المريخ تعادلات دوت كوم

•• اولادنا ديل ما قصروا معانا...تعالوا نشوف الحاصل عليهم شنو؟.

• اولادنا بقودوا المريخ للخلف.

• احترس المريخ يرجع الي الوراء.

• قلنا ليهم قبل كدا.

• كلتشي آخر الموسم بتمها ليكم (اصابات)...لو اضرب (موسي الزومة) بمسك هو كراعو.

• لو اتصاب بلة جابر ...بربط ايدو.

• احساسي عالي.

• قعدتو تغالطوا.

• كلتشي دا بداية الموسم بكون بعيد عن المعسكر ...وهو بحضر اخر لاعب للمعسكر واخر الموسم بعمل فيها (مصاب).

• تتخيلوا المريخ وصل لمرحلة ان يكون (مجاهد) نجم المباراة.

• وين وارغو؟.

• طمبل اختفي في ظروف غامضة...نحن ذاتو ما عارفين الحاصل عليه شنو؟.

• انتوا جمال الوالي دا مسك (طمبل) المظلة ..وإلا هيثم طمبل دا بقي مع كمال دحية ماسك الاستاد.

• هسع في زول بتذكر طمبل. طمبل شنو؟.

• المريخاب ديل (العجب) نسوه. الدافي برضو اختفي.

• الدافي خلوه ..تعالوا شوفوا ريتشارد...غايتو البسوي ريتشارد في الهلال لقيناه كلو في المريخ.

• ريتشارد يقطعوا منو الكورة يجيبوها قوون ...بقوم يقع ويخت ايدو في رأسو.

• قديمة.

• انت يا ريتشارد الحركة دي نحن ما حذرناك منها في الهلال.

• ناس المريخ ناقصين عشان تجي تعملها ليهم في (الرد كاسل).

• كورة هي وإلا ردحي.

• ريتشارد يوم 30 نوفمبر لو لعب مباراة القمة ...اوعدكم وعد قاطع (اسامة التعاون) يطلع هداف الدوري.

• معقولة يا ريتشارد صلاح الامير يعمل فيك كدا...انت مالك (قروشك) ما ادوك ليها.

• بتعمل كدا ليه؟.

• دا انت طلعت اي كلام.

• في واحد صاحبي بتاع هندسة اسمو (ياسر) قال لي انت عارف (كاربوني) دا لو ناس المريخ جابوه من بداية الموسم ..كان المريخ هسع بتنافس مع الشمالي عطبرة من اجل البقاء في الدوري الممتاز.

• يا ناس المريخ انتوا جنيتوا.

• تتعادلوا مع الامل عطبرة في بورتسودان ...نقول ما مشكلة بورتسودان فيها (رطوبة).

• تقول ناس الامل عطبرة ديل كانوا بيلعبوا في بورتسودان بي (ناموسياتهم).

• بعدين بورتسودان الكهرباء فيها كعبة ...(الكلام دا قبل السد).

• يا زول الكهرباء دخلها شنو بالتعادل.

• أهو سبب نصبر بيه جماهير المريخ...(اصلو الطابق التاني انتهي).

• تتعادلوا مع هلال كادوقلي ...نقول كادوقلي بعيدة ...(وزلابية) ما فيها.

• الزلابية عاوزين بيها شنو كمان؟.

• أهو سبب نعلل بيهو التعادل....نقول شنو عاد للحكومة البتدعم فيكم دا...والله ما قصرت معاكم.

• تمشوا تتعادلوا مع الاهلي مدني.

• نقول : المطر...انتوا جنيتوا قالوا ليك مدني دي فيها (رعد)..الرعدة لو ما كنت فاطر كويس ما بتستناها.

• بعدين مدني دا (البصل) فيها مولع نار.

• كمان قول غلاء البصل سبب في التعادل.

• طبعا ...غلاء البصل دا ممكن يتسبب في هزيمة ريال مدريد ذاتو.

• انتوا ما بتابعوا الاخبار وإلا شنو؟.

• غلاء البصل دا شيء فظيع..فظيع...فظيع...فظيع في كورة القدم الحديثة.

• فوتنا ليكم حكاية التعادل مع اهلي مدني..قلنا المطر.

• تمشوا يا ناس المريخ بعد التعب دا كلو ...مدرب جديد زايد وارغو وكلتشي وايداهور وقلق والدافي والطابق التاني ...تمشوا بعد دا تتعادلوا مع حي العرب.

• نعمل ليكم شنو نحن؟.

• نتصرف كيف؟.

• نقول شنو؟.

• بقينا ندخل في ضفورنا...ما عارفين نعمل شنو؟.

• في واحد مفتح من الجماعة قال سبب التعادل مع حي العرب يرجع الي (الرملة).

• قلنا ليه رملة شنو؟...مالك انت عاوز تقوم لينا المصران.

• قال لينا انتوا مجانين.

• ما سمعتوا الخبر.

• قلنا ليه خبر شنو؟.

• قال لينا قلاب الرملة في ام درمان بقي بالشيء الفلاني.

• قلنا ليه : افرض يعني بقي بي مليون جنيه ...الموضوع دا دخلوا شنو بالتعادل مع حي العرب.

• زولكم قال لينا : كمان ريتشارد فرصة زي دي بضيعها ليكم.

• دي ما بفوتها...طوالي بقول ليهم : سبب التعادل مع حي العرب (الرملة).

• الاعلام السالب طبعا بسمع الكلام دا بقوم طوالي يحاول يقنع ليك جماهير المريخ.

• طبعا (الرملة) بتأثر في التعادل ...عشان تحت..تحت سمعنا انو ناس المريخ بدأوا في الطابق الثالث.

• وقالوا عاوزين يفتحوا الملف دا بعد ما يقفلوا ملف الممتاز.

• عالم عجيبة...يقفلوا ملف البطولة الافريقية عشان يفتحوا ملف (السمك في شارع الموردة).

• ويقفلوا ملف الممتاز عشان يفتحوا ملف الرملة.

• هسع الرملة دي عاوزة ليها ملف.

• ملف في عينك.

• طيب التعادل مع الخرطوم سببو شنو؟.

• والله انا بعتقد ...من حيث المبدأ كدا انو التعادل دا كلو من رأس صلاح الامير.

• صلاح الامير دا كان بفتش في ناس ريتشارد...تقول بحشي ليه في ضرس.

• يا زول انت جنيت.

• بعدين المريخ معذور...الدولار قالوا وصل السما.

• الدولار كمان دخلو شنو بتعادل المريخ والخرطوم.

• انت قاعد وين يا زول؟.

• الدولار دا وقت يرتفع اثرو بظهر في برشلونة.

• بعدين وارغو دا سجلو بي شنو؟.

• بالدولار.، وكلتشي؟. برضو بالدولار.

• يا اخي ريتشارد الساهل دا سجلوه بي الدولار.

• والله كلامك منطقي.

• عشان تفهم حاجة ...وعشان تاني ما تغالط ساكت.

• موسي الزومة يسجلوه بالجنيه ...وريتشارد بالدولار عاوزنو يلعب ليكم.

• انتوا بتتكلموا كيف؟.

• الكورة دي ما فيها (تعادل) ساكت.

• انتوا عارفين كشف المشاطيب بتاع المريخ بعد تعادل الخرطوم مع المريخ ارتفع بصورة خيالية...وجمال الوالي ذاتو قال : كشف مشاطيبنا السنة دي إلا نتموا من (النيل الحصاحيصا).

• انا خايف (جدادة الخلا تطرد جدادة البيت).، يعني شنو؟.

• يعني شنو كيف؟...الكلام دا هسع ما واضح.

• يا جماعة بالواضح كدا ...انا خايف ناس طمبل وريتشارد ومجاهد واكرم والباشا وكلتشي يقعدوا في المريخ ويشطبوا اولاد المريخ ناس العجب وبلة جابر وامير دامر وموسي الزومة.

• جمال الوالي دا شكلو عندو (طابق) تالت عاوز يعملو.

• الجماعة ديل السنة دي ما عندهم اي حاجة ...إلا يشوفوا ليهم (طابق تالت) يضبحوا ليهو.

• والله الكورة دي مفروض تقنعوا منها.

• مفروض تخلوها.

• كورة شنو في البرد دا.

• هسع ريتشارد دا فرقو شنو من (نجاد) البوسني...الاتنين بصرجوا الكورة واقفة.

• اقول ليكم حاجة.

• ريتشارد دا خلوه يمشي يلعب في نيل الحصاحيصا ...(النجيلة) هناك بتساعدوا علي (التصريج).

• علي الاقل يلقي ليه سبب يصرج بيه الكورة ..بدل ما يصرج الكورة في نجيلتكم السمحة دي.

• قالوا ليك (كاربوني) اول مرة يشوف ريتشارد قال ليهم : اول مرة اشوف لاعب بصرج الكورة بي كرعينو الاتنين.

• انت شنو عاوز تفك اي حاجة وتمسك لينا في (التصريج).

• نحن ناقصين.

• انتوا يا ناس النيل لو مشيتوا لوزان بي نجيلتكم دي ...بقولوا ليكم اي واحد يجيب ليه اربع صور وجواز سفرو عشان يكتبوا عليه (محظور).

• رفاعة دي ما بخلوكم تمشوا عليها تاني.

• انتوا قايلنها فوضي.

• ملحوظة: نجيلة في عينك.

هوامش

• تصريح كامبوس امس في صحيفة قوون وتأكيده علي انه سوف يهتم في مباراة اليوم بنتيجة المباراة دون الاهتمام بالعرض، يؤكد ان مدرب الهلال مدرب عالمي وكبير وفاهم وعارف بيعمل في شنو.

• ما تبقي من مباريات نحتاج ان نحسم فيها بطولة الممتاز بصورة رسمية ثم نأتي من بعد للعروض والاداء الجميل.

• مع هذا فان الهلال ان شاءالله اليوم يقدم عرض جميل.

• لكن يبقي الهم الاول هو ان يحصد الهلال اليوم نقاط المباراة الثلاث.

• دور جمهور الهلال اليوم يبقي كبيرا ...تعالوا جميعا لتكونوا مع الهلال.

• كاريكا عليه ان يركز في ان يلعب كورة وألا يتسرع ليسجل اليوم.

• ايداهور بقي في كل مباراة بعطوه ضربتي جزاء.

• خدمة تحويل الرصيد شغالة زي الفل.

• الحكام اصلو ما بقصروا مع ايداهور.

• ايداهور متعود علي الحكاية دي من المواسم السابقة.

• عشان كدا كاريكا مفروض يركز.

• تقول ايداهور دا جنستو اللجنة المركزية للتحكيم ، كلتشي قنع.

• قبل العيد ان شاءالله السنة دي تثبت رؤية الهلال.

• يعني ح نعيد ان شاء الله باللقب.

• المريخاب إلا يعيدوا السنة دي بي شطب ريتشارد.

• ريتشارد ذنبو شنو؟.

• خلاص يا الهلالاب عاوزين تفكوا اي حاجة وتقبلوا علي ريتشارد.

• تقول ريتشارد دا كان بيلعب في الفيوم.

• فيوم مين يا عم؟.

• خبر عاجل: تعادل تااااااااااااااااااااااااااااااني.