ســـــكن الــــــنساابة ...راحـــــة ولا كــــــــــأبة ,,,

من طرف محمد شريف الثلاثاء يناير 25, 2011 3:06 am

الزواج هو النهايه الحتميه لكل رابطه إنسانيه محترمه بين ذكر وأنثى
وأكيد كل زوجه بتتمنى يكون بيتها هو مملكتها والزول ما بيرتاح إلا في
بيتو لكن في أحياناً كتيره الظروف بتجبرنا نكسر القاعده وتلقى المره
ساكنه مع نسابتها ويكون عندها قسم مستقل ومرات بتكون خائضه مع
الخائضين والعيشه وحده وبيكون السبب مادي أو بيكون البيت قريب من
الشغل أو بيكونو الوالدين كبرو في السن ولو كان هو الولد الوحيد ماليك
حل وفي الحاله دي أكيد بيكون في نوع من التقييد بالذات لو كان والد الزوج
موجود وعندو أخوان في البيت ولو كانت أمو من النوعيه البتتصرف على
أساس أنا ست البيت وإنتي ضيفه عندي برضو مافي إشكال وعشان خاطر
عين تكرم 1000 عين وياها أمو الجابتو في الدنيا دي حيتبرى منها يعني ؟؟؟
الأم واحده والله واحد وإنتي كان بقيتي تاجوج بيلقى زيك بالكوم وحواء والده ...
عشان كده إعتبريها أمك التانيه ومهما عملت وقالت خشمك عندك وخليك بت
أصول ومع مرور الوقت جايز تتغير وتراجع حساباتها خليك دايماً ظريفه وهاشه
وباشه ولسانك حلو وما تتقلي دمك خشي المطبخ وساعديها وإحترميها وخليك
مرة ضيفان ودايماً يكون لبسك ساتر ومحترم وإعتبري أخوانو أخوانك وأخواتو
أخواتك وكوني ليهم الأخت والصديقه ...
ومرات بيحصل العكس ولظروف معينه بيسكن الرجل مع نسابتو ولو النفوس
طيبه الوضع عادي جداً والناس بقو أهل لكن لو الراجل مرتاح وميسور مرات
أهلو بيطنطنو ويعتبروهو إضينه ويقولو نسابتو ماكلينو ومستغلينو لو هم حالتهم
غير ميسوره ... لكن في رأيي الشخصي المتواضع إنو مفاتيح السعاده بيدنا نحن
والعايز يعيش سعيد بيسعد والشقي شقي طول عمرو والبيوت بيوت الآخره ...
دمتم بود وراحة بال ...