ابعد عن (الوصيف) وغني ليه

< الكنداكة!!.
< لا اريد ان اتحدث عن (الكنداكة) من الناحية التاريخية...فهذه بحار لا قدرة لنا في الابحار فيها.
< لكن يبقي ان نتوقف للحق في ان لقب (الكنداكة) حسب المصادر التاريخية يطلق علي ملكات مملكة نبتة واول من اشتهرت به هي اماني ريناس ثم اماني شاخيتي واماني تاري.
< التاريخ يثبت ان (المرأة) السودانية لعبت دورا عظيما وسبقت كل نساء الارض وعلي هذا تشهد الان اثار البجراوية.
< لا اريد هذا وانا ادخل عبر هذا المدخل الي هذا الموضوع الذي اريد ان اتحدث عنه ..حق علينا احترام ذلك التاريخ وتقديره..وقد قصدت من المدخل هذا ان احكي عن (الكان..داكا).
< طبعا كلكم عارفين ان (الكان..داكا)..هي مباراة القمة التي جمعت بين الهلال والمريخ وانتصر فيها الاول علي الوصيف بثلاثية جعلت اهل الوصيف يشوفوا (العيد) تلاتة..تلاتة.
< مريخابي قال العيد السنة دي شايفو متل (الركشة).
< هسع الركشة ذبنها شنو؟.
< اعود الي مباراة القمة واستعجب من استغراب اعلام المريخ لفرحة الهلالاب بانتصارهم الكبير علي الوصيف.
< اعلام المريخ يريد ان يقول لنا انهم اكثر منطقا من اعلام الهلال ..لأن انتصار الهلال علي المريخ امر عادي ولا يستحق ان نفرح له او نكتب عنه وان كان بثلاثة اهداف.
< لا اعرف كيف يستصغر اعلام المريخ فريقهم...اذ تثبت الحقائق مهما كان فارق النقاط بين الهلال والمريخ ان الاخير ندا للهلال وان كان وصيفا.
< الثابت ان الانتصار علي المريخ جميل والخسارة من المريخ امر لا يطاق..واظن انه ليس هناك حلما عند المريخاب اكثر من ان يفوزوا علي الهلال.
< بل ان احلام المريخ كلها تلخصت في الفترة الاخيرة فقط في ان (يطير) معهم الهلال.
< نطير معاكم نمشي وين؟.
< لدرجة اننا تخيلنا ان الهلال اذا (طار) مشاركا للمريخ في طيرانه فان ذلك سوف يدرج ضمن انجازات المريخ وبطولته المحمولة (جوا) ووهما.
< مع هذا فان المريخاب يستكثروا علي الهلالاب ان يفرحوا...ليه؟.
< عشان الانتصار علي المريخ..عادي زي كأن الهلال انتصر علي (الجونة) المصري او (وقد) الصومالي.
< يعني شنو لو الهلال جاب تلاتة اقوان في المريخ...كل سنة الهلال بانتصر بهذه النتيجة.
< في عهد ريكاردو وحده انتصر الهلال علي المريخ مرتين بثلاثية.
< اول مباراة اشرف فيها ريكاردو علي الهلال ..انتصر الهلال 3/صفر..(هيثم مصطفي وطمبل وبهجة) والموسم قبل الماضي وبقيادة ريكاردو ايضا انتصر الهلال علي المريخ بثلاثية شهيرة (كرنقو ومهند الطاهر وكلتشي) حيث انتهت المباراة 3/2.
< لذا فان انتصار الهلال علي المريخ 3/1 امر اكثر من عادي..هذا حسب فهم اعلام المريخ.
< عليكم الله يا مريخاب ..البخلينا ما نفرح شنو والدنيا عيد.
< فريق بدل جلدو كلو..دفاعه كله غريب ...وهجوم جديد...وجهازه الفني الي الان لم يكمل 60 يوم في البلد.
< وما عاوزننا نفرح.
< بعدين في حاجة فاتت علي المريخاب.
< عشان ما تغالطوا احسن نجيكم من فوق.
< عندما لعب منتخبنا الوطني امام المنتخب الغاني ..وانتصر الاخير 2/صفر..بعد المباراة احتفل لاعبي المنتخب الغاني ..واحتفل الجمهور وظهر مدرب المنتخب الغاني وهو (ينطط) من الفرح.
< والراجح بل والمؤكد ان جمهور غانا الي الان مازالوا يحتفلون عارفين ليه؟.
< ما عشان انتصروا علي المنتخب السوداني بهدفين.
< وانما فرحة المنتخب الغاني ناتجة لأن المنتخب رسميا صعد لنهائيات كأس العالم والتي سوف تلعب في جنوب افريقيا.
< وبنفس هذا المنطق نحن فرحنا وسعدنا لأن الهلال عقب فوزه علي فريق المريخ صعد رسميا لدور الاربعة.
< صعد الهلال وترك الذي صنف ليكون علي رأس مجموعة الهلال في المركز الطيش وهو لا حول له ولا قوة..اذ كان في رصيده نقطتين بعد ان فشل المريخ في ان يحقق انتصارا واحدا في مرحلة المجموعات.
< وبعد دا ما عاوزننا نفرح.
< عليكم الله هسع قون ايفوسا دا برهو ما بفرح ..ما بشرح الصدر.
< انا ما عارف انتوا بتعيدوا كيف مع (القون) دا.
< النقطتين خلوها.
< قون ايفوسا دا يا مريخاب ما معاه عيد.
< عيد في البرد دا.
< ارجع مرة اخري الي نقطة تثبت ان المريخ فعلا (ضل) للهلال اذ لا يريد اعلام المريخ (السالب) ولا مجلس المريخ ان يتزحزح من هذا (الضل).
< المريخاب عندما جاءوا في المركز الاخير وكانوا طيش المجموعتين تتصوروا حللوا ذلك بان قالوا ان الهلال نفسه في العام السابق كان طيش مجموعته.
< يعني وجود الهلال في العام الماضي في المركز الاخير في مجموعته امر يحلل لهم ويطيب لهم ان يكونوا هذا العام في المركز الاخير.
< انتوا في الحكاية دي عاوزين تقلدونا.
< في ضل اكتر من كدا.
< نذكر ان الفرق بين الهلال والمريخ في البطولة الافريقية ( نقاط.
< تقول يا ناس المريخ نحن لاعبين معاكم سلة.
< اما الفرق في النقاط بين الهلال والمريخ في بطولة الدوري الممتاز فهو (6) نقاط.
< كلية طب قافلة.
< في البطولة الافريقية وبما ان الفرق 8 نقاط فاننا يمكن ان نقول الفرق كلية طب مع سنتين الامتياز.
< غايتو يا المريخاب العيد دا إلا ما تمرقوا..شوفوا ليكم بلد.
< قون ايفوسا دا محل ما تمشوا معاكم ..إلا تعيدوا برة البلد.
< انا ما عارفكم بتصرفوا كيف في العيد دا؟.
< قلنا شنو نحن؟.
< سا شنو؟.
< سا سادومبا يا ود الناس.
< وكا شنو؟.
< كا كابوندي.
< كابوندي في البرد دا.
< واحد من المريخاب شاف سرعة سادومبا ..قال لي والله انا عذرت الباشا في (الكرت الاحمر).
< لو الباشا دا ما أخذ ليه (كرت احمر) كان الباشا بكون الي الان نفسو قايم.
< اخر ليك يا الباشا تأخذ ليك كرت احمر عشان تعيد مع اهلك ونفسك ما مقطوع.
< وبعد دا ما عاوزننا نفرح.
< نزعل يعني.
< طيب نحن خلونا...انتوا وقت ما عاوزننا نفرح انتوا البزعلكم شنو؟.
< المريخابي بقي من تلاقيه يقعد يشكي ليك من (الضرس).
< المعني ما تجيب لي سيرة لي (قون ايفوسا).
< الهلالاب طبعا شفوت..وقت ما يلقوا ليهم سيرة يجيبوا فيها قون ايفوسا...عارفين بعلموا شنو؟.
< بعملوا شنو عليك الله.
< الهلالابي يقول للمريخاب شفت (الشجرة) ديك.
< المريخابي يقول للهلالابي شفتها.
< الهلالابي يقول ليه: زي قون ايفوسا.
< عشان كدا المريخاب الواحد فيهم بقي من تجيب ليه سيرة (الشجرة) بقعد يضاير.
< في مريخابي عامل فيها مفتح ...الهلالابي قال ليه : شفت الشجرة ديك.
< المريخابي قال ليه : ما شفتها.
< الهلالابي برضو قال ليه : زي قون ايفوسا.
< اصلوا قون ايفوسا دا ما بفارقكم.
< عشان كدا من هسع ننصحكم تشيلوا معاكم حبوب (حيرقان)..وشيلوا حبوب المصران ..وشيلوا ليكم (جردقة).
< الجردقة لي شنو كمان؟.
< احتمال تذكروا قون عمر بخيت.
< وطخو يا ديمبا.
< انتوا عارفين المريخاب ديل مفروض يفرحوا ...مباراة القمة الاخيرة لو جات فيها مطرة ..الكورة دي كان ما وقفت إلا في (السبعة).
< بي شوية برد ساكت..غلبناكم تلاتة...بالمطر كان تعملوا شنو؟.
< ملحوظة: مطر مين يا عم؟.
هوامش
< مهم خالص ان يمنح الهلال مباريات الدوري الممتاز القادمة اهتماما خاصا.
< الثلاث مباريات القادمة لو انتصر فيها الهلال باذن الله وتوفيقه فان الدوري الممتاز سوف يكون اتحسم بشكل رسمي.
< علي الهلال ان لا يركن لفارق الـ 6 نقاط.
< رغم ان المريخاب يتحدثون عن انهم لن يحققوا بطولة في هذا الموسم.
< لكن نحن يهمنا ان يكون الفارق بين الهلال والوصيف كبير.
< ابعد عن الوصيف وغني ليه.
< بل ابعد عن (الطيش) وغني ليه.
< يا ريت لو بقت علي الوصافة.
< المريخ فعلا لن يطير براه ..الهلال (طار) الي زامبيا.
< شفتوا الطيران دا كيف.
< إحنا اي حاجة عندنا بي نظام.
< عندكم نقطتين وكمان بتتكلموا في العيد.
< مباراة الهلال امام زيسكو مفروض الهلال يلعبها بالصف التاني بي ناس النعيم وبركية عشان تكون دافع لهم للمباريات المقبلة.
< جعفر بركية لاعب فيه مستقبل الوسط في الهلال.
< ليست مهمة النتيجة التي سوف تنتهي عليها مباراة الهلال امام زيسكو.
< لكن ما عاوزنكم تخربوا لينا العيد.
< المريخ كانو..مفروض تكون تحت هذا الاسم (المريخ كان).
< اول مرة المريخ يحسم موقعه بهذه السرعة.
< حجز المركز الطيش قبل الجولة الاخيرة.
< في راحة اكتر من كدا.
< الاعلام السالب دا كلامو كتير.
< مرة يقولوا المطر.
< ومرة يقولوا البرد.
< ومرة يقولوا الحكم.
< ومرة يقولوا المدرب.
< ومرة يقولوا اكرم.
< ومرة ريتشارد.
< ووقت ما يلقوا ليهم حاجة بقولوا (اعلام المريخ السالب).
< سا شنو؟.
< سا سا سالب.
< سادومبا ذاتو اديناه اجازة.
< اجازة في عينك.
< خبر عاجل: يا همد ركز لينا في (المطر).