مع زعيم البلد مش حتقدر تغمض عينييك

راعي الضأن في الخلا عارف ومتأكد أن المريخ غالب غالب.
* كل الأهلة على اختلاف مشاربهم وسحناتهم مستسلمون ومنتظرون هذا اليوم عملا بمقولة (كتلوك ولا جوك جوك).

* المريخ جاي وشايل سيفو في إيدو.

* مافيش يمه ارحميني.

* لا بنعرف لفة الراس ولا طشاش العيون ولا شحتفة الروح.

* سمعنا إنو معظم نجوم الهلال هذه الأيام هالتهم سأبه.

* حمى ودوخه واستفراغ ورجفة ركب وحاجات تانية حامياني.

* أثبت يا برنس والكلام ده ما بشبهك.. أركز.

* أما الود الدعيع القال عندو طشاش ده

* شربوهو جردقة وخلوهو يتغدى براس نيفة يوم المباراة.

* ما عايزين أي أعذار يا سعادة الوزير طارق أحمد آدم.

* الناس ديل مشكلتهم إنو جيوبهم باني فيها العنكبوت.

* تماما مثل دواليب الكأسات الجوية.

* يوم المباراة تجيب أي لاعب وتشممو مائة دولار.

* حالة لاعبي الهلال دي من كثرة أكل الموز.

* والرخيص برخصتو بضوقك مغصتو.

* رغم أن نتيجة هذه المباراة محسومة وانت سيد العارفين

* لكن نتمني أن نشاهد مباراة كرة قدم بعيدا عن الرفس والعفص.

* وقبل ما تجتمع مع اللاعبين اجتمع مع روابط المشجعين.

* ممكن نقبل قارورة قاروتين لكن حجار ما معانا أبدا.

* نحن وصينا لاعبينا بعدم احراز أي هدف بعد الثالث لأننا الفيلم الهندي ده دخلناه من قبل.

* ساعدونا بالسكات والفرجة والموية الباردة.

* لو سألت أي زول في الشارع هلالابي أو مريخابي عن توقعاته حيرد ليك طوالي: المريخ فائز على الزبون بالمعلوم.

* قال دلاقين قال!

* الدلاقين ديل حتشوفهم يوم الخميس.

* أنا ما عايز أرجفكم أكتر من الرجفه الفيكم.

* لكن المريخ المرة دي صعب.

* حيهريكم.

* وأي واحد من الحداشر لاعب ممكن يطلق رصاصة الرحمة مع اول دقيقة في المباراة.

* المريخ بقى نار منقد.

* لاسانا اليومين ديل مولع نار.

* كاسروكا ملك العافية وجاهز لكل شاردة وواردة.

* سادومبا لاعب بأمر الفاضل أبوشنب ومباركة من الطاهر محمد عثمان.

* والطاهر حيغيب من برنامج الرياضة يوم الجمعة.

* واحتمال كبير انو رضا مصطفي الشيخ ذاتو يغيب.

* بسادومبا بيكاتونقا أب زرد حيلحقكم الزينين.

* الرنين المغنطيسي أكد سلامة سفاري.

* ومع سفاري مش حتقدروا تغمضوا عينيكم

* ويا زومة ياحكومة ماتنسى نصيحة مازدا (أرجع يازومة)

* وتاكد تماما أن عرين المريخ سوف يحرسه المتطور محمد كمال.

* كلما اقتربت ليلة الخميس ازداد النحيب والعويل ويوم عشرة حبابو عشرة.

* نريد العلامة الكاملة ولا عزاء لناس قريعتي راحت.

* كورة ومقصورة.. وحوض سباحة وصالة ألعاب.

* دى عايزة ليها كدة مائة سنة ضوئية.

* حنهريكم.

* جيب من جوه يا دعيع.

* الدعيع قال الدكتور منحني راحة اربعة أيام وطالبنى بالتركيز الشديد على عصير البرتقال.

* من فين يا حسرة؟!!

* شجرة الموز الزرعها عماد الطيب جنب ميدان الباسكت حرقت ولا شنو؟

* حنهريكم!

* دخل القش ماقال كش.. ده شنو؟

* دي كورة قلق داخل شباك الدعيع!

* واللييييييييييييييييييييييييلا.