ديل نحنا القالو متنا..!!

امبارح يا جماعه قلنا ليكم نحنا برااااااااانا بنحتفل في القلعة ما صدقتونا.. طالبنا جماهير الهلال أن لا تبالغ في الاحتفالات قبل المباراة لأنو في احتفالات بعد المباراة.. ووين في القلعة الحمرا.. الزملاء في الشركة كانوا ما مصدقين كلامنا.. قالوا ناصرده مجنون.. معقول الهلال التعبان ده يفوز على المريخ صاحب العلامة الكاملة.. قلنا ليهم يا جماعة الهلال ده فريق كبير ما بتقدروا عليهو..!

أها نجوم الهلال ديل طلعوا أثقل من خالد عزالدين ذاتو.. سمعوا الكلام طوااالي شالوا الأعلام الزرقا وجري للقائم الشمالي طبعاً عارفين عملوا شنو طلعوا وين برضو عارفين في القائم الشمالي وهاك يا رقيص..!

المعز زعلان شديييييييييييد من بدرالدين عبدالقادر عشان طردو بدون سبب والله أول مرة أشوف لي لاعب يضربو الجمهور خارج الملعب بحجر في رأسه يقوم الحكم داخل الملعب يشهر في وجهه البطاقة الحمرا..!

نجي للمباراة تاني والله المباراة دي علمت للجماعة حاجات كتيرة شديد، والله أول حاجة أنو الود مهند الطاهر قام رجع لعادتو القديمة عارفنها طبعاً، قام قلب الهوبة وعارفين الهوبة دي قاعده تزعل الجماعة شديد بس الود مهند كان مصر إصرار شديد أنو يقلب الهوبة وقلبا بيا..!

أها ناس عبد المحسن و مزمل وحسن محجوب وأبوشيبة بكتبوا شنو الليلة.. تعالوا نقرأ معاً أعمدة الإخوة الزملاء المريخاب: انتو عارفين يا جماعة كاربوني المسكين بكون أول ضحية عارفين ليه بقولوا ليك كاربوني معقول يخت لاعب زي قلق في الاحتياط.. وناس منهم برضو بقولوا معقول يشرك وارغو المصاب.. ومعقول يجلس الزومة على الدكة..!

أصلو ناس المريخ ديل آسف أقصد أنو الإعلام الأحمر (السالب) سيواصل سلبيته لكن ما عارف جمال بكرة بقول شنو في الإذاعة الرياضية عليك الله يا السماني وعليك الله يا فاطمة ضروري تستضيفوا الوالي عشان يشوف ليهو حاجات تهدئ جماهير المريخ دي شوية أصلو ناس المريخ ديل كلهم خبراء في فن التخدير..!

أها نجي للجماهير (الصفوة) والله الجماعة ديل اسم الصفوة ده جابوه من وين أنا ما عارف.. يا جماعة الجماهير دي ما في مباراة ما قذفت الملعب بالحجارة.. أي مباراة طواااالي أول ما يجيبوا فيهم هدف يقوموا يقذفوا الملعب بالحجارة يعني الأندية تعمل شنو ما يجيبوا قون ومرمى المريخ مفتوح على مصراعيه.. والله ليهم حق.. انتو عارفين الجماهير دي ما زعلانة من اللاعبين الجماهير دي زعلانة شدييييييييييد من الإعلام الأحمر الشغال نفخ في لاعبين كورتهم (حبة) انتو عارفين اللاعب لما كورتو تكون حبة طوالي بعمل ليهو مشكلة زي بلة جابر.. أها بخصوص بلة جابر عامل فيها لاعب كبير قام عمل ليهو حركة كده قام الحكم قال ليهو أقول ليك حاجة أحسن تمشي تقعد مع كاربوني لأنو المباراة دي كبيرة عليك أوي أوي..!

أها نجي لبدرالدين عبدالقادر ذاتو والله أول مرة أشوف لي حكم داير الكورة تطلع درون.. فكر وحدث نفسو قال ليها الكورة دي تطلع درون كيف.. تطلع درون كيف لازم أقوم أطرد لي لاعب مؤثر في الهلال.. خاف يطرد عمر بخيت قال أحسن الطرد يكون للمعز محجوب لازم اطردوا عشان المريخ يدرك التعادل.. وقال لي نفسو معقول المريخ في القلعة الحمراء يخسر.. معقول المريخ الريسو جمال يخسر.. معقول الصفوة دي كلها تخسر لازم اطرد المعز قام طرد المعز ولو الأمر بيده كان حرم الهلال من دخول الدعيع.. وبدر الدين عبدالقادر بعاين لشبكة الدعيع قام زاد المباراة زي ربع ساعة كده ده كلو عشان مريخ الحبيب يدرك التعادل لكن في لاعب ثقيل جداً اسمو كاريكا قام جاري.. هو والقون وجيب من جوة ما عرف يعمل شنو يحتسبها هدف ولا ينهي المباراة، والله كاريكا ده أثقل منو اصلو ما شفنا يا جماعة في لاعب في الدنيا دي بجيب ليهو قون في الدقيقة 103 أي في لاعب ثقيل اسمو كاريكا ثقالتو أصلو ما شفناها قبل كده..!

أها نرجع للود كامبوس والله عمل ليك في الجماعة عمايل .. قام أخرج ثنائي الهجوم إمبيلي وسادومبا على التوالي.. انتو عارفين دخل منو دخل الود الاسمو (بشة صغيرة) ومعاهو منو تاني يا ود يا قسم.. أي اتذكرت الود الثقيل الاسمو كاريكا أول ما دخل كاريكا جدع ليهو باص مقشر كده للغزال وجيب من جوة يا محمد كمال.. صديقي العزيز السنجك من الإمارات رسل لي رساله ظريفة جداً قال لي فيها (طخو يا غزال في المليان) قام مهند طخ الجماعة والأجمل من قون مهند عارفين شنو أنا عارف غايتو (الهوبة) والله الهوبة دي أنا بكون سعيد بيها جداً جداً.. يعني يا مهند ما تجيب لينا قون بس لازم تقلب الهوبة.. وقلبا بيا..!!

مباراة الأمس حضرناها في التلفزيون والله ما خايفين لكن دي تعليمات السيد شداد.. عارفين شداد كيف رفض يدينا بطاقات دخول.. هسي ده وقت كلام زي ده والأسياد غالبين.. كدي خلونا من شداد ده برنجع ليهو مرة تانية المهم الآن الأسياد غالبين وفرحانين وسعيدين مش ليهم حق يفرحوا ويسعدوا مش هم أسياد البلد دي..!!

بكرة السبت مزمل بجي من القاهرة يعني هو عارف المباراة يوم 10 السبب البخليهو يحجز يوم 12 شنو.. والله أنا خائف يمدد إجازتو تاني بأمر (الهوبة) وبأمر الود الثقيل الاسمو كاريكا..!

أها ياحسن محجوب وين المسامير وين الملايين..!

يوم عشرة جا يا أحمد وما غلبتوا 10 وما غلبتو 5 زي ما طالبت لاعبي المريخ أها بكرة بتكتب ليهم شنو.. أنا خائف تكتب ليهم دلاقين.. عارفها طبعاً دي الكتبت فيها مقال كامل يوم داك..!!

نفسي أشوف سلك وأبوبكر عابدين.. أما مجدي أحمد البشير فأظنه سيحتجب بأمر الغزال.!

نجوم المريخ.. مجلس المريخ.. الإعلام السالب.. اذهبوا فأنتم الطلقاء ..!!

[/size]

تهانينا لحبايبنا ناصر وعبد العظيم الدوم بالفوز والف مبروكين
ونهني ايضاي كل هلالي
عبدالمحسن محمد

من طرف طا رق نا ب السبت يونيو 12, 2010 4:51 am

كلك زوق يا عبدالمحسن اخلاقك روح رياضية . كون انك باركت للهلالاب وانا رايى كتبت امبارح بعد المباراة طوالي مع اني هلالابي يا ناصر برضو مش ده الهلال بتاع زمان والفريفين كانو تعبانين زي ما قال المعلق عصام الشوالي الفريقين لا يستحقوا الفوز في مباراة فرنسا والاورغواي لانهم الاثنين كانو اتقاسموا اللعب ..........؟؟؟؟؟؟؟؟؟؟؟؟؟

ديل نحنا القالو متنا..!!

ديل نحنا القالو متنا..!!

رد: ديل نحنا القالو متنا..!!

رد: ديل نحنا القالو متنا..!!