الزمن الجميل (فلاش باك)

* الدنيا زمان كانت بخيرها .. ما بتلقي ليك زول (مكشر) .. زول ما (صارف) ما بتلقي.
* كلهم كانوا (مبسوطين)..الواحد يلاقيك ...ابتسامتو تقفل الشارع من الفرح.
* من يوم 19 تلقاهم في مطاعم السمك...ما في زول كان بسأل ليه (كمساري) من باقي.
* ولا في زول بقبل ليه علي (فول).
* الكمساري عادي كان يمكن يعمل ليه عمارة من سبعة طوابق من (البواقي).
* الناس دي كلها كانت بتضحك .. هسع اي واحد يلاقيك زعلان .. تقول عندو (وجع ضرس).. البلد كلها بتشكي.
* الناس ديل هسع تجيهم (المطر) يشكوا منها.
* ما تجيهم (المطر) برضو يشكوا.
* في الحالتين يشكوا.
* النيل يفيض يشكوا..النيل يجف يشكوا.
* الدنيا زمان كانت (سمحة) .. كباية الشاي كان بعملوا فيها (12) ملعقة .. ما بتسمع ليك زول يقول خائف من (السكري).
* السكر دا زمان كان في (القهوة)..هسع بقي في (الدم).
* سكري شنو...السكري دا ما سمعنا بيه إلا هسع مع (الجاتو) وخطوبة محمد زيدان لي مي عزالدين وفركشة الخطوبة بعد ذلك.
* عصير الليمون زمان كانوا بعملوا بالتفاح .. وطلب السمك كان فوق ليه بدوك هدية (تمساح) علاقة مفاتيح.
* الدنيا كانت بي خير.
* هسع (الليمونة) قدر ما تعصرها ما تكب حاجة...الغريبة ريحة ليمون ساكت ما فيها.
* زمان لو عملت لي زول (مسكول)...الحلة كلها في اليوم التاني تضرب ليك تقول ليك : الحاصل شنو؟..شفقتنا عليك.
* هسع لو ضربت لي (ابوك) يشوف الرقم يقول : الهوا دا عاوز شنو في الوقت دا.
* زمان لو مشيت السوق عشان تشتري ليك بطيخة...بتاع البطيخ يفتح ليك (لوري) البطيخ كلو بطيخة ..بطيخة...عشان تشيل ليك بطيخة حمراء وحلوة..وبعد ما تشيلها يحلف عليك ما تدفع حاجة.
* بتاع البطيخ يقول ليك : شنو هي ..ما (موية) ساكت..انت قايل البطيخ دا شنو غير موية مجمدة في شكل لب.
* الليلة لو مشيت تشتري ليك (بطيخة)...بتاع البطيخ يعاين ليك من فوق لي تحت...ساعة تكورك ليه عشان يجيك يعمل ليك فيها مشغول...تقول البطيخ دا عارض نفسو براه.
* صاحب البطيخ وقت يجيك بي طرف لسانو يقول ليك : البطيخة دي بـ 15 جنيه.
* تقول ليه : ليه بطيختك تمت حضانتها في رياض اطفال.
* ما يشتغل بيك الشغلة...تلقاه شغال بي (نغمات) موبايله..تقول ليه البطيخة دي اشيلها بي 10 جنيه.
* رد ساكت ما يرد عليك.
* تقول امشي خطوات ..يمكن يناديني..تمشي وتتلفت تقول سايق ليك (تاكسي تعاوني)..ما بقول ليك تلت التلاتة كم؟.
* تجيه راجع تاني ...تقول ليه : البطيخة دي اشيلها بـ 13جنيه.
* ما يرفع رأسو...زولكم شغال في موبايلو.
* تقول امشي تاني ..المرة دي بناديني..تمشي ما يشتغل بيك الشغلة.
* تجيه راجع مرة اخري ..تقول ليه اسمع : البطيخة دي بتديني ليها بـ 14 جنيه.
* يغير نغمة موبايلو ..ويقول ليك : البطيخة دي قبلك في زول دفع فيها 15 جنيه ...ما اديناها ليه.
* بطيخة هي وإلا عروس.
* بطيخة هي وإلا مدرب اجنبي.
* والله يا ود الناس بطيختك دي ما فاضل ليها إلا يجيبوها في (صدي الملاعب).
* شنو الناس منتظرين (الفرنسي في الخرطوم)...جمال الوالي يظهر ليهم بي برازيلي في (صدي الملاعب).
* انتوا مدربكم دا عاوز يدرب مصطفي الاغا.
* تاني يعني تشكيلة المريخ بنشوفها في (صدي الملاعب).
* الظاهر كدا الاعلام (السالب) دا طلع من الشبكة..بقوا قاعدين ساكت مع ذلك تتصوروا جمهور المريخ بهتف : كمل كمل يا مزمل.
* يكمل شنو؟...وانتوا المدرب بتاعكم سمعتوا بيه في (صدي الملاعب).
* انا خايف لو استمريتو كدا تاني نتيجة المباراة تجيبوها من (صدي الملاعب).
* انت تعال هنا عاوز تفك (البطيخ) وتقبل علي مدرب المريخ الجديد.
* قالوا العقد الوقعوا كاربوني مع المريخ ..عقد وهمي ساكت.
* وقالوا كمان؟.
* قالوا شنو؟.
* قالوا الايميل اتمسح.
* يتمسح في عينك.
* خلاص يا الهلالاب عاوزين تفكوا اي حاجة وتقبلوا علي (الايميل).
* الايميل عيشتو تطير.
* نرجع للبيطخ وإلا نشوف لينا موضوع تاني.
* رأيكم شنو نفتح موضوع (ايفوسا).
* الحاجة المحيراني ايفوسا دا سافر مع الهلال نيالا قبل ما يسجلوه.
* 6 شهور قاعد منتظر الهلال زي يوسف التاج.
* اها ايفوسا دا وقت سجلوه... (المصري) عنقد...رفض يرسل (الكرت).
* كرت كابوندي وصل ...وكرت سادومبا الذي تنقل بين اكثر من ثلاث دول برضو وصل.
* وكرت ايفوسا ما وصل.
* المريخاب ديل لو عارفين ايفوسا ده بجيب فيهم قون وبقول ليهم المباراة (انتهت) كان الي الان كرتو ما وصل.
* زول يلعب ليه 10 دقائق فقط امام المريخ ويجيب ليه قون.
* وارغو مسكين لعب اربع مباريات قمة..افضل تهديفة ليه في مباريات القمة دي كانت في (الكشافات).
* كلتشي طبعا في المجموعات بكون مشفر.
* كلتشي من موسي الزومة ما تعرف.
* الحاجة الغريبة ان اعلام المريخ قال ان سادومبا سجل اول هدف ليه في هلال الساحل.
* انتوا بتنسوا سريع كدا مالكم يا مريخاب.
* نسيتوا العملو سادومبا في (الباشا).
* الباشا دا من كثرة الجري بقي زي (شيخ الغفر).
* طخوا يا ديمبا.
* كدا يا مريخاب اسألوا الباشا قولوا ليه : انت مالك انطردت في مباراة.
* قولوا ليه ..يمكن يعترف ليكم ويقول ليكم انطرد عشان يحافظ علي شوية النفس الطالع ونازل منو.
* الباشا خلوه...قولوا لي سفاري انت ليه وقفت وما لعبت مباراة القمة.
* قولوا ليه : ليه اخذت كرت في مباراة المريخ وزيسكو.
* يمكن يقول ليكم.
* انتوا عارفين سفاري دا في كل مباراة قمة بتعرض لي (اصابة)...انتوا بتلعبوا بي اصابتو.
* عشان كدا سفاري في مباراة القمة الاخيرة عرف ان (الاصابات) ما بتحلو.
* عشان كدا قال اخير يقيف عديل.
* زول قاطع (بنزين) يلعب ليكم كيف؟.
* ليه حق سفاري ..(يقيف).
* نرجع ليكم لي موضوع ايفوسا والذي فاز بجائزة نجم المباراة الاخيرة التي لعبها الهلال امام هلال الساحل.
* اهم من هذه النجومية ...هي الروح التي ظهر بها ايفوسا في الهلال.
* فرق كبير بين ايفوسا في المريخ وايفوسا في الهلال.
* في مباراة الهلال وهلال الساحل كان هيثم مصطفي حفظه الله ورعاه وشيله كأس الاندية الافريقية يجري الي ايفوسا ويصافحه وايفوسا يعملوا معه (ضربة جزاء).
* هذه الروح لا توجد إلا في الهلال ...ولا توجد إلا بين لاعبي الهلال.
* وكان ايفوسا اكثر فرحا وهو يمسح حذاء كاريكا بعد ان سجل الاخير احد اهدافه الوسيمة في المباراة.
* اننا قبل الثلاث نقاط وقبل الاهداف الاربعة التي سجلها الهلال وسجل منها كاريكا ثلاثية جعلته علي رأس هدافي الممتاز..قبل هذا كله.
* سعداء نحن لهذه الروح التي تسود بين لاعبي الهلال وهي التي تجعل ثقتنا اكبر في ان يفوز الهلال ان شاء الله بكاس الاندية الافريقية.
* هذه العلاقة التي تجمع بين لاعبي الهلال ...قيمة من الزمن الجميل.
* سوف احدثكم لاحقا عن سر هذه العلاقة التي تربط بين لاعبي الهلال حسب افادة قائد الهلال هيثم مصطفي حفظه الله ورعاه.
* ابقوا علي هذه المودة بينكم ونتمني ان تنتقل هذه الروح الي جماهير الهلال وان تنتقل كذلك لاعضاء مجلس الادارة ليكون الهلال كله اسرة واحدة.
* ملحوظة: اللهم نسألك حفظ الهلال.
هوامش
* بعد ان احضر مجلس المريخ مدربا برازيليا علي طريقة الهلال..اتوقع في العام القادم ان يتخلص المريخ من كل لاعبيه النيجيرين ليحضر طرف كنغولي ومهاهم كنغولي ومدافع مالي ومهاجم من زيمبابوي.
* ناس المريخ ديل ما فاضل ليهم إلا يجيبوا ليهم (سور) بلجيكي...ونجيلة (امريكية).
* فضل ليهم (السور).
* واحتمال كمان يجيبوا (امين عبدالوهاب).
* (ضل) كاربوني.
* الهلال دا لو عاوز يمقلب ناس المريخ مفروض يجيب ليه مشجعين (روس)..عشان نعرف جمال الوالي دا بتصرف كيف؟.
* نصف كشف المريخ في القاهرة للعلاج.
* الجماعة معذورين بيلعبوا من (التمهيدي).
* من زمن الـ 64.
* زمن المباراة ما فيها حكم راية.
* زمن الناس الفي الاحتياطي كلهم بخشوا وقت المباراة يتبقي لها 10 دقائق.
* ناس بتمشي سنين طويلة ...وناس من غير دور الـ64 بيلعبوا في دور الاربعة.
* عارفين الفرق بين المريخ الذي لعب في البدايات والهلال الذي يلعب في دور الاربعة الان (60) درجة.
* دا انتوا طلعتوا اي كلام.
* كلام مين يا عم؟.
* خبر عاجل: الضحية (جقلبت).