مباراة لتعليم الادب

مباراة الهلال القادمة ...مباراة سوف يلعبها الهلال ضد (اكرم الهادي سليم)..وليس ضد المريخ ..طالما ارتضي المريخاب ان يكون لاكرم الهادي سليم الكعب العالي في المريخ.

} لقد انتهي في المريخ الحديث عن (الكاسات المحمولة جوا)..وانتهي الحديث عن (الطابق التاني)...وانتهي حتي الحديث عن (الورغنة والكلتشة) واصبح الحديث في المريخ فقط عن (اكرم الهادي سليم).

} وهذا امر احسبه من حسن حظ الهلال ان يختزل المريخ كله في (رقصة) هذا اللاعب او في تصريحاته او في فوطته التي يربطها في رأسه.

} لذلك فان غياب اكرم الهادي عن مباراة القمة القادمة امر لا يفضله الهلال ولا يريدونه ..لذا نتمني ان تكون اصابة اكرم الهادي سليم خفيفة.

} كما ندعوا من كل الهلالاب ان يهدوا الي اكرم الهادي سليم اغنية محمد الامين : (قالوا متألم شوية ويا اخي بعد الشر عليك)..او اغنية ابوعبيدة حسن (نحن ما رضيناها ليك).

} ونتمني ان تكون اصابة اكرم الهادي (تمثلية) ليهرب منها من لقاء القمة القادمة ..لأننا نعتقد ان وجود اكرم الهادي سليم في الخشبات الثالث يوم الاثنين القادمة امرا سوف يعطي لاعبي الهلال المزيد من الدوافع كما اعطاهم من قبل عصام الحضري دافعا عندما حاول الحارس المصري استفزاز الهلال.

} لذلك فان استفزازات اكرم الهادي سليم للهلال امر جيد ...وهو استفزاز لا يدفع لاعبي الهلال وحدهم الي التجويد وانما يدفع حتي جماهير الهلال ويجعل للهدف في شباك المريخ طعما اخر.

} لذلك اذ فشل طبيب المريخ في استشفاء اكرم الهادي سليم نرجو ان يستعين مجلس ادارة المريخ بطبيب الهلال ..لأن شفاء اكرم الهادي سليم امر يهم الهلال اكثر من المريخ.

} هذا لا يعني ان المريخاب من الافضل لهم ان لا يقف بين الخشبات الثلاث اكرم الهادي سليم ..لأن وقوف اي حارس اخر بدلا عن اكرم الهادي سليم امر ربما يجعل (منير امبدة) هدافا لكأس السودان ..لأن حافظ ومحمد كمال ...برجفوا زي (نار القصب) عندما تأتي سيرة الهلال ..فما بالكم عندما يلعبون ضده.

} حافظ مين يا عم؟.

} ننوه ونذكر اكرم الهادي سليم بان رقيص مباراة القمة القادمة والتي سوف تلعب يوم الاثنين القادم بانه لن يكون علي طريقة (تقوم بينا العربية) ولن يكون علي طريقة القنبلة او سنتر الخرطوم ..او حتي بوس الواوا ...وانما سوف يكون الرقيص في مباراة القمة القادمة علي ايقاع (انا فيهم بقول كلام) و (يا اخواني البنات الجري دا ما حقي)...وهذا للعلم فقط.

} نعود ونقول ان المريخ يقترب من (وصافة) كأس السودان اذ اصبح قاب قوسين او ادني من (الوصافة).

} تحديدا كدا تبقي اقل من (72) ساعة لوصافة حديثة وجديدة للمريخ ..وهذا يعني ان وصافة المريخ سوف تكون هذا الموسم وصافة مركبة.

} ومثلما يقول صلاح ادريس عن رئيس نادي المريخ جمال الوالي (الحبيب تكعيب) ...نقول الان عن وصافة نادي المريخ ...(الوصيف تربيع).

} بالمناسبة (الحبيب) جمال الوالي قال التعاقد مع موبوتو اجتهادات من الصحافة الرياضية.

} اي (شتل) من الاعلام السالب.

} يحفظ للزملاء عمر المكابرابي وهيثم محمد انهما دون كل اقلام المريخ لم يذكروا او يأتوا بهذا الخبر الذي نفاه جمال الوالي او تنكر عنه.

} ونتمني ألا يكون التعاقد مع طارق مختار ايضا اجتهادات صحفية.

} غايتو اعلامكم السالب دا بعمل جنس عمايل.

} يسجل ويشطب براه.

} الاعلام السالب دا ..سفر جمال الوالي للامارات وجعل الوالي يتفق مع موبوتو الذي سوف يلعب في بطولة كاس العالم للاندية ثم يعود من الامارات ليوقع في المريخ.

} كدا بي كل بساطة.

} لا وكيل ...لا وسيط ..لا كسور وبواقي.

} والله نحن يكون عندنا اعلام زي اعلامكم دا نسجل (ميسي).

} طول ما الحكاية كلها كذب في كذب ...سجلوا (ميسي)...موبوتو ابوقلب عاوزين بيهو شنو؟.

} ما في زول بسألكم.

} انتوا موش مرة قلتوا ريال مدريد ح يلعب مع المريخ في (الرد كسل).

} ريال مدريد ما جاء..في زول سألكم ..في زول قال ليكم حاجة.

} انتوا موش نشرتو صور جمال الوالي مع رئيس نادي برشلونة الاسباني ..وقشرتوا بالحكاية دي في جرايدكم.

} في زول قال ليكم حاجة.

} انتوا يا ناس الاعلام السالب ..موش قلتوا ناس مصر وناس الجزائر ..منهدشون من استادكم العالمي.

} وقلتوا كمان نجوم المنتخب الجزائري الذين لبعوا في الدوريات الاوربية معجبون بالنجيلة حقتكم دي.

} في زول قال ليكم حاجة.

} خلاص قولوا السنة دي ح نسجل ميسي.

} وقالوا كرستيال رونالدو ذاتو جمال الوالي طلب منه ان يخضع للفحص الطبي عشان المريخ يسجلوا في التسجيلات الفادمة.

} اصلوا جمال الوالي ما بسجل ساكت.

} قولوا اي حاجة ....نحن بنعذركم ..(الوصافة) بتعمل اكتر من كدا.

} انا ما عارفكم (الوصافة) دي بتتعايشوا معاها كيف؟.

} والله نحن لو عندنا وصافة زي وصافتكم دي ...عشرة طوابق ما تثبتنا.

} الغريبة مع (الوصافة) دي بفرحوا.

} وبرقصوا كمان.

} لو شاركتوا في بطولة كأس العالم للاندية تعملوا شنو؟.

} تتخيلوا بعد (الرقيص) دا بيلعبوا في التمهيدي.

} بتووووووووووووووع التمهيدي.

} تسجلوا موبوتو ..زول بسألكم مافي.

} تشطبوا ...وارغو علي كيفكم.

} العجب يعتزل ...بي طريقتكم.

} ما يعتزل ..برضو بي طريقتكم.

} دي حاجة ولا بتخصنا.

} ولا بنشتغل بيها.

} تقلبوا (الطابق التاني)...اجزخانة.......ما في زول بقول ليكم تلت التلاتة كم؟.

} ان شاء الله تخللوه.

} دي حاجة ..ما بنقدر نقول ليكم فيها حاجة.

} لكن الحاجة الما بنقدر نجاملكم فيها ...هي انكم ح تلبعوا في تمهيدي.

} يلا تمهيدي ...تمهيدي...كلو رائح.

} التمهيدي عشان تذكروا ..يعني ح تلبعوا من دور الـ 64.

} (أ) أسد ..

} نا ..شنو؟.

} (نا) نمر.

} ح نبدأ معاكم من (كتابي الاول).

} بدر كتب....وامل رسمت.

} امل قالت : الولد ..الولد ...الولد.

} بدر زعل...(وكتمها في قلبو).

} انتوا ما تضايقوا الكلام دا بتلقوه في (التمهيدي).

} يعني ح تفتكروا في دور الـ 64 يدرسوكم ...الادب الانجليزي.

} اكتر حاجة يمكن ان تأخذوها في دور الـ 64 ...(مريم الشجاعة).

} انتوا بتذكروا (مريم الشجاعة).

} مريم الشجاعة دي بتعرفوها قدام ..بعد ما تجاوزوا (التمهيدي).

} خلاص يا الهلالاب عاوزين تخلوا اي حاجة وتقبلوا علي (مريم الشجاعة).

} خلاص عاوزين تفكوا (وارغو).

} قالوا وارغو في مباراة القمة الاخيرة ..شاف (منير ام بدة) قانص ليهو طرف.

} عارفين وارغو قال شنو؟.

} وارغو قال : اخير الـ 40 جلدة من الكلام دا.

} قالوا ليهو : كلام شنو؟.

} قال ليهم : مواجهة منير امبدة دي (اعدام) عديل اخير منها الجلد.

} انا عرفت ليه الزول دا ما جلدوه!!.

} ويلا لي بلدك.

} ملحوظة: ان شاءالله تتموا لينا الناقصة وتجيبوا لينا موبوتو في البرد دا.

هوامش

} نتمني ألا يكون هناك مانع قانوني في ان ينتقل فيصل موسي للهلال.

} اذا سجل الهلال منتصر وفيصل موسي ونجم الدين عبدالله وعاصم عابدين ..يكون تاني ما عندو اي مشكلة.

} دا غير المفاجأت.

} في واحد قال لي : انت مفاجأة صلاح ادريس شنو؟.

} قلت ليهو: المفاجأة يمكن تكون (لحن) جديد.

} الايامات دي (بروفات) سيف الجامعة كترت.

} يا صلاح ادريس ..حدد لينا ..عشان الاختصاص ما يتلخبط علينا.

} مجلس ادارة نادي الهلال عليه ان يرتب مبكرا لانهاء التعاقد مع دي سوزا وامولادي ..خشية من ان يجر هذا الموضوع.

} من هسع شوفوا طريقة لتوفيق هذه الاوضاع والوصول الي دي سوزا وامولادي للاتفاق معهم ليقضي ذلك بان يخلوا خاناتهم.

} لا بد ان الاتحاد العام سوف يشترط بعض الاجراءات والخطوات ..ويستحسن ان يكون مجلس الهلال جاهزا لتلك الخطوات.

} بعدين امولادي دا زي ايفياني لا بتبلع لا بفوت.

} خبر عاجل: المريخ يطارد (ايفياني).