النادرة مع ذلك (شطبناه).
* الغريبة هدف (افياني) كان فىالبطولة الافريقية ..يعني ما في الاسبوع التاسع للدوري الممتاز.
* وهدف افيانيكان هدفا سجله في اخر ثواني من عمر المباراة .. وفوق هذا كله .. هدف افياني كان هدف (انتصار) ... ما زي هدفك (الميت) دا.
* غايتو يا (حسن محجوب) الهدف دا .. لو ماشفتو من (نص الملعب) .. كنت قلت ليكم (اوف صايد).
* اهدافنا كلها .. انتوابوشيبة مطلعنها لينا (تسلل).
* وفي التسلل .. بقولوا ليك تسلل (واضح).
* واروغو عرفها.
* الطريف في الامر والحديث عن (الشبه) بين هدف افياني وهدف واروغو .. ان افياني (فرح) فرح شديد .. متل فرحتك دي يا وارغو .. وقلع (الفانلة) برضو ... يعني انت باختصار كدا ماشي في طريق افياني ذاتو.
* نحن الوقت داك اطلقنا عليافياني (هداف الثواني).
* هداف ثواني مين يا عم؟.
* تتخيلوا افياني الماعاجبكم دا في (المريخ) جاب ليه قون.
* السنة القادمة احتمال كبير يا وارغو تمشيتلعب في الاهلي الليبي.
* بس ان شاءالله (تتأقلم) في ليبيا.
* يا بتوع (التأقلم) انتوا.
* هدف وارغو دا ذكرني قصة زمان ...
* قالوا ليك زمان كداكان في واحد اسمو (عبسنجي).
* عبسنجي دا طلع لينا من وين كمان في (البرد) دا؟.
* قالوا ليك عبسنجي دا عندو زوجتي عاوزة توضع .. ساقها وداها المستشفي وجاءراجع .. عشان الهلال كان عندو مباراة في البطولة الافريقية مع اينمبا.. خلي معاهاخوه يتابع معاهم وقال ليه لو حصل ليكم اي حاجة اضرب لي.
* عبسنجي دا اثناءرجوعه للبيت اخوه ضرب ليه.. وقال ليه (مبروك).
* عبسنجي قال ليه : اها ولد وإلابنت؟.
* اخوه قال ليه .. لا ولد لا بنت.
* طيب شنو؟.
* (قون).
* الهلال جاب ليه (قون).
* اخوه طلع هلالابي اكتر منو.

الحكاية دي برضو بتذكرني بي الزول البكون مقطوع في المستشفي اسبوع كامل .. يتابع في الفحص والاجراءات مع زوجتو .. وينزل من دكتور لي دكتور.
* اها الزول دا وقت زوجتو تكون عازوة توضع .. وتمشي وتقول ليه : انت عاوز ولد وإلا بنت؟.
* بقول ليك : (البجيبو الله كلو كويس .. بس الله يحلنا بالسلامة).
* ناس المريخ كانوا بس عاوزين وارغو يجيب ليه هدف .. وتاني اي حاجة بتهون.
* وبعيدا عن هذا .. بل قريبا منه قرأت في احد القصص القصيرة ما ينتهي الي هذا المحتوي.
* قالوا ليك .. زول عندو زوجتو في حالة وضوع ... مشي بيها علي مستشفي حكومي.
* الدكتور شاف الحالة .. قرر اجراء عملية (فورية) للولادة... في دكاترة بقولوا ليك عملية (مستعجلة) عشان يطيرو قلب المرافق.
* مستعجلة دي .. هسع في داعي ليها.
* مستعجلة في عينك.
* الزوجة دخلت (غرفة العمليات) .. وزوجها بقي زي نظام المسلسات يمشي ويجي .. يقيف ويقعد وكل ما يطلع زول من غرفة العمليات يجري ليه يقول ليه: ان شاءالله خير يادكتور.
* لو طلع ممرض بقول ليه يا دكتور.
* اها صاحبنا دا في وقفتو الطويلة دي جاءه الدكتور وقال ليه : زوجتك دي ح توضع توأم... لكن بتواجهنا بعض الصعوبات .. (مسلسل تركي بس).
* الصعوبات دي بتعجبك في المسلسلات التركية.
* الدكتور غاب ساعة كدا وتاني رجع وقال ليه : اسمع نحن من اجل انقاذ حياة احد التوأم .. ح نضحي بحياة واحد فيهم.
* الزوج قال ليه : ما في مشكلة وقت احد التوأم ح يطلع سليم وح يعيش ممكن نضحي بي واحد.
* الدكتور مشي قعد ليه ساعة .. وتاني جاء راجع للزوج .. وقال ليه : نحن عشان حياة (الام) وسلامتها .. ح نضحي بي حياة (الجنين) التاني من اجل سلامة (الام).
* انتوا ما سمعتوا الفنان بغني (تسلم الام الجابتها).
* الزوج قال ليه : ما مشكلة سلامة (الام ).. اهم من (الجنين).
* اها الدكتور بعد ساعة تاني جاء علي الزوج وقال ليه : اسمع يا ابوالشباب .. نحن عشان سلامة (الاب) ح نضحي بـ (الام).
* الام عيشتها تطير... الاب الدخلو شنو هسع.
* الزوج وقت الموضوع هبشو .. قال ليه يا دكتور سلامة (الاب) عندنا اهم حاجة .. ما مشكلة ضحي بـ (الام).
* الدكتور مشي غاب ليه ساعة وجاء .. الزوج وقت شافو من بعيد (اتخارج) .. وقال الدكتور الما مضمون دا يقوم يقول لي عاوز اضحي بـ (الاب) .. عشان سلامة (الوطن).
* احسن نتخارج .. ونتعوض الله ساكت.
* اها المريخاب ديل هسع ضحوا بي اي حاجة .. عشان هدف وارغو.
* قعدوا طمبل احتياطي .. عشان ما يزاحمو .. وقعدوا العجب في الكنبة .. عشان ما يفكر هو في الهدف .. وطلعوا السعودي من القائمة .. عشان وارغو يأخذ راحتو علي الاخر.
* جنس تضحيات.
* دا غير الخمسة مليون دولار .. والعشرين مليون الراتب الشهري.
* البلد كلها ضحت من اجل وارغو.
* وكمان بعد دا كلو قال ما قادر (يتأقلم).
* ناس المريخ ديل عملوا ليهم (مهرجان) عندما دشنوا العمل في الطابق التاني وقبل ذلك عملوا ليهم (مهرجان) عندما كان الطابق الثاني (حلم) في الخيال وعملوا ليهم (مهرجان) بعد انتهاء المرحلة الاولي من الطابق التاني .. وعملوا ليهم (مهرجان) في افتتاح الطابق الثاني (شخصيا) .. وعملوا ليهم (مهرجان) للوحة الالكترونية .. وعملوا ليهم (مهرجان) لسور الاستاد .. وعملوا ليهم (مهرجان) للاضاءة .. وعملوا ليهم (مهرجان) للنجيلة .. وعملوا ليهم (مهرجان) للكراسي .. يوم اتحركت (مهرجان) .. ويوم وصلت بورتسودان (مهرجان).. ويوم وصلت الخرطوم (مهرجان) ويوم ركبوها (مهرجان).
* اها رأيكم شنو يا مريخاب تعملوا ليكم (مهرجان) لي هدف وارغو في الاتحاد.
* وممكن قبل الهدف دا تعملوا ليكم (مهرجان) لهدف واروغو في (الشجرة).
* اصلو ناس المريخ مرة جابوا برشلونة .. ومرة ميلان .. ومرة الاهلي المصري .. كلهم ديل لعبوا معاهم في الرد كاسل.
* دا غير (كاظم الساهر).
* ملحوظة: الهلال ذاتو بقي يلعب في الرد كاسل .. بختكم.

هوامش
* مخطط اعلام المريخ لارهاب الحكام نجح وظهرت نتائج ذلك في مدني.
* سبت لبرادو دا مفروض يعينوه في الجهاز الفني للمريخ.
* علي الاقل مفروض يعينوه في المرحلة السنية.
* انا اول مرة اشوف لي حكم عينو علي المريخ اكتر من (ابوجريشة).
* الاتحاد جاب ليه هدف اصح من هدف وارغو.
* قالوا اوف صايد.
* سيد محمد صالح في عالم الرياضة رفض التعليق عن الهدف وعمل فيها ما سامع .. رغم السؤال الذي وجهه له رضا مصطفي الشيخ .
* سألوه عن هدف الاتحاد فتحدث سيد محمد صالح عن شجاعة الجهاز الفني للمريخ.
* المريخ عاد الي موقعه الطبيعي وصيفا للهلال بفارق اربع نقاط.
* الوصيف رجع الي مكانه وتميز بوصافته للهلال.
* المريخ في (الضل) الان.
* اخدوا راحتكم خالص في (ضلنا) دا .. بس بدون ازعاج.
* وارغو طلع من (الضل) اعطوه (كرت احمر).
* نحن ح نلعب في استادكم .. وانتوا قاعدين في (ضلنا).
* الاستاذ علم الدين هاشم في برنامج عالم الرياضة نبه اعلام الهلال لنقطة مهمة وهي عدم الانشغال والصراع حول اين يلعب الهلال مباراته امام اول اغسطس؟.
* ما مشكلة يلعب الهلال في استاد الخرطوم او في استاد المريخ ... (المكان) ما مهم .. نحن بهمنا (الزمان) اول اغسطس.
* مباراة الهلال امام اول اغسطس يجب الاعداد لها والتجهيز بعيدا عن الخلافات والصراعات.
* عندما يكون الهلال مقبلا علي مباراة مهمة .. فان الهلالاب كلهم يتفقون علي كلمة واحدة.
* مباراة الهلال امام حي العرب في بورتسودان يجب ان يوليها الهلال اهتماما خاصا .. لأنها مباراة صعبة اذا لم يتعامل معها الهلال بمسؤولية سوف يخسرها.
* ان شاءالله عندما يتخطى الهلال حي العرب في بورتسودان سوف يبقي علي فارق الاربع نقاط غير قابلة للتقليص.
* يمكن يزيد الفرق .. لكن باذن الله وتوفيقه فهو لن ينقص.
* علي لاعبي الهلال يبدو (الارهاق) واضح في عيونهم ... يبدو ان (السفر) والترحال اثر سلبا في الهلال في الفترة الاخيرة.
* امام النيل .. الهلال كسب النقاط الثلاث فقط.
* كاريكا المهاجم السوداني الافضل في الدوري السوداني .. بما في ذلك المجنس ايداهور.
* ناس المريخ جنسوا ايداهور عشان يبقي (سوداني) .. وناس الكاردينال ديل ناويين يجنسوه تاني عشان يبقي (هلالابي).
* السنة دي ان شاءالله ح تجنس مرتين يا ايداهور.
* ايداهور فتر من التجنيس.
* تجنيس مين يا عم؟.
* ايداهور .... بصم ... ما بصم ... بصم ...ما بصم ...مابصم.
* الخبر الاكيد مع الكاردينال.
* اكتر زول مستفيد من انتقال ايداهور للهلال هو لاسانا.
* صدام كسلا .. موهبة كروية كبيرة .. فترقبوه.
* صدام امام الامير امس سجل مرتين ... ومن مثل هذه المباريات تخرج الدرر.
* عودة المعز محجوب .. عودة افرحت كل الهلالاب.
* خبر عاجل: يا وارغو لو كل (هدف) .. بعطوك فيه (كرت احمر) .. نوعدك تاني ما ح تأخذ (كرت احمر) .. عشان الهدف السجلتو دا .. اخر هدف ان شاءالله ليك في الدوري السوداني

من طرف رامي حمزة الإثنين أبريل 27, 2009 1:03 am

يالخال مساء الخير .....ربنا يجيب العواقب سليمة ...واللة أنا خايف وارقو دة يجننك ما تجيب سيرة المستشفيات كثير ...الراجيك كثير ..واللة لو فرشت الإستاد كروت حمره ..وارقو وراكم ..وراكم يا هلالاب...خلو وارقو ولا عايزنو لأول أغسطس ..........

* ملحوظة : ضل الهلال يسع الجميع.
هوامش
* وارغو غطوه ولبسوه وبخروه ما يسحروه.
* ليه حق وارغو يقول ما قادر (يتأقلم).
* الأقلمة دي شنو كمان؟.
* الأقلمة دي حاجة بشربوها مع الشاي قبل (الشوتنة).
* الشوتنة شنو؟.
* الشوتنة دي كان عرفتوها ما بتقعدوا تاني في (الضل).
* الحكاية دي ذكرتني العمدة (حسن حسني) في فيلم (محامي خلع) عندما سأله احد الحضور في تجمع الحارة عن معني احدي الكلمات فقال له العمدة : لو عرفتو معني الكلمة دي كلكم بتبقوا (عمد) .. ثم اضاف قائلا: لو عرفتو معني الكلمة دي يا حيبقي فرقكم شنو من (العمدة).
* (محامي خلع) عرفناه .. لكن (لاعب خلع) .. دي اول مرة نسمع بيه.

من طرف **طارق حمزة** الثلاثاء أبريل 28, 2009 2:09 pm

ياابو يعقوب كيفك بعدين مالو المريح ماجاب كاسات محمولة جوا وانتو يا ناس الهلال ما شفناكم الا تحملو الشنط تجو نازلين من الطيارة .... يا عالم لا تجيبو ولا تريحو الناس والحاصل شنو يا رامي حمزة ما امبارح كنت هلالابي خلاص تحولتو وله شنو القصة واخيرا ابعدو من وارغو واعملو حسابكم يا جماعة ده خطر جدا طارق حمزة

يا ابو هارون نحن لاننكر فوز المريخ بكاس الكؤوس الافريقية عام 89 ولكن وين بعد داك تعال شوف الهزايم المحمولة جوا و محمود شلباية لسع محتفل باهدافه فى الشبكة الاكثر توسعاً فى العالم (اكرم الهادى) ومن اليوم داك ماسمعنا باكرم الراجل ده خليته فى الاردن للعلاج و لا شنو؟؟؟؟؟؟؟؟؟؟ بالمناسبة وارغو اخذ اجازة اسبوعين عشان يحتفل بهدفه السنوي.. اليوم تتوجه الانظار صوب استاد الكامب نو للاستمتاع بمبارة البارسا و تشلي ونتمناها زرقاء و طبعاً اللون يحن وشتان ما بين الازرق الوهاج و ... وهذه دعوة للاستمتاع بفنون الكرة الاوربية

حدد لونك الرياضى و اضحك

حدد لونك الرياضى و اضحك

رد: حدد لونك الرياضى و اضحك

رد: حدد لونك الرياضى و اضحك

رد: حدد لونك الرياضى و اضحك

رد: حدد لونك الرياضى و اضحك

رد: حدد لونك الرياضى و اضحك

رد: حدد لونك الرياضى و اضحك