الأرباب وعماد على سبيل الإعارة ..!!

طبعاً انتو عارفين الليلة بتبدأ تسجيلات اللاعبين للفترة التكميلية.. أها ناس المريخ قاعدين يفتشوا ليهم في لاعبين عشان يسدوا الخلل في فريقهم.. هم طبعا عارفين كويس أنو فريقهم كلو ثغرات من حارس المرمي مروراً بالدفاع ثم الوسط، أما الهجوم فالسكات أفضل..!

أمبارح كنت قاعد أتونس مع مريخابي لقيتو محبط جداً.. قلت ليهو يا راجل مالك الليلة.. قال لي والله المحيرني أنو ناس المريخ ديل عندهم قروش كتيرة لكن ما لاقين ليهم لاعبين يسجلوهم والله محتارين يعملوا شنو.. !

قلت ليهو ناس المريخ ديل ما عندهم حل الا إعارة (الهلال) آااي والله الا الإعارة الجابوها ناس الهلال عارفنها طبعاً يوم أعاروا سادومبا وكابوندي والدرس المجاني القدموهو ناس الأرباب وعماد الطيب.. نحن ما عندنا أي مشكله لو انتو عندكم مشكلة قانونية وما قادرين تحلوها ولو عايزين تسجلوا وما عارفين.. ولو دايرن تعيروا وما قادرين نكلم ليكم الأرباب وعماد أصلو الجماعة ديل قاعدين يذاكرو كويس جداً خاصة الأرباب والله ما عندو أي شغلة غير يقرأ طوااالي أي حاجة بقراها حتى لو سافر (نيالا) الكتب والقوانين معاهو طواالي وطبعا عارفين انتو نيالا جوها سمح شديد وتحلو فيه القراية عشان كده ناس الهلال بكونو سعداء لما الأرباب يمشي نيالا خاصة قبل أي مباراة للقمة عشان يخلي الجماعة يسرحوا بخيالهم وينسجوا القصص والحكاوى.. والله الأرباب القصص دي بكون سعيد بيها خالص خالص..!

نجئ راجعين تاني لموضوع التسجيلات عليكم الله فريق مدربو بشكو من قلة المهاجمين، بل عدمهم.. ومجلس يشكو أيضًا ًمن قلة المهاجمين وإعلام جايط من موضوع الإصابات دي الأبعدت ثنائي الهجوم طمبل وكليتشي برضو يقوم المجلس يجيب ليهم لاعب وسط (محور) هيثم مرابط والله الناس ديل جنوا عديل كده هسي المريخ ده داير ليهو محور ولا مهاجم عليكم الله .!

ناس المريخ ديل انتو عارفنهم براكم جنهم يقلدوا الهلال.. الهلال عارفنو عندو أفضل نجوم محور في قارتنا السمراء (عمر.. علاء.. سيف مساوي.. حموده بشير) والاتنين في الآخر ديل جبناهم من المريخ ذاتو اااي والله من المريخ عليكم الله المريخ عندو زي علاء الدين وحموده ديل يفرط فيهم عشان يمشي تونس يجيب ليهو لاعب محور والله شفت يا أرباب..!

أها أمبارح قالوا المرابط وصل بالسلامة.. وبعد كم يوم كده بجي عبدالكريم الدافي برضو لاعب وسط.. وقالوا مطر السنغالي طلع (ماسورة) كبيرة عشان كده فكوا خبرو وقالوا اللجنة الفنية الكونها مجلس المريخ اهتدت الى ثلاثة لاعبين كبار يلعبون في خانة المهاجم الصريح ولكن الغريب والمضحك معاً أن اللجنة المعنية وضعت شروط للوكلاء أهمها أن يكون المهاجم ما لعب في دوري أبطال إفريقيا أو الكونفدرالية.. طيب يا جماعة رايكم شنو تجيبوا ميسي امشوا لناس برشلون يفكوهو ليكم على سبيل الإعارة مش قلتوا لاربوتا صاحب جمال الوالي ودعاهو لحضور مباراة برشلونة والريال طيب المشكلة شنو.. معليش اتذكرت لابورتا قالوا مشى من برشلونى وجا رئيس جديد امشوا ليهو قولوا ليهو جمال كان صاحب لابورتا عليك الله فك لينا ميسي ده..!

ميسي دي كتيرة شوية مش كده يا (سلك) امشوا للنادي الملكي عارفنو طبعاً ريال مدريد جيبوا كرستيانو على سبيل الإعارة عارفين أنا قلت النادي الملكي ليه لأنو ريال مدريد ده بشبه الهلال أي والله بشبه الهلال شبه شديد فهو الأعرق.. والأكثر بطولات في إسبانيا ويطلق عليه النادي الملكي وهنا في السودان قاعدين نطلق على الهلال سيد البلد واللأسياد وأعتقد أنو المعنى واحد سيد البلد يا هو الملك والملك يا هو السيد ولا سيادة الا لله..!!

نجي تاني لموضوع التسجيلات ده مش انتو ملاحظين الأرباب ده ما قاعد يتلكم في التسجيلات دي خالص.. عارفين ليه لأنو قاعد يذاكر في القواعد العامة والله بكرة يطلع ليكم بحاجة كده تحيركم عديل.. هسي شداد ده مش قال بكري المدينة ده ما بتسجل والله بكرة يقول ليكم حاجة تحتاروا فيها مش قبل كده جاب ليكم (الإعارة المسكوت عنها).. أها ناس الأرباب كشفوها ليهو وخلوهو يعترف بيها حتى قاموا سجلوا بيها لاعبين عارفين سجلوا بيها منو.. سادومبا أو البطاح.. والبطاح دي خلتني أتذكر مطالبة بدرالدين الفاتح بضرورة شطب أكرم الهادي وموسى الزومة الاستبدلوا المنطق (بالجزمة) أو كما قال.. لكن ما ورنا الأدوهو بالجزمة ده منو.. غايتو بدرالدين الأنا بعرفو بكون زعلان لواحد من ناس النهضة هو أنا ما عارف لكن أكيد من ناس النهضة لأنو بدر الدين ما بثور ويطالب بالشطب كمان الا للشديد القوي..!

أما الحاجة التانية الطالب بيها بدر الدين هي شطب كل اللاعبين بكشف المريخ الانتقلو من الهلال.. وهو بالطبع يقصد طمبل.. الباشا.. أكرم الهادي.. وكليتشي طيب يا اخوي انتو قلتوا الهلال غلبكم عشان الجماعة ديل ما في لمن تشطبوهم بتجيبوا الأعذار تاني من وين..!

ومن عندي أضيف للأخ بدر الدين الفاتح شطب مجاهد ذاتو من دائرة الكرة المريخية مش مجاهد عينو الوالي نائباً لمدير الكرة بالفريق ومجاهد ذاتو من الهلال والله لو ما شايفها شينة شديد كنت طالبت بشطب واحد تاني أهم زول عندكم لكن معليش ما في داعي نقلب المواجع . ولا رايك شنو يا أرباب..!

تاني نجي راجعين لموضوع التسجيلات البتبدأ الليلة انتو عارفين الهلال شغال من بدري خالص فيها من شهر 12 الفات لما سجل بكري عبدالقادر (المدينة) وفيصل في أندية صديقة يعني الهلال أنهى تسجيلات شهر 6 من شهر 12 الفات والله تاني شفت يا أرباب.. وعشان أوريكم أنو ناس الهلال ديل بعرفوا الكوره كويس في عام 2003 سجلوا كل الحراس في الساحة.. المعز من الموردة.. محمد آدم من أهلي مدني.. ورجعوا أبوبكر شريف من الخرطوم.. أها ناس المريخ بقوا يفتشوا ليهم في حارس مرمة من الزمن داك لي هسي ما لقوهو برضو في العام 2006 كنا دايرن نسجل محمد كمال (ولدنا) وولدنا دي حقيقة مش كان بلعب في هلال بورتسودان لكن محمد كمال الوقت داك حسبها صاح قال والله لو مشيت الهلال احتمال تمرين ما القى لي فرصة معقول القى فرصة مع المعز وأبوبكر شريف ومحمد آدم أحسن أمشي المريخ عشان العب طوالي..!

برضو ناس الهلال بعد ما أمنوا موضوع حراسة المرمى اتجهوا للوسط وتحديداً لاعب المحور قاموا سجلوا عمر بخيت.. وبعدو سجلوا حمودة أو اقتلعو حمودة من ناس المريخ.. وبعدو قاموا سجلوا علاء الدين يوسف.. وبعدو سجلوا سيف مساوي من الجريف عشان تعرفوا ناس الهلال ديل نظرتهم ما بتخيب في اللاعبين أصلاً وخلوا الساحة فاضية من لاعبي المحور..!