سِتّيف العيون بالشوق

< والدنيا عيد.
< (مارق علي مهلك)..متوسد شوفتك...والناس متهافتة إليك.
< الشفع في الحلة بتقادموا بي قون (ايفوسا) الثالث...قال اكثرهم (شيطنة)...الليلة الضبح من الوريد الي الوريد.
< ود حاج محمد عندو (ولد) اليوم كلو تلقاه (مصنقر) في رأس البيت ...الولد تقول (اريل) يومه كلو في رأس البيت.
< يا ولد انزل ..المريخاب ديل لو شافوك بقوموا يشتكوا فيك.
< اصلو هم عاوزين ليهم سبب.
< حاج عثمان ..مريخابي ..هو برضو اليوم كلو بتلقي واقف في الباب ..زي حكم الراية.
< حاج عثمان عندو ولدو الكبير في (روسيا) ليه عشر سنوات ما جاء البلد...حاج عثمان اعطاه مهلة...قالوا ليه في ظرف اسبوع لو ما جيت راجع..انا بوصل موضوعك دا (الفيفا).
< اليوم والتاني...(الكرت) وصل.
< انت تعال هنا (روسيا) دي شنو الماسكها لينا دي.
< قالوا ليك (روسي)..مشي القمر ..هارب من مباراة القمة...قال احسن امشي اتواري هناك.
< الروسي قاعد في القمر ..زي الما حصل حاجة.
< الشوط الاول لمباراة القمة..انتهي ...الروسي جاءه (مسكول)..من روسي تاني.
< الروسي الاول قال الروسي البمسكل دا عاوز شنو؟.
< بينو وبين نفسو قال (الروسي دا ما عندو رأس وإلا شنو؟).
< لكن الفأر لعب في عبء الروسي ..قلبو ابأ المسكول دا...خاف الهلال يكون جاب ليه قون.
< الشوط التاني بدأ ..شوية شويتين خشت علي الروسي القاعد في القمر (مكالمة).
< نعم في شنو يا اخوي.
< قلق.... قلق مالو؟.
< قلق درن.
< يعني نحن كنا مغلوبين.
< يا زول اسكت ساكت...يمين بالله ديمبا دا جاب ليه قون في (حافظ)...حافظ دا قالوا ليك المباراة كلها يضرب في (تلات تسعات).
< الروسي قال بينو وبين نفسو ..التعادل ما بطال معانا ..برضو من الناحية البيلوجية..للمنطلق الايدلوجي ..التعادل دا بطير الهلال.
< خلاص يا الهلالاب عاوزين تخلوا اي حاجة وتقبلوا علي (الروس).
< الروس في عينك.
< الروسي قاعد يتمشي في القمر..الروسي المسكل ليه في البداية داك ..تاني مسكل ليه.
< صاحبكم الروسي رأسو قطع ..عرف ليك الروسي دا ما بمسكل ساكت.
< بينو وبين نفسو قال الهلال بكون جيب ليه قون.
< اكيد الحكم الجنوب افريقي دا يكون حسب ليهم قون من تسلل واضح.
< الروسي عاوز يموت ويعرف قون الهلال التاني الجابو منو؟.
< يا ربي امبيلي....لا امبيلي ما بجيب ليه قون..امبيلي دا بتاع حوامة ساكت..عامل كداراته الكل فردة من بلد.
< انا اول مرة اشوف لي مهاجم عيونه كلها لفت.
< عيون زول وإلا عيون بوتجاز.
< يا ربي القون يكون جابو (سادومبا).
< لا..لا ..سادومبا ما بجيب ليه قون عامل تلفونو الكلو سبعات دا.
< يكون القون جابو حمودة.
< حمودة شنو البجيب ليه قون في المريخ..وهو السنة كلها مصاب..عامل فانلتو النمرتها مقلوعة دي.
< يكون مساوي...شنو هو شغلة..مساوي دا في كل مباراة عاوز يجيب ليه قون في المريخ.
< الروسي دا اي زول اتخيلوا يمكن يجيب ليه قون في المريخ...الذين لم يتخيلهم يسجلوا المعز محجوب وعمر بخيت.
< الروسي قال احسن اضرب اشوف القون الجابو منو؟.
< ضرب ليه لي روسي تاني ..قال ليه انت تعال هنا قون الهلال التاني الجابو منو؟.
< الروسي التاني دا قال ليه عمر بخيت.
< صاحبكم كان عاوز يروح فيها..عاوز يموت..عمر بخيت يجيب قون فينا نحن..وين امير دامر؟..وين الباشا ..وين الجماعة ديل.
< والله دا الفضل...كمان عمر بخيت يجيب فينا قون.
< ليه الكورة دي ما فيها (حكم رأية).
< الروسي التاني وقت شافو منفعل كدا..قال ليه: قون عمر بخيت ذاتو تسلل واضح.
< انت ما عارف الحكام ديل بجاملوا في ناس الهلال.
< يا اخي ديل الاتحاد الافريقي جاملهم...اشتكى المريخ رفضوا الشكوى شكلا.
< اشتكى كانو..رفضوا الشكوى موضوعا.
< اكتر من كدا نعمل ليهم شنو الهلالاب ديل.
< ديل الفيفا رفضت شكوتهم.
< تاني نحن نعمل ليهم شنو؟.
< جمال الوالي مسكين..ما في حاجة ما عملها للمريخ...ما فضل ليه إلا يجيب ليه مدرب (نيوزلندي).
< نيوزلندي ليه؟.
< نيوزلندي عشان ما يعرف الاعلام (السالب) دا بكتب في شنو؟.
< لو جينا للجد..الوالي دا ما قصر معاكم.
< الزول دا في (الكنبة) قعد معاكم يا ريتشارد..تاني يعمل ليكم شنو؟.
< الكنبة دي ناس طمبل وقت يقعدوا فيها بطنطنوا.
< الروسي بتكلم كدا براه بينو وبين نفسو ..طبعا الروسي الفي القمر دا مجبور يتكلم بينو وبين نفسو..عشان ما في زول معاه.
< اثناء هذا الحديث البينو وبين نفسو...في (مسكول) تالت دخل في تلفون الروسي.
< الروسي عاين للمسكول لقاه من الروسي المسكل ليه في قون ديمبا ومسكل ليه في قون عمر بخيت.
< معقولة بس ..الهلال تاني جاب ليه قون.
< تلاتة يا مازدا.
< اها الروسي قام يحوم تاني...عاوز يموت ويعرف القون الثالث دا الجابو منو؟.
< يا ربي ديمبا دبل (الختة).
< يا ربي هيثم مصطفي...الزول دا لو جاب ليه قون فينا بي إلتهاباته دي تبقي مشكلة.
< مشكلة في عينك.
< مشكلة في الجهاز الفني بتاع المريخ.
< المهم الروسي دا وقت عرف ايفوسا هو الجاب القون..قعد في الواطة...وقطع ليه جردل موية.
< الروسي من قون ايفوسا اضنينو بقن في نص ضهرو...زي (الفضية) الما فيها عدة.
< وما فيها قزاز كمان.
< خلاص يا الهلالاب عاوزين تخلوا اي حاجة وتقبلوا علي (الفضيات).
< طبعا في ناس ما بعرفوا (الفضية).
< الفضية دي لو عرفتوها ما في زول بقعد ليكم في البلد دا.
< كدا هسع خلونا في العيد.
< انتوا تعرفوا في هلالابي مشي يفصل ليه جلابية للعيد..الترزي عاين ليه كدا..وقال ليه : عاوز ياتو لون؟.
< الهلالابي قال ليه : عاوز لون (ديمباوي) كدا.
< الترزي ما عرف يمشي وين؟.
< الترزي قال ليه : طيب افصلها ليك كيف؟.
< الهلالابي قال ليه : فصلها لي (عمرابية) كدا.
< الترزي بقي يبلع في ريقو متل (اجازة العيد).
< الترزي قال للهلالابي طيب الرقبة عاوزها كيف؟.
< الهلالابي قال ليه عاوزها (ايفوسية) كدا.
< الترزي قعد (يضاير) متل باقي المرتب..ما تعرف توديهو وين؟.
< طبعا الهلالابي قاصد بالرقبة (الضبح).
< المريخاب ما بفهموا لينا (النقطة) دي..بعد ما عملوا ليهم (نقطتين).
< نقطتين مين يا عم.
< والدنيا عيد.
< شارعنا مارق من (علبو).. كان هدف (عمر بخيت) الثاني اوضح ما فيه...حاجة ظاهرة في العيون ما بتدس.
< يا ولد الواطة دي مالها سخنت كدا...الواحد في الواطة الحارة دي لو رمي ليه (زلابية) تحرق.
< الزلابية عينها تطير.
< ملحوظة: كمان قالوا ما بتعرفوا الطيران.
هوامش
< اذا كان ثاني مجموعة الهلال سوف يلعب النهائي في ارضه ..فاننا نتمني ان لا يتصدر الهلال مجموعته حتي يكون النهائي في (المقبرة).
< عليه مفروض الهلال يكون حاسبها صاح..وعارف هو بعمل في شنو؟.
< نحن لا نقول فليخسر الهلال من اجل ان يأتي في المركز الثاني ولكن نقول فليعبها الهلال بالصف الثاني حتي تكون المباراة سانحة جيدة للاعبي الصف الثاني لاكتساب الخبرة.
< جميل ان مدرب الهلال كامبوس سوف يبعد اي لاعب يمكن ان يكون معرضا للايقاف.
< كذلك يجب ان يبعد اي لاعب يمكن ان يتعرض للاصابة او الارهاق مثل هيثم مصطفي وسيف مساوي.
< هل سيفشل المريخ من تحقيق انتصار في مرحلة المجموعات.
< عشان تاني تلعبوا في بطولة الاندية الافريقية الابطال.
< كان اخير ليكم (كونفدراليتكم).
< تطيروا..ما تطيروا...تقعدوا..ما تقعدوا...كان زول بسألكم مافي.
< قالوا جمال الوالي عاوز يعمل ليه مشروع (طيران)...وعاوز ناس الهلال يشاركوه في المشروع دا.
< هسع يا جمال الوالي في زول بشاركك في (التلاتات) حقتكم دي.
< طيروا براكم...........نحن بقينا علي (الكأس).
< يا ربي احساس (الطيش) بالعيد كيف؟.
< مفروض الاعلام (السالب) يكتب لينا في الحتة دي.
< خبر عاجل: والدنيا تبقي معيدة.