الكورة...(نجيلة) ما (اقوان)

< بعد اي هدف يسجل في اي مباراة يخرج لنا في الفضائيات وفي الصحف والاعمدة ...وحتي في النوادي والحافلات والشوارع ...جماعة كدا عشان يحللوا لينا (الهدف).

< الهدف مرات بكون عادي جدا ...كورة تضرب ليها في (مهاجم) صدفة ...تقوم تجي قون.

< القيامة تقوم.

< وعينك ما تشوف إلا التحليل والتنظير والتغزل في (المهاجم) الذي سجل الهدف.

< مرات يكون في محللين مجليين بتكلموا عن انفراد المهاجم بحراس المرمي ..رغم ان الهدف جاء من (تصويبة) خارج خط 18.

< واحيانا كمان هناك محللون بطلعوا من الموضوع ...وقت القون يجي في الدقيقة اربعين من الشوط الاول بقولوا للمخرج كدا ارجع لينا للدقيقة 35 عشان نشوف الهدف دا بدأ من وين؟.

< دا كلو عشان يأخذوا رأحتهم في الكلام.

< الجماعة يقعدوا يحللوا ليك في الهدف من الوقت داك ...ويقولوا ليك : (الهدف دا بدأ من التمريرة دي ..وشوف المدافع كان وين عند بداية الهجمة)؟.

< رغم ان (الهدف) بكون اكتر من عادي وما فيه اي اضافة ولا ابداع.

< غايتو الناس البحللوا ديل بعملوا في جنس حاجات.

< الحاجة البتغيظ انو في (محللين) كدا من يشوفوا ليك (الهدف) يقولوا ليك الهدف دا قبل ما يتسجل كان في (مخالفة).

< او قبل المخالفة الكورة طلعت.

< او قبل ما تطلع الكورة (المهاجم) كان في وضع متسلل.

< المهم بي طريقة كدا يطلعوا ليك الهدف ...ما هدف.

< هدف في عينك.

< تندموا المهاجم علي (هدفو).

< انا بكتب في العمود دا..قريت ليك خبر بقول : (بلة جابر ينقذ المريخ امام ابوعنجة ويسجل هدف التعادل في اخر دقيقة).

< يعني بلة جابر بقي زي عماد متعب.

< انتوا بمناسبة هدف عماد متعب ..دا شنو البعملوا فيه ناس المريخ.

< انا اول مرة اشوف لي ناس (مخلوعين) من النجيلة حقتهم.

< معقولة يا جماعة الناس وصلوا كاس العالم وانتوا فرحانين عشان استاد المريخ سوف يلعب فيه منتخب مصر ومنتخب الجزائر.

< هسع العالمية في الموضوع دا شنو؟.

< ان شاءالله يدوكم 6 نقاط في الدوري الممتاز علي تنظيمكم للمباراة دي.

< المريخاب يوم المباراة بدخلوا بشجعوا (النجيلة).

< يعني عماد متعب وقت ينفرد بالمرمي واحد من جماهير المريخ بقوم يقول لي عماد متعب اعمل حسابك علي (النجيلة).

< او لمن يهدف مهاجم المنتخب الجزائري في الجهة الجنوبية واحد من ناس المريخ بقوم يقول للحكم : (يا حكم ارفع الرأية...المهاجم وقت استلم الكورة ..(النجيلة) كانت في حالة تسلل).

< البرازيل وانجلترا لعبت في الدوحة واقيمت في اجمل استاد عربي ...مع ذلك ما سمعت لي قطري واحد بتكلم عن الاستاد.

< دا شنو البتعملوا فيه دا؟.

< ان شاءالله نجيلتكم دي تمشي تلعب في كأس العالم.

< يا جماعة ما تحرجونا ...اطوروا شوية ...استادكم دي خايف بعد المباراة ناس الجزائر يشكوا منو؟.

< واحتمال المصريون برضو يشكوا منو؟.

< ما تسمعوا الكلام البقولوا ليكم قبل المباراة ...عشان اي مسؤول مصري او جزائري لازم يقول ليه كلام سمح قبل المباراة عشان يكسب الناس.

< والله انت يا جمال الوالي ليك حق تركز في (الاستاد).

< النجيلة بقت اخير ليكم من وارغو.

< انتوا بطولاتكم الجوية...ليه خليتو الكلام فيها.

< بقيتوا ما بتجيبوا ليها سيرة.

< والله الحديث عن التاريخ (المصنوع) دا اخير ليكم من الحديث عن النجيلة والكراسي والطابق التاني.

< بعدين انتوا ما عندكم طريقة تتكلموا في الدوري الممتاز (الفرق 10 نقاط).

< ولا عندكم طريقة تتحدثوا عن البطولة الافريقية (الخسارة من الهلال بثلاثية).

< قنعوا من وارغو ومن طمبل ومن كلتشي...وبقوا يتحدثوا عن (الاستاد).

< املهم في الدنيا دي كلو اتحصر في (النجيلة).

< عليكم الله ما تحرجونا مع الضيوف ساكت.

< الغريبة انو جمال الوالي ما قصر ..شيء في المطار وشيء في الفندق وشيء في التمرين.

< دا شنو البتعملوا فيه دا؟.

< المواضيع كلها في ايد الاتحاد العام ..انتوا يا ناس المريخ عندكم 5% بسلموها ليكم وخلاص.

< ما تعملوا لينا جوطة.

< نقول ذلك لأن اعلام المريخ في ظل هذه المناسبة القومية ..قعد يتحدث لينا عن (الاستاد).

< الناس في شنو وانتوا في شنو؟.

< الموضوع موضوع قومي ..مالكم عاوزين تخصخصوا لينا.

< تصوروا همد ذاتو رجع تاني يصرح.

< انا خايف علي كلامكم دا بكرة القي هيثم طمبل في تشكيلة المنتخب المصري وموسي الزومة في تشكيلة المنتخب الجزائري.

< لا نريد ان تفسد هذه المناسبة بما يكتبه اعلام المريخ عن الاستاد والنجيلة والكشافات.

< عشان كدا نرجع لحكاية (الكورة اقوان)...المقولة التي نسمعها كثيرا في التحليلات.

< في ناس ما بعرفوا في كورة القدم إلا المقولة دي ...كل دقيقة والتانية يقولوا ليك : (الكورة اقوان).

< ناس المريخ طبعا بقولوا : (الكورة نجيلة).

< النجيلة عيشتها تطير...هسع دا وقتها.

< نحن زمان كان عندنا فريق ...السنة كلو ما بجيب ليه قون.

< فريقنا دا كان بيلعب 60 مباراة ما بجيب قون.

< مدربنا حاول يطلعنا من الجو دا ..قام قال لينا : (الكورة كورنر)...بدل (الكورة اقوان).

< نظام شنو؟.

< نظام يخفف علينا الصدمة شوية ...ويقنعنا انو القون ما مهم وما ضروري.

< عشان كدا كان بقول لينا : (الكورة كورنر).

< نحن نشيل ونصدق.

< كلام الكوتش دا كنا وقت نجيب لينا (كورنر) بنقعد (ننطط) ونفرح زي الحاجة السمحة.

< الفريق كلو بتقالد.

< نظام شنو؟.

< نظام (فرحانين) بالكورنر دا.

< جماهيرنا ذاتها ...اتعودت علي الموضوع دا وبقت زينا وقت نجيب لينا (كورنر) المدرجات كلها بتقيف وتصفق لينا.

< والاعلام الرياضي برضو اتعود علي الحكاية دي.

< وقت لاعب فينا يكسب ليه (كورنر) الاعلام اليوم التاني كلو بكتب عن (الكورنر) دا وبقعد يتغزل فيه.

< كورنر زي (التقرير).

< الاعلام بخلي شغلوا وبقعد يكتب عنو.

< ناس فاضية وما وراها حاجة.

< كنا وقت نلعب مباراة ويسألنا زول ويقول لينا : (اها المباراة انتهت كم؟).

< بنقول ليه : (المباراة انتهت سبعة اقوان للفريق الخصم مقابل كورنر لينا).

< الكورنر عندنا حاجة ما بتخلص.

< زي (النجيلة) عند الجماعة ديل.

< ملحوظة: انكروا الكلام دا كمان.

هوامش

< مفروض اي سوداني هذه الايام يبعد عن التصريح او المجاهرة بالاراء الحادة في المنتديات والمواقع الالكترونية.

< خلونا نكسب جميع الاطراف.

< المنتخب الذي سوف يخسر في الغد ...لا نريد ان يذهب الي بلده وهو يحمل شيء علي الجمهور السوداني ...خاصة ان اي منتخب يخسر سوف يحاول ان يوهم جماهيره انه تعرض الي ضغط ومعاملة غير كريمة من الجمهور السوداني.

< ما تعطوا اي زول فرصة.

< سدوا علي اي منتخب نافذة يمكن ان يبرر عبرها خسارته في السودان.

< المنتخب الذي يخسر طبعا بكون بفتش ليه عن (شماعة).

< ما تبقوا شماعة.

< وبرضو ما تبقوا (رقراق) ابقوا يا يا ضل يا شمس.

< اقصد ابقوا يا وصيف يا هلال.

< طبعا الجماعة ديل (ضلنا).

< اكيد الضيوف ما عارفين المعلومة دي.

< كنا ما عاوزين نجيب سيرة للموضوع دا..لكن الجماعة ديل فلقونا بي الكلام (الدراب).

< الاستاد سمح والنجيلة جميلة والاضاءة عجيبة.

< تتخيلوا صحف المريخ وقت تعمل ليها حوار مع لاعب من احد المنتخبات او مع احد اعضاء الجهاز الفني..تتخيلوا الصحيفة بتقول للاعب او المدرب شنو؟.

< بقولوا ليه : اها رأيك شنو في النجيلة؟.

< الاضاءة كيف؟.

< احرجتونا.

< بالله صحف المريخ كلها بتتحدث عن (الاستاد)..نسوا الجزائر ونسوا مصر وقعدوا يتحدثوا عن (النجيلة).

< في واحد من ناس المريخ قال : اها ناس جمال الوالي ديل ما بدوهم نسبة من عائد التلفزة مقابل (النجيلة).

< وفي واحد تاني قال : اعلموا لينا استديو تحليلي للطابق التاني.

< خبر عاجل: اخير تسكتوا ساي.