تمريرة سيدا..او ما يطلبه المستمعون

< في البدء...قالوا الناس ان (تمريرة) هيثم مصطفي حفظه الله ورعاه..فيها شيء من (قهوة) البجا.

< شيء من (العطر)...ومشوار العصاري...وحنة العريس.

< وقال بعض الباحثين عن سيرة (التمريرة) انها (عجوة معطونة بي عسل).

< وقيل وقيل وقيل.

< وارجعت من ناحية علمية بحتة ...ان تمريرة البرنس (شيء خيالي) ..لا يدركه بصر الذين يلعبون في خط الدفاع ..ولا تستوعبه عقلية الاجهزة الفنية.

< غير ان اقرب الحقائق لتمريرة سيدا هي انها حالة من (الانفلات) والخروج من قانون الجاذبية...وكسر نظرية (نيوتن) بضربة من قدم سيدا..يجد (المهاجم) بعدها نفسه وجه لوجه امام الشبكة.

< ما عليه إلا يجيب قون ويقوم جاري...(الحكم) بصفر.

< وعشان ما ندخل في (مغالطات) ساكت....نظرية نيوتن بتقول شنو؟.

< النظرية بتقول ( الجاذبية أو الثقالة Gravity هي ميل الكتل والأجسام للتحرك والانجذاب نحو بعضها البعض كما في الجاذبية بين المغناطيس والأجسام الحديدية، ولقد كان إسحاق نيوتن أول من تحدث عن قوى الجاذبية (الثقالة) محاولا وضع نظرية تفسر ميل الأجسام للسقوط نحو الأرض (تفاحة نيوتن) بشكل يتناسق مع قوانينه الثلاثة للحركة)).

< الكلام دا حسب الموسوعة الحرة (ويكيبيديا)..عشان ما تقولوا نحن بنتكلم ساكت.

< نحن اي حاجة عندنا بي نظام.

< زي حلاقة العيد.

< حلاقة العيد الدخلها هنا شنو؟.

< تدخل في ضفورك ان شاءالله ...وما تطلع إلا بالانتربول.

< نشرح ليكم النظرية...عشان ما تقعدوا لينا كدا.

< تمريرة هيثم مصطفي عندها (جاذبية)...زي اغنية كمال ترباس ..(عيونك فيها شيء يحير يغير اتجاه الزول).

< عليكم الله في داعي (كمال ترباس) دا مرة يمشي يحضر كورة الهلال والترجي ...في داعي يا جماعة يقوم يشرب.

< انتوا الحقيقة ما بتقولوها ليه؟.

< اها مباراة الهلال ومازمبي التي لعبت في استاد الهلال ...القام يشرب منو؟.

< مجلس ادارة نادي الهلال عمل تحقيق في الزول السقي (النجيلة).

< انتوا عينكم في (الفيل) تطعنوا في (النجيلة).

< مفروض تشوفوا (الزول) القام شرب منو في المباراة دي؟.

< الزول الشربنا منو؟.

< انتوا (قيقم) كان حاضر المباراة.

< المهم هسع دا ما موضوعنا.

< موضوعنا الليلة تمريرة (هيثم مصطفي).

< المهاجم وقت يكون لاعب مع هيثم مصطفي بيلقي نفسو قدام القون...لما يتهجم.

< قودوين وقت كان بيلعب في الهلال الموسم الاول كلو كان (مخلوع).

< ما مصدق.

< كلتشي دا قالوا ليك اول موسم (اتوهم عديل).

< لمن جنسوه....(حتين) استوعب.

< كلتشي خلوه.

< افياني ..قلع الفانلة.

< عشان تاني تغالطوا.

< انا ما عندي حاجة ساكت...اي حاجة بقدمها ليكم بالبراهين والادلة...وحيث وإلا وكذا.

< شفتوا (النضمي) دا.

< تمريرة سيدا في الميدان بتوازي (تفاحة) نيوتن...عشان كدا المهاجم بكون فرحان وقت هيثم مصطفي يمرر ليه الكورة.

< تفاحة ووقعت قدامو.

< شوت يا ود الناس...شوت.

< انت لو هدفت في (الكشافات) ...تمريرة هيثم مصطفي دي بتجي (قون).

< بس اديها لكزة...لكزتين.

< قوانين نيوتن للحركة طبعا ثلاثة.

< لكن هسع الحركة براها بقي عندها 120 قانون.

< قلت ليكم قبل كدا ...(تمريرة) هيثم مصطفي زي اغنية مصطفي سيد احمد (حاجة فيك)..التي كتبها الشاعر هاشم صديق.

< ما في زول عارف (الحاجة) دي.

< كلهم ضاربهم (الحيرة)...زي الناس البجيهم (السقط) في الصيف.

< ما يعرفوا يتصرفوا كيف؟.

< تمريرة هيثم مصطفي زي الحكاية دي.

تقطع نفس خيل القصائد تشدة اجراس المعابد

توهتني تعبتني

وجننت حرف الكلام وبرضو ادتني السلام

حاجة في شرف المدائن وفي غرف كل السفاين

وجوة في عمق المناجم والعيون جاية زي ماتكون محلق في العواصف فجاءه تهبط في

السكون

حاجة زي نقر الاصابيع لم ترتح للموسيقي

حاجة زي اخبار تناغم من جريدة

حاجة زي وتر المواني لم يصدح لى سفينة

< الباكات يشكوا.

< والحراس يشكوا.

< والاعلام السالب ذاتو يشكي.

< بالمناسبة دي.

< عليكم الله يا ناس المريخ انتوا ما بتخجلوا.

< الفراش الي الان ما رفعوه...جايبين (الدافي) عشان تسجلوه.

< عاملين لينا فيها حزنانين...وانتوا بس همكم في (الخانة).

< خانة ايداهور دي مفروض تخلوها فاضية اربع سنوات.

< بعدين تعالوا هنا.

< الدافي دا مالو ما عندو (كرامة).

< يجيبوه ويرجعوه كدا...زي (صيوان) المناسبات.

< والله يا الدافي عمليتك دي (افياني) ما بعملها.

< انا اول مرة اشوف لي محترف ..كل اسبوع يستقبلوه في (المطار).

< يستقبلوه ويرجعوه.

< الدافي (استقبال) فقط...(ارسال) ما في.

< ما علينا...نرجع لموضوع هيثم مصطفي.

< الذين يعتقدون ان هيثم مصطفي مجرد لاعب كرة يلعب في الهلال والسلام واهمون.

< والذين يتخيلون ان سحر هيثم مصطفي في (تمريرته) فقط....يجافون الحقيقة.

< لأن هيثم مصطفي اصبح (تاريخ) في الهلال.

< عدد الكؤوس التي رفعها هيثم مصطفي وهو قائد للهلال ..ربما لم يرفعها عدد كبير من كباتن الهلال مجتمعين.

< فهو كابتن متعهد لرفع (الكاسات).

< غير ذلك ...فان في كل قطعة من جسد هيثم مصطفي شاهد علي حبه واخلاصه للهلال.

< هيثم مصطفي (كسر) ضلوعو في الهلال...تماشيا مع القول الذي يقول الهلال كاسر فيه ضلعة).

< وقد كسر الهلال اكثر من ضلعة في الهلال.

< هيثم مصطفي يلعب وهو في يده (مسطرة)...رفض اللاعب مرارا و تكرارا ان يخرجها من يده حتي لا يتوقف عن اللعب وحتي لا يحرم الهلال منه.

< علما ان حكاية (المسطرة) تلك تخلق عقدة عند الهلاليين لأنه بسببها رحل لاعب الهلال الفنان والي الدين محمد عبدالله.

< هيثم الان يحمل (مسطرة) في يده...وربما بفضل هذه المسطرة ..يسطر ويخطط هيثم مصطفي فتخرج العابه بكل هذا التنسيق والتخطيط.

< وان كنت اري ان (مسطرة) هيثم مصطفي الحقيقية في (رجله)...غير تلك التي غرست في (يده).

< غير هذا ..فان هيثم مصطفي سقط اكثر من ثلاث مرات مغميا عليه في الميدان.

< كان يصر رغم (الاغماء) علي اكمال المباراة..وكان رغم الراحة والتحذير يعود هيثم مصطفي من اجل ان يلبي نداء الوطن..ومن اجل ألا يكون بعيدا عن الهلال.

< وهيثم مصطفي لم يكتف بهذه التضحيات.

< هيثم مصطفي لم ينقطع عن تمارين الهلال حتي ووالده مريضا...حيث فارق والده الحياة...لكنه اورث حب الهلال لابنه الذي اصبح (برنس) الكرة السودانية.

< وهيثم مصطفي يؤجل حتي عملية ولده ويؤخره علاجه....لأن الهلال مشارك في بطولات افريقية.

< فلذة كبدة هيثم مصطفي كان هو الاخر يضحي من اجل الهلال...لأن من شابه ابوه ما ظلم.

< وما خفي كان اعظم.

< كم من المواقف السرية التي نشهدها لهيثم مصطفي ..والتي يقر بها ويعترف لاعبي الهلال وهو يحل مشاكلهم خارج الميدان وهو يبقي معهم متابعا لهم ومفكك لكل ازماتهم حتي لو كان ذلك من جيبه الخاص.

< هيثم مصطفي بكل هذه التضحيات..تعرض الان لحرب خفية.

< نحن لا نقصد خلاف كامبوس مع هيثم مصطفي ...فمن حق المدرب ان يجلس هيثم مصطفي بكل تاريخه في كنبة الاحتياطي..وقد جلس هيثم دون اعتراض وباحترام تام لقرار المدرب.

< لكننا نقصد الحرب التي يديرها البعض علي هيثم مصطفي ...من بعض الذين يعملون في الجهاز الفني ودائرة الكرة.

< الذين لا شغل لهم غير (نقل الكلام) والترويج له.

< اولئك فليحذروا...لان التاريخ لا يرحم..ولان جمهور الهلال يعرف ان يفرق بين الطيب والخبيث..ولأنه يبادل اهل الوفاء والاخلاص بنفس القدر.

< غدا نواصل...في الموضوع نفسه.

< ملحوظة: الهلال الان يفتقد للمسة الاخيرة.